Read Thado Chin Thempudan 23 Bible Online

Thempudan 23 - Thado Chin bible

Thempudan 23

¹Pakaiyin Mosi henga aseijin, hitin ati,

²Israel chate henga thu seijin lang, ajah uva hitin seijin, Pakai kut ho thudola, nanghon kikhoppi theng ahi tia naphondoh dinghou chu, hichehohi keima kut ho chu ahi.

³ Nigup sunga na kitong ding ahin: nisagi ni vang chu cholngah ni ahin, kikhoppi theng ahi; hiche nikho-a hi natoh imacha natoh lou dingu ahi: hiche hi nachen namun jouseuva Pakai cholngah ni ahi.

⁴Hiche hohi aphat ahunglhun dungjuija nanghon naphon lediu Pakai Kut ho, kikhoppi thengho chu ahi.

⁵ Lha masapen nisom le nili nilhah chu Pakai kalchuh Kut ahi.

⁶ Chuche lha mama nisom le ninga ni chu Pakai dinga cholsolou changlhah Kut ahi. Nisagi cholsolou changlhah naneh diu ahi.

⁷Nimasa pen nile nanghon kikhoppi theng khat nanei diu, chule hiche sunga chu natoh imacha natohlou dingu ahi.

⁸Ahinla nisagi sunga chu Pakai henga meija kisem thilto nato dingu ahi: nisagi ni chu kikhoppi theng ahin, nanghon hiche sunga chu natoh imacha natohlou dingu ahi.

⁹Chuin Pakaiyin Mosi henga aseijin, hitin ati,

¹⁰Israel chate henga hitin seijin, Keiman nangho kapehnao gamsunga nahung lutnuva, chule aga na-at tengule, nanghon nachang-at doh-u aga masapen ho phalkhat chu thempu henga nahin choi dingu ahi.

¹¹Chule aman nangho dinga santhei ahina dinga aphal chu Pakai anga ajap ding: cholngahni jou ajing le thempu chun ajap ding ahi.

¹²Chule nanghon aphal najap niu chule, Pakai henga govam thilto-a dinga kumkhat lhingset nolnabei kelngoi nou achal khat nahin kai dingu ahi.

¹³Chuche-a dinga anneh thilto chu thao toh kihal changbong neljet ephah hopsom-a hopni, Pakai henga gimnamtui hidinga meija kisem thilto hiding: chule adonding thilto chu lengpitwi hin khat hoplia khat hiding ahi.

¹⁴Chule nanghon na-Pathen'u henga thilto nahinchoi nikhou mamachu ahunglhun masanga, changlhah hile, kanpoh hile, changvui hile naneh loudiu ahi. Hichehi nachen namun jouseova a-itih-a nakhang khanguva chondana naman diu ahi.

¹⁵ Nanghon cholngah ni jou ajinga pat, jap thilto-a dinga changhal nahinchoi niuva pat nasim dingu; choldoni sagi nasuhlhing diu ahi:

¹⁶Cholngah sagina jou ajinga pat nisom nga-a nasim uva; Pakai henga anneh thilto thah nato diu ahi.

¹⁷Nanghon nachen namun houva kona ephah hopsom-a hopni-a kisem japtho changlhah lumni nahin choidiu; hichu changbong neljetna kon hiding, chol toh kikantha ding; hichu Pakai henga dinga ga masaho ahiuve.

¹⁸Chule nanghon changlhah chutoh kumkhat lhingbep nolnabei kelngoinou sagi, bongchalnou khat, chule kelngoichal ni natotha diu; hicheho chu Pakai henga govam thilto le a-anneh thiltoho, adon thilto ho, Pakai henga gimnamtui hidinga meija kisem thito ding ahi.

¹⁹Chujouteng nanghon chonset thilto-a dinga kelchaho noukhat natodiu, chule chamna thilto-a dinga kumkhat lhingbep kelngoinou ni natodiu ahi.

²⁰Chule thempupa chun hicheho chu gamasaho changlhah le kelngoinou ni chutoh Pakai henga jap thilto hiding ajapding: hichu Pakaiya dinga atheng thempupa kipe chu ahi.

²¹Chule nanghon chuche nikho mama chule, hichu nangho dinga kikhoppi theng ahi tia naphondoh diu: hiche sunga chu nanghon natoh imacha natoh lou dingu ahi. Hichehi nachen namun jouseuva nakhang khanguva a-itih-a dinga chondan hiding ahi.

²² Chule nanghon nagam gao na-at tengule, na-atpet nuva chu naloulai ninghou na-at ngimsel loudiu, na-at naova alhajah jong nachom khom loudiu ahi: hicheho chu vaichate le gamdang mi dinga nakhenpeh dingu ahi: keima Pakai na-Pathen'u chu kahi.

²³Chuin Pakaiyin Mosi henga aseijin, hitin ati,

²⁴Israel chate henga hitihin seijin, lhasagi channa nikho masapen nileh nanghon choldona nanitdiu, sumkon mut hetjingna kikhoppi theng naman dingu ahi.

²⁵Hiche sunga chu nanghon natoh imacha natohlou dingu; amavang nanghon Pakai henga meija kisem thilto nato dingu ahi.

²⁶ Chuin Pakaiyin Mosi henga aseijin, hitin ati,

²⁷Hiche lhasagi channa nisom lhin ni chu longlhenna nikho hiding: hichu nangho dinga kikhoppi theng hiding; chule nanghon nahinnao nasuh gimuva, Pakai henga meija kisem thilto nato dingu ahi.

²⁸Hiche ni-a chu nanghon natoh kiti natohlou diu ahi: ajehchu hichu longlhenna nikho ahin, Pakai na-Pathen'u anga nangho ding longlhenna kibol nikho ahi.

²⁹Ijeh inem itile koihile hiche nikho-a ngeija ahinna suhgim lou chu, amachu amite lah-a kona paidoh-a umding ahi.

³⁰Chule koihile hiche nikho ngeija natoh khattou tonga chu, amachu amite lah-a kona keiman kasuhmang ding ahi.

³¹Nanghon itobang natoh hile natoh louhel dingu ahi: hichehi nachen namun jouseova nakhang khanguva a-itih-a ding chondan hiding ahi.

³²Hichehi nangho dinga cholngahna choldoni hiding, chule nanghon nahinnao nasuh gim dingu ahi: hiche lha niko ni nilhah-a pat ajing nilhah geija nangho cholngahni nanitdiu ahi.

³³ Chuin Pakaiyin Mosi henga aseijin, hitin ati,

³⁴Israel chate henga hitihin seipeh-in, hiche lhasagi channa nisom le ni ngani hi Pakai henga nisagi sung Houbuh Kut hiding ahi.

³⁵Ani masapen nikho-a chu kikhoppi theng umding: hiche sunga chu natoh imacha natoh loudiu ahi.

³⁶Nanghon nisagi sung Pakai henga meija kisem thilto nato diu: nigetni chu nangho dinga kikhoppi theng hiding; Pakai henga meija kisem thilto nato diu ahi; hichehi kipun khomna loupitah ahin; chule hiche sunga hi nangho koimachan na natoh loudiu ahi.

³⁷Hichehohi Pakaiya ding kut ho, Pakai henga meija kisem thilto, govam thilto, anneh thilto, ganlhaina, don thilto anikho dungjuijuva tona dinga kikhoppi theng ahi tia naphondoh dinghou:

³⁸Pakai cholngah niho, na thiltohou, na kitepnahou jouse, chule na lungcham thiltohou, Pakai henga napeh hou simlouva mandingho chu ahi.

³⁹Chujongle lhasagi channa nisom le ninga ni, nanghon nagam gahou nakhop khom tengule, nanghon Pakaiya dinga kut nisagi naman diu ahi; animasa pen ni chu cholngahni hiding, chule nigetni jong chu cholngahni hiding ahi.

⁴⁰Chule nimasa pen nile nanghon thingpha gaho, lusu doho, thingdo aboh phaho boh, vachadung panga keh huisum ho nalah diu, chule Pakai anga nisagi nakipa thanop diu ahi.

⁴¹Chule hiche hi Pakai dinga kut tia kum khat sunga nisagi naman diu ahi. Hichehi nakhang khanguva dinga a-itih-a chondan kipe-a chu ahi: hichehi nanghon lhasagi channa sunga nanit jingdiu ahi.

⁴²Nangho nisagi lhambuh sunga nachendiu; Israel chate apeng jouse lhambuh-a cheng dingu ahi.

⁴³Chutia chu nakhang khanguva nanghon Israel chate Egypt gama kona kahinpuidoh chun amaho lhambuh-a kana chensah-e ti nahet themna diu ahi: keima Pakai na Pathen'u chu kahi.

⁴⁴Chuin Mosi'n Israel chate henga Pakai kut ho chu aphongdoh tan ahi.