Read Thado Chin Thempudan 20 Bible Online

Thempudan 20 - Thado Chin bible

Thempudan 20

¹Chuin Pakaiyin Mosi henga aseijin, hitin ati,

²Israel chateho henga hitihin seikitnin, Israel chate lah-a kona ahin, Israel gama khopem gamdang mi lah-a kon hijongle, koitobang Molech henga acha pe-a chu; ama chu thatei teiding ahi: agam mite chun ama chu songa asediu ahi.

³Keiman amapa douna-a kamaingat ding, chule amite lah-a kona kapaidoh ding ahi; ajeh chu aman keima muntheng suhbohna ding le keima mintheng suhminset nadingin acha Molech henga apen ahi.

⁴Chule itiham khatna agam mite chun amapan acha Molech henga apeh chu akimumo sah uva, chule amapa chu atha lou uva ahileh,

⁵Chuteng chule keiman amapa le a-insung mite douna-a kamaingat ding, chule Molech to jonthanhoi dinga amatoh jong jouse chu amite lah-a kona kapaidoh ding ahi.

⁶Chule koi hile amaho to jong dinga lhakou ho le doithemho lama kihei tapou chu, amapa douna-a kamaingat ding, chule amite lah-a kona kapaidoh ding ahi

⁷Hijeh chun nangho kisuthengun lang atheng hiuvin: ajeh chu keima Pakai na-Pathen'u kahi.

⁸Chule nanghon keima chondan ho nanit uva, natohdoh dingu ahi: ajehchu keima nangho suthengpa Pakai chu kahi.

⁹ Koi hile apa ahiloule anu gaosapma chu thonlouva thatei ding ahi: aman apa ahiloule anu agaosap ahin; athisan chu ama chunga chuding ahi.

¹⁰ Chule pasal khat pasal dang ji to jonga, aheng akompa jinu to jonga chu, ajongpa le ajongnu anilhona thatei ding ahi.

¹¹ Chule pasal khat apa jinu to lumkhoma, apa sagohkeo hina hodohpeh-a chu, amani chu anilhona thatei ding ahi; amani thisan chu amani chunga chuding ahi.

¹² Chule pasal khat amounu to alupkhoma ahile, amani chu anilhona thatei ding ahi; amanin kidah umtah aboldoh lhon ahitai; amani thisan chu amani chunga chuding ahi.

¹³ Pasal khat apasal chanpi khattoh numei to lupkhom banga alup khoma ahile, amani chun kidah umtah abol lhon ahitan; amani chu thatei ding ahi: amani thisan amani chunga chuding ahi.

¹⁴ Chule pasal khatnin ajinu le ajinu nu ji-a anei kopma ahile, hichu gitlouna ahi: nalah uva gitlouna aumlouna dinga amapa le amani chu meija hala umdingu ahi.

¹⁵ Chule pasal khat gancha khattoh alupkhoma ahile, amapa chu thatei ding: chule nanghon agancha jong chu atha dingu ahi.

¹⁶Chule numei khatnin gancha khat ajotlutna, chuche tochun alupkhoma ahile, nangman numeinu le gancha chu nathatei ding ahi: amani chu thitei ding ahilhone; amani thisan chu amani chunga chuding ahi.

¹⁷ Chule pasal khatnin asopinu, apa chanu hihen anu chanu hile akichenpi-a, aman amanu sagohkeo amua, amanun amapa sagohkeo amua ahile; hichu gilouna ahi; amani chu amiteu mitmu-a paidoh-a umlhon ding ahi: amapan asopinu sagohkeo hina chu ahodoh peh ahitan; amapan akhangit louna chu akipoh ding ahi.

¹⁸ Chule pasal khatnin numei anatna neipet khat alupia, amanu sagoh hina ahodoh peh-a ahile; amapan amanu twinah ahodoh peh ahin, amanun athisan twinah chu ahodoh ahitai: chule amani chu anilhona amiteu lah-a kona paidoh-a umlhon ding ahi.

¹⁹ Nangman nanu sopinu ahin, napa sopinu hile asagokeo hina naho dohpeh louding ahi: ajeh chu amapan akinaipi a-insungmi ahodoh ahi: amanin achonset nalhon akipoh lhonding ahi.

²⁰Chule pasal khatnin apa-ngahpa jinu alupkhom pia ahile, aman apa-ngahpa sagohkeo hina chu ahodohpeh ahitan: amanin achonset nalhon akipoh lhonding, chabeija thilhon ding ahi.

²¹ Chule pasal khatnin asopipa jinu akipuija ahile, hichu thilthenglou ahin: aman asopipa sagohkeo hina ahodohpeh ahi; amani chabeija umlhon ding ahi.

²²Hijeh-a chu keiman nangho kahin puilut nadingu gam chun nangho nalohdoh louna dingun; nanghon kachondan ho le kathutana ho nitnun lang chule bolun.

²³Chule nangho masanga keiman kakaidoh nam chondan bangin chonhih-un: ajeh chu amahon hitiho jouse hi anabolun, hijeh-a chu keiman amaho chu kahot ahi.

²⁴Ahinla keiman nangho henga, Nanghon amaho gam chu nalo diu, chule hiche bongnoi le khoiju lona gam chu nalo diuva kapeh ding nahiuve, kati ahi. Keima nangho namdang ho-a kona khendoh-a Pakai Pathen chu kahi.

²⁵Hijeh-a chu nanghon satheng le saboh, vacha boh le atheng nakhen dingu ahi: chule sa hile vacha hile chule tolla kitholtho ho hijongle keiman nangho-a kona athenglou ahi tia kakhendoh ho-a kona chu nahinnao thet umtah nasolou dingu ahi.

²⁶Chule nangho keima dinga atheng nahi dingu ahi: ijeh-inem itile Pakai keima hi atheng kahin, chule keima-a tum hidinga nanghohi midang ho-a kona kakhen doh nahiuve.

²⁷Pasal hihen numei hile, lhakou ahiloule doithem hia chu thonlouva thading ahi: amahon amaho chu songa asediu ahi: amaho thisan chu amaho chung mama-a chuding ahi.