Read Thado Chin Thempudan 24 Bible Online

Thempudan 24 - Thado Chin bible

Thempudan 24

¹Chuin Pakaiyin Mosi henga aseijin, hitin ati;

²Israel chate henga meivah ho avah jomjing theina dingin, vahding monga kiheh Olive thao thengseh chu nahenga ahin choina diuvin thupeh neijin.

³Hichu Aaron nin Pakai anga nilhah-a pat jingkah geija tanglouva hettohsahna pondal pamlam, houkhom ho houbuh sunga agoltoh ding ahi; hiche hi nakhang khanguva a-itih-a dinga nachondanu hiding ahi.

⁴Aman Pakai angsunga meivah khom theng chunga meivah ho chu tanglouva agoltoh ding ahi.

⁵ Chule nangman changbong neljet nalah-a, hichea kona chu changlhah lum somleni nasemding, lumkhat khatna ephah hopsom-a hopni nalutsah cheh ding ahi.

⁶Chule hicheho chu Pakai angsung dokhang theng chunga nangman golkhatna gup cheh-a golnia nagol ding ahi.

⁷Chule hetjingna changlhah, Pakai henga meija kisem thilto hidinga nangman agolni chunga chu bego thengsel nakoi ding ahi.

⁸Atonsot kitepna-a dinga Israel chate-a kona kila ahito lhona, cholngahni sehle aman hiche chu tanglouva Pakai anga phatecha agontup jing ding ahi.

⁹ Chule hiche chu Aaron le achapatea hiding, amahon hichu munthenga aneh diu ahi; ajeh chu a-itih-a chondan hijing dinga Pakaiya dinga meija kisem thilto chu ama dinga thengtah hija ahi.

¹⁰Chule Israel numei khat chapa, apa chu Egypt mi ahin, ama chu Israel chate lah-a achedoh-in: hiche Israel numeinu chapa leh Israel mi khat gebuh sunga akidel lhonin;

¹¹Chuin Israel numeinu chapa chun Pakai min chu ataitomin, agaosap tan ahi. Chuin amahon amapa chu Mosi henga ahin puijuvin: (anu min chu Shelomith, Debri chanu, Dan phunga kon ahi).

¹²Amahon Pakai lunggel amaho henga vetsah-a aum theina din, amapa chu vetsuijin akoijuve.

¹³Chuin Pakaiyin Mosi henga aseijin, hitin ati,

¹⁴Agaosap mipa chu gebuh pama puidoh-in; chule athusei jaho jouse chun alujang chunga chun akhutnu ngamuhen, chule houkhom ho jouse chun songin sepmuhen.

¹⁵Chule Israel chate henga chu, Koi hile a-Pathen gaosap chan chun achonset akipoh ding ahi, tia naseipeh ding ahi.

¹⁶Chule Pakai min taitompa chu thonlouva thatei ding ahin, chule houkhom ho jousen amachu songa ase dingu ahi: gamdangmi jong chu agam sunga pengpa banga Pakai min ataitoma ahile thading ahi.

¹⁷ Chule koi hile mithat tapou chu thonlouva thatei ding ahi.

¹⁸Chule koihile gancha thatna chun, gan chu gan'a aditding ahi.

¹⁹Chule khattouvin aheng akom chunga nolna khat achuhsah-a ahile, aman abol tobang banga chu ama chunga kibol ding ahi.

²⁰ Gubong chu gubonga, mit chu mitna, ha chu ha-a; aman mikhat chunga nolna asosah banga ama chunga jong kisosah kitding ahi.

²¹Chule gancha thatna chun, adit ding; chule mihem thatna vang chu, ama thatei ding ahi.

²² Nanghon gamdang mi-a ding ahin, nagam mihou khatna ding ahin, dan khatbou naneidiu ahi. Ajehchu keima Pakai na-Pathen'u chu kahi, ati.

²³Chuin Mosi'n Israel chate henga, amahon agaosap pa chu gebuh pama ahinpuidoh uva, chule ama chu songa ase diuvin aseipehtai. Chule Israel chaten Pakaiyin Mosi athupeh bang chun abol taovin ahi.