Read Thado Chin Thempudan 2 Bible Online

Thempudan 2 - Thado Chin bible

Thempudan 2

¹Chule khat touvin Pakai henga anneh thilto atoa ahile, ama thilpeh chu changbong neljet hiding; achunga chu thao alheija, chule bego akoiding:

²Aman hichu Aaron chapate thempuho henga ahinchoi ding: aman hichea kona chu changbong nel chu thao toh, bego jouse toh akhut dimkhat alahdoh ding; chule thempu chun hetjingna hidinga meija kisem thilto, Pakai henga gimnamtui hidinga maicham chunga chu ahalding ahi.

³Chule a-anneh thilpeh amoh chu Aaron le achapatea hiding ahi: hichu meija kisem Pakaiya thiltoho lah-a athengpen ahi.

⁴Nangman thuhkhuh-a kihonmin anneh thilto nahin choija ahileh, hichu changbong neljetna kisem cholsolou changlhah thao kihal hiding, ahilouleh cholsolou changlhah paset thao kinu hiding ahi.

⁵Chule nathilto chu bela kikang anneh thilto ahile, hichu thao toh kihal cholsolou changbong neljet hiding ahi.

⁶Nangman hichu ahal hala nakhenna, chule achunga thao nalhei ding, hichu anneh thilto hiding ahi.

⁷Na thilto chu thil kanna bela kikang ahile, hichu thao toh changbong neljet na kibol hiding ahi.

⁸Chule nangman hiche ho-a kisem anneh thilto chu Pakai henga nahinchoi ding; hichu thempu henga akipeh tengle, aman maicham phung ahinchoilut ding ahi.

⁹Thempu chun hiche anneh thilto-a kona chu hetjingna dinga phabep alahdoh-a, maicham chunga chu ahalding: hichu meija kisem thilto, Pakai henga gimnamtui chu hiding ahi.

¹⁰Hiche anneh thilto amoh chu Aaron le achapatea hiding ahi: hichu meija kisem Pakaiya thiltoho lah-a athengpen hiding ahi.

¹¹Pakai henga nahinpoh anneh thilto nahinchoi chanchu chola kisem hilou ding ahi: ajehchu nangman meija kisem Pakaiya thilto tapou lah-a chu chol ahiloule khoiju nahal louding ahi.

¹²Ahin ga masaho thilto-a vang chun, hiho chu Pakai henga napeh dingu ahi: hijongle hiho chu gimnamtui hidinga maichama kihal louding ahi.

¹³Anneh thilto napeh chan chu nangman chi naso cheh ding; na anneh thilto-a chu na Pakai toh nakitepna chi chu na lhahsam sah louding ahi: nathilto jouse chu chito natotha cheh ding ahi.

¹⁴Chule Pakai henga anneh thilto-a ga masaho nato-a ahileh, na gamasa anneh thilto nato ding chu changvui hing meija kisang go, akunga kona ki-atlha avui lhingset hiding ahi.

¹⁵Chule achunga chu thao nasuna, chule chuche chunga chu thao namtui nakoi ding: hichu anneh thilto hiding ahi.

¹⁶Chule thempu chun hetjingna dinga changvuija kona phabep, thao phabep le bego jouse chu ahal ding: hichu Pakai henga meija kisem thilto hiding ahi.