Read Thado Chin Thempudan 25 Bible Online

Thempudan 25 - Thado Chin bible

Thempudan 25

¹ Chuin Pakaiyin Sinai molsanga Mosi henga thu aseijin, hitin ati.

²Israel chate henga thu seijin lang, ajah uva hitin seijin, Nangho keiman kapeh-u gam nahunglut tengule, agam pumpin Pakai henga cholngahni anitding ahi.

³Nangman kumgup nalouva muchi natuding, chule kum gup nalengpilei nalhongim ding ahi, chule aga naki chopkhom ding,

⁴Ahinla kum sagi lhinkum chu agam pumpi dinga cholngahna, Pakaiya dinga cholngah hiding ahi. Nangman nalouva muchi natulou ding, nalengpilei nalhongim louding ahi.

⁵Nangman nachang atna nunga changson chu na-at louding, nalengpigui malngim lou ga jong nalokhom louding ahi; ajehchu agam pumpi dinga cholngah kum ahi.

⁶Chule gam pumpi cholngah kum-a achama hung kehdohho chu nangho dinga anneh hiding; nangma-a ding, nasohnu-a ding, nasoh thalah-a ding, chule nangma toh khopem khom gamdangmi-a ding,

⁷Chule nagancha-a ding, chule nagamsunguva um saho-a dinga, chua kona hung gadoh jouse chu nangho anneh hiding ahi.

⁸Chule nangman cholngah kum sagi nakisim ding, kum sagi sagivei; chule cholngah kumho kikah sungse chu nangma dinga kum somli le kumko hiding ahi.

⁹Chuteng lhasagi channa nisom lhinni le nangman Jubilee sumkon namutging sah ding, longlhenna nikhoteng sumkon chu nagam pumpiu sunga namut ging sah ding ahi.

¹⁰Chule nanghon kum somnga kum chu nathenso diu, chule gamsung pumpi sunga chengho jouse henga chamlhatna naphondoh dingu ahi. Hichu nangho dinga Jubilee hiding; mitinin ama ama neilegou akinungmu kitding, chule mitin a-insung mite henga kile kitding ahi.

¹¹Kum somnga channa chu nangho dinga Jubilee hiding: nanghon natuloudiu, chua kona achama hung khangdoh jong na-at loudiu, chom ngimlou nalengpi leija kona lengpi ga hojong nalokhom louding ahi.

¹²Ajehchu Jubilee ahin; nangho dinga atheng hiding ahi: nanghon gamsunga kona achama hung kehdoh hochu naneh dingu ahi.

¹³Hiche Jubilee kum-a hi mitin ama ama neilegou nalepeh dingu ahi.

¹⁴Chule nangman naheng nakom henga thilkhat tou najoh-a, ahiloule naheng nakom khutna kona thilkhat tou nachoh-a ahile, nangho khatle khat naki suhgentheito lou dingu ahi.

¹⁵Jubilee jou kum jat dungjuija nangman naheng nakoma kona nachoh ding, chule aga kum jat dungjuija nangman ama henga ajoh ding ahi.

¹⁶Akumho atam dungjuija nangman chuche man chu nakalsah ding, chule akum alhom dungjuija chuche man chu nasuhlhom ding; ajehchu aga na kumho dungjuija aman nangma henga ajoh ahi.

¹⁷Hijeh-a chu nangho khat le khat nakisuh gentheito loudiu; amavang Pathen nagin joh dingu ahi: ajehchu keima Pakai na Pathen'u chu kahi.

¹⁸Hiche jeh-a chu nanghon kachondan ho najuijuva, kathu tanho nanit uva, natoh dingu ahi; chutile nangho gamsunga bitkeija nachen dingu ahi.

¹⁹Chuteng gamchun aga ahinso sah-a, nanghon vasetna nanehdiu, chule asunga chu bitkeija nachen dingu ahi.

²⁰Chule nanghon, Veuvin, keihon tujong katu daova, agaho jong kalokhom daova ahile, Kum sagi lhinna-a chu ipi kanehdiu ham? nati uva ahile,

²¹Chuteng keiman kum gup channa-a chu kavangbohna nachung uva kathupeh ding, chule hichun kumthum sung ding ga asodoh ding ahi.

²²Chutia chu nanghon kum get channa le muchi natu dingu, ahivanga kumko channa geija aga lui chu naneh dingu; aga ahung lhun kahse-a nanghon alui kikhola kona chu naneh dingu ahi.

²³Gam chu a-itih-a dinga johdoh louding ahi: ajehchu gamchu keija ahibouve; chule nangho hi keima koma gamdangmi le hungkhopem nahibou uve.

²⁴Chule nanghon nalonao gamsung jouse-a chu, gam kilhatdoh hi naphal dingu ahi.

²⁵Nasopipa chu hung vaicha lheh tah-a, chule aman aneilegou phabep chu ajohdoh-a, akinaipi a-insungmi khat chuche lhatdoh dinga ahunga ahile, ama chun asopipan ajoh chu alhatdoh ding ahi.

²⁶Chule mipa chun koimacha alhatdoh ding nei hih-a, chule ama tah-in alhatdoh jouding ahi tahle,

²⁷Chuteng aman anei alahkit theina dingin, ajoh dohna kumho kisim henlang, aval chu ajoh napa henga lepehkit hen.

²⁸Ahinla aman amapa henga chu alepeh joulou tah-a ahile, athil kijohdoh chu amapa khutna Jubilee kum ahikahsea umden ding ahi: chule Jubilee teng hiche lahdohna hung umding, chule amapa chun anei ahinle neikit ding ahi.

²⁹Chule mikhatnin kulbang kikai khum khopi sunga um chenna in khat ajoh-a ahile, aman hichu ajohdoh jou kumkhat guilhungset sunga akilhatdoh thei ding; kum khat lhingset sunga aman alhatdoh thei ding ahi.

³⁰Ahinla hichu kum khat lhingset sunga akilhatdoh tahlouva ahile, kulbang kikai khum khopi sunga in chu akhang khanga achopa-a dinga kiphutdet ding: chule Jubilee teng jongle pehdoh louding ahitai.

³¹Ahinla kulbangin akolkhumlou khoneo ho-a um inho vangchu gamsunga um louho dana kisimding: hicheho chu lhatdoh thei hiding, chule Jubilee tengle pehdoh hiding ahi.

³²Hijeng jongle Levi mite khopiho le agoulou khopiho-a inho vangchu, Levi miten itih phat hijongle alhatdoh theiju ahi.

³³Chule mikhatnin Levi miho-a kona thilkhat achoh-a ahile, agou lona khopi-a akijohdoh in chu Jubilee kum tengle pehdoh hiding ahi. Ijeh inem itile Levi phungho khopi ho-a in ho chu Israel chate lah-a amahon aneiju chu ahi.

³⁴Ahinla akhopiu pamho-a um louho chu kijoh theilou ding ahi; ajeh chu hichu a-itih-a dinga amaho gouchan ahi.

³⁵ Chule nasopipa chu ahung vaicha tah-a, chule nalah uva chu vaichatna alhuhlhah tah-a ahile, nangman amachu nakithopi ding ahi: henge, gamdangmi le khopem banga nangma koma nachen sah ding ahi.

³⁶Ama-a konin nangman akan ahiloule apung lahih-in: nasopipa chu nangma toh achenkhom theina dingin, na Pathen gingin.

³⁷ Nangman nasum chu akan dinga napeh louding; naneh nachah jong apung dinga napeh louding ahi.

³⁸Canaan gam peh dingle na-Pathen'u hidinga, Egypt gama kona nahin puidohpao Pakai na-Pathen'u chu kahi.

³⁹ Chule nakoma cheng nasopi khat chu ahung vaichatna, nangma henga ahung kijoh-a ahile; nangman ama chu soh banga na natohsah louding:

⁴⁰Amavang soh thalah bang le khopem banga nahenga umding, Jubilee kum geija nangma najen ding ahi.

⁴¹Chujouteng aman nanga kona potdoh ding, ama le aumpi achate abonuva, chule a-insung mite henga kinungle kitnuva, apu apate goulona gama chu kile kitding ahi.

⁴²Ijeh inem itile amahohi Egypt gama kona kahin puidoh keima sohte ahiuve: amaho soh-a kijoh lou dingu ahi.

⁴³Nangma ama chunga hunam tah-a navaihom louding; amavang na-Pathen nagin johding ahi.

⁴⁴Soh pasal le soh numei nanghon naneikop dinghou chu, nakimvel uva um Pathen houlou ho hidiu ahi: amaho lah-a kona nanghon soh pasal le soh numei nakichoh dingu ahi.

⁴⁵Chujongle nalah uva khopem gamdangmi chateho-a kona le, nagam sunguva peng nangho toh umkhom amaho insung mite chu nachoh theiju ahi: chule amaho chu nangho neilegou hiding ahiuve.

⁴⁶Chule amaho chu nangho nunga nachateo goulo dinga, nei le gou alo diuva nalah dingu ahi; amaho chu a-itih-a nangho soh hiding ahiuve: ahinla nasopiten Israel chate chunga vang, nangho khatnin khat chunga hunam tah-a navai homlou dingu ahi.

⁴⁷Chule nakoma khopemho le gamdangmi khat chu ahung haodoh-a, chule ama koma cheng nasopipa chu ahung vaichatna, chule nakoma um gamdangmi ahiloule khopempa heng, ahiloule gamsungmi khat henga ahung kijoh tah-a ahile;

⁴⁸Ama chu akijoh jouteng lhatdoh kit thei hiding ahi; asopite ho lah-a khatnin ama alhatdoh thei ahi.

⁴⁹Apa-ngahpa ahiloule apa-ngahpa chapa chun ama alhatdoh theiding ahin, ahiloule ama insungmi akinaipi khatnin alhatdoh thei; ahiloule ajo lhangle ama le ama akilhatdoh thei ahi.

⁵⁰Chule aman ama chapa chu ama akichohna kum-apat Jubilee kum gei dinga chu akihoupi ding ahi: chule ama akijohdohna manchu akum kisim dungjuija, amatoh ana umkhom soh thalah khat phat dungjuija kitepding ahi.

⁵¹Kum tamtah aum nahlaija ahile, hicheho dungjuija chu akilhatdohna man chu akichohna suma kona apehding ahi.

⁵²Chule Jubilee kum lhinna ding chu kum phabep bou avatna ahile, ama amapa toh asimding, akumho dungjuija chu akilhatdohna man chu apeh ding ahi.

⁵³Akum kum-a soh thalah banga amapa chuto umding: chule akhatpa chun nangma angsunga ama chunga chu hunam tah-a vai ahomlou ding ahi.

⁵⁴Chule hiche kumho sunga hi ama lhatdoh-a aumlouva ahile, Jubilee kum tengle potdoh ding, ama le aumpi achate chu potdoh ding ahiuve.

⁵⁵Ajeh chu Israel chate chu keima dingin kasohte ahiuvin; Egypt gama kona kahin puidoh kasohte ahiuve: keima Pakai na Pathen'u chu kahi.