Read Thado Chin Thempudan 22 Bible Online

Thempudan 22 - Thado Chin bible

Thempudan 22

¹Pakaiyin Mosi henga aseijin, hitin ati,

²Aaron le achapate henga chun amaho Israel chate thil thengho-a kona akikang seova, chule keima henga amahon athensosao hiche thilho-a chu keima mintheng asuhboh louna dingun seipeh-in: Keima Pakai chu kahi.

³Amaho henga hitihin seijin, Koi hijongle nakhanggui jouseuva nachilhah jouse lah-a kon achunga thenlouna aumpetna Israel chaten Pakai henga akatdoh-u thilthengho henga galutna chu, amachu keima angsunga kona kipaidoh ding ahi: Keima Pakai chu kahi.

⁴Aaron chilhahte lah-a kon koitobang miphah hihen lang, ahiloule thilong hijongle, akisuhtheng kahse-a thil thengho lah-a kona imacha aneh louding ahi. Chule koi hile thilonga kona kisuboh thilkhat tongkha-a, ahiloule ama-a kona abotwi chedoh-a chu,

⁵Ahiloule akisuhbohna thei ding akitholtho, ahiloule thenlouna akilahson nathei mi, itobang thenlouna nei hijongle;

⁶Chutobang khattou tongkha tapou chu nilhah tokah-a thenglouva umding, chule aman atahsa twija asop masangse-a thil thengho lah-a kona imacha aneh louding ahi.

⁷Chule nisa ahung lhumteng, ama theng ding ahitan, chujou tengle thiltheng lah-a kona chu anehding ahitai: ajehchu hichu ama an ahi.

⁸Akisuhboh nadinga achama thia ham, san apelih ham chu aneh louding ahi: keima Pakai chu kahi.

⁹Hijeh-a chu amahon kachondanho anit dingu ahi, achuti louva ahile hiche chonsetna chu apoh uva, hichu asuhboh uva ahile thi dingu ahi: keima Pakai amaho suthenga chu kahi.

¹⁰Gamdang mi kiti tapouvin thiltheng chu aneh louding ahi: thempute henga khopem hihen, soh thalah hijongle thiltheng chu aneh theilou ding ahi.

¹¹Ahinla thempu chun asuma mikhat achoh-a ahile, amapa chun hichu anehding, chule a-insunga penga jong chun: amahon ama anneh chu anehthei dingu ahi.

¹²Thempu chanu khattou gamdang mi toh akichena ahile, amanun thiltheng kitoh ho lah-a kona chu ima anehthei louding ahi.

¹³Ahinla thempu chanu chu meithai ahiloule akida ahia, chabei ahia, chule anungah lai banga apa insunga umdinga ahung nungkih ahile, amanun apa anneh chu aneh teiding ahi: amavang gamdang min hichu aneh louding ahi.

¹⁴Chule pasal khattouvin hetlouva thiltheng lah-a kona ima aneh-a ahile, aman thiltheng chu thempu henga aledit kitding, hopnga-a hopkhat apehbe ding ahi.

¹⁵Chule amahon, Israel chateho thiltheng ho, Pakai anga ato houchu asuhboh lou dingu;

¹⁶Ahiloule athiltheng houchu aneh tengule suhkhelna khangitlouna chu apohsah lou dingu ahi: ajehchu keiman amaho suthenga Pakai chu ahi.

¹⁷Chuin Pakaiyin Mosi henga aseijin, hitin ati,

¹⁸Aaron heng le achapate heng, chule Israel chate jouse henga hitihin seijin, Israel insunga kona hihen, Israel lah-a um gamdang mi hijongle, koitobang akitepna khattouva dinga ganlhaina, ahiloule lungcham thilto-a dinga Pakai henga govam thilto tohding auma ahile,

¹⁹Nanghon nalungcham tah uva bongho, kelngoiho, ahiloule kelcha ho-a kona nolna beihel achal napeh dingu ahi.

²⁰ Ahinla nolna neitapou chu natolou dingu ahi: ajehchu hichu nangho-a dinga kisanpeh louding ahi.

²¹Koi hijongle akitepna suhbulhit nading ham, ahiloule lungcham thilto dinga bong ham, ahiloule kelngoi hama Pakai henga chamna thilto ganlhaina toh chan chun, athilto chu sanpeh ahina dinga ahoi chamkim atoding ahi: achunga chu nolna imacha umlou ding ahi.

²²Mitcho, kengbong, atipat, tahsa-a apomdoh nei, tina-a kon anai long, ahiloule tipat tapou chu nanghon Pakai henga nato lou diu, chule Pakaiya dinga maicham chunga meija kisem thilto-a nato lou dingu ahi.

²³Bongchal ahiloule kelngoinou atahsa tibah-a aval, ahiloule alhasam auma ahile, nangman hichu lungcham thilto-a nato thei ahi: ahinla kitepna-a dinga vang hichu kisang louding ahi.

²⁴Nangman gancha atilchang kisuhchip, kitatkeh, kisukeh, le ki-atkeh kiti tapou chu Pakai henga nato louding ahi; chule hitobang ho-a chu nagamsunga jong thilto imacha nabol lou dingu ahi.

²⁵Gamdang mi khutna kona hicheho chu na-Pathen changlhah hidinga nato louding ahi: ajeh chu amaho-a bohna aumin, chule amaho-a nolna aumin ahi: hicheho chu nangho dinga kisanpeh louding ahiuve.

²⁶Chuin Pakaiyin Mosi henga aseijin, hitin ati,

²⁷Bongchal ham, kelngoi ham, ahiloule kelcha ham ahung so tengle amachu ni sagi api toh umkhom ding ahi: chule niget channi-a patna Pakai henga meija kisem thilto-a dinga kisang ding ahitai.

²⁸Chule bongpi hihen kelngoipi hile, anouho toh nikhat sunga nathalou diu ahi.

²⁹Chule nanghon Pakai henga thangvahna ganlhaina nato tengule, nalungcham tah uva nato dingu ahi.

³⁰Anikho mama-a chu hiche chu nehjou keiding ahi: ajing geija dinga imacha khenlou ding ahi: keima Pakai chu kahi.

³¹Hijeh chun nanghon kathupeh ho nanit uva, chule hicheho chu nabol dingu ahi: keima Pakai chu kahi.

³²Chule nanghon ka mintheng jong nasuhboh loudiu; amavang Israel chate lah-a keima suhthenga kaumding ahi: keima nangho suthenga Pakai chu kahin,

³³Egypt gama kona na-Pathen'u hidinga hinpui dohpa chu kahi: Keima Pakai chu kahi.