Read Thado Chin Thempudan 21 Bible Online

Thempudan 21 - Thado Chin bible

Thempudan 21

¹Chuin Pakaiyin Mosi henga, Aaron chapate thempuho henga hitihin seijin, Koimacha amite lah-a mithiho jeh-a kisuboh louding ahi:

²Ahin a-insungmi amato kinai, anu-a ding, apa-a ding, achapa-a ding, achanu-a ding, chule asopipa-a ding,

³Chule asopinu nungah theng, ama to kinaija um, jinei loulaija ding; hichenga dinga vanghi kisuboh thei ahi.

⁴Ahinla amite lah-a aluchangpen ahi jeh-in, athenlou nadinga ama le ama kisuboh louding ahi.

⁵ Amahon aluchangu avotol loudingu, abengmulu mongjong avoset lou dingu, chule atahsao jong a-atpop loudiu ahi.

⁶Amaho chu a-Pathen'uva ding atheng hidiu, chule a-Pathen'u min jong asuhboh loudiu ahi. Ajeh amahon meija kisem Pakai henga thilto le a-Pathen'u changlhah chu atojiu ahi: hijeh-a chu amaho atheng hidingu ahi.

⁷Amahon ji dinga noti ahiloule athenglou chu akipui loudiu; chule ajipan adasa numei jong akipui lou dingu ahi: ajehchu amapa chu a-Pathen'a dinga atheng hija ahi.

⁸Nangman hijeh-a chu amachu nasuhtheng ding ahi; ajehchu aman nangma Pathen changlhah chu atodoh ahi: amapa chu nangma dinga atheng hiding ahi: ijeh inem itile nangma suthenga Pakai keima atheng kahi.

⁹Chule thempu khat penpen chanu chu noti'a apana amale ama akisuhboh-a ahile, apa asuhboh ahin: amanu chu meija halding ahi.

¹⁰Chule asopite lah-a thempu chungnunga pang, alua thao kinu, thempu vonho von dinga kisuthenga chun, alu ahodoh louding, aponho jong abokeh louding;

¹¹Thilong kiti tapou anailut louding, apa-a ding le anu-a dinga jong kisuboh louding;

¹²Munthenga kona jong potdoh louding, a-Pathen muntheng jong asuhboh louding ahi; ijeh inem itile a-Pathen thao kinu lallukhuh chu achunga um ahi: Keima Pakai chu kahi.

¹³Chule aman ajinu chu nungah theng ahi petna akipui ding ahi.

¹⁴Meithai, akidasa numei, akisubohsa, ahiloule noti, hicheho hi akipui louding ahi; amavang amite lah-a kona nungah theng khat akipui ding ahi.

¹⁵Amite lah-a jong achilhah asuhboh louding ahi; ajehchu Pakai keiman ama kasuhtheng ahi.

¹⁶Chule Pakaiyin Mosi henga aseijin, hitin ati,

¹⁷Aaron henga hitin seijin, Nakhang sunguva nachilhah hou lah-a nolna nei poupou chun, a-Pathen changlhah toh dingin galut dahen.

¹⁸Koi hile nolna neichan chu lut louding ahi: amitcho, a-elbai, anahkui soi, ahiloule atichunga aval nei,

¹⁹Pasal akengbong, ahilouleh akhutbong,

²⁰Atingbong, mineo, ahiloule amitna nolna um, tipat, tibol, ahiloule atilchangkeh hijongle;

²¹Aaron chilhah ho nolna nei koimachan Pakai henga dinga meija kisem thilto toh dinga hungnailut lou dingu ahi: aman achunga nolna anei ahi: a-Pathen changlhah tohdinga hungnailut lou ding ahi.

²²Aman a-Pathen changlhah athengpen le atheng chu ania anehthei ding ahi.

²³Aman nolna khat aneijeh-a chu keima muntheng aman asuhboh louna dinga, ama pondal sunga chu lutlou ding, maicham naija jong hunglut lou ding ahi: ajehchu Pakai keiman amaho kasuhtheng ahi.

²⁴Chuin Mosi'n hichehi Aaron le achapate chule Israel chate jouse henga aseipeh tan ahi.