Read Thado Chin Thempudan 26 Bible Online

Thempudan 26 - Thado Chin bible

Thempudan 26

¹ Nanghon nangho semthu lim, ahiloule khenthu lim nakisem loudiu, lim kituntho jong natundoh loudiu, songa kisem limpou pou jong a-anga kun nadinga naphudoh lou dingu ahi: ajehchu keima Pakai na-Pathen'u chu kahi.

²Nanghon kacholngah nikhoho nanit uva, kamun theng najaboldiu ahi: keima Pakai chu kahi.

³ Nanghon kachondan ho-a nachon uva, kathupeh ho nanit uva, chule nabol uva ahile;

⁴Keiman nangho aphatcha gotwi kapeh diu, chule gamsung chun aga ahinsodoh ding, loujaova thingphung hon jong agau ahin sepdoh dingu ahi.

⁵Chule nachang voh-u chu lengpigui lokhomto kikaimatna, nalengpiga lokhomu chu muchi lhah phattoh kikaimat ding: nanghon na annu vasetna naneh uva, chule nagam sunguva bitkeija nachen diu ahi.

⁶Chule keiman gamsunga chamna kalensah-a, chule nalup uva, koimachan nasuh kichat lou dingu ahi: chule gamsunga kona gamsa gilouho chu kano manga, chemjam minjong na gamsungu apal louding ahi.

⁷Chule nanghon namelma teo nadel uva, amaho nangho masanga chemjam'a loudingu ahi.

⁸Nalah uva mi nga-in jakhat nadel uva, mi jakhat nin sangsom nadel jamdiu: namelma teu chu namasanguva chemjam'a loudingu ahi.

⁹Ajehchu keiman nangho kajabol uva, kaphat theisah dingu, chule kapunsah uva, nangho to kakitepna naphudoh ding ahi.

¹⁰Chule nanghon akikhol chu naneh uva, athah jeh-a aluichu nahin pohdoh dingu ahi.

¹¹Chule keiman ka houbuh nalah uva katundoh ding: kahinnan nangho ahot louding ahi.

¹² Keima nalah uva kache le-a, na Pathen'u kahiding, chule nangho kamite nahi dingu ahi.

¹³Nanghon amaho soh nahilou na dinguva, Egypt gama kona nangho hinpui dohpa Pakai na-Pathen'u chu kahi; chule keiman nanamkol jon khaovu kasuhtana, dingjanga kachesah nahitaove.

¹⁴Ahinla, nanghon kathu nangailou uva, chule hiche thupeh ho jouse nabol lou uva;

¹⁵Chule kachondan ho nanah sahmo uva, nahinnaovin kathutan naho ahotbola, chutia chu kathupeh ho jouse nabol daova, kakitepna nasuhkeh uva ahile;

¹⁶Hichehi keiman jong nangho chunga kabolding ahi; namit teniu kamang ding le nalungsungu sugenthei dinga, nachung uva tijatna, khutsao le khosihpi kachuhsah ding ahi. Chule mohseh-a muchi nalhah dingu ahi, ajehchu namelmate nehding bep ahibouve.

¹⁷Chule keiman nangho douna-a kamai kangat ding, chule nangho namelma teu masanga naloudiu: nangho hinmuda hochun nachung uva vai ahomdiu; chule nangho koima del louva najam dingu ahi.

¹⁸Chule hicheho jouse jeh-a jong kathu nangailou nahlai uva ahile, nachonset jeh uva sagi vei kasuh gentheibe ding nahiuve.

¹⁹Chule nakiletsah piu nathanei nao chu kasuhkeh ding; chule navan-u chu thih, chule na leiset nu chu sum-eng kaso ding ahi.

²⁰Chuteng nathahat naochu mohjen seh-a kisumang ding ahi; ajehchu naleiset un aga asolou ding, gamsunga thingphung honjong aga aseplou dingu ahi.

²¹Chule nangho keito kikala nacheova, kathu nangailou uva ahile; nachonset nahou dungjuija chan sagi-a tam hise nachung uva kalensah ding ahi.

²²Keiman nachateo chom mang ding, nagancha hou sumang ding, chule lhomcha naso dinguva gamsaho jong kahinsol ding; chule nalam lhongpiu hou chu agohkeo hiding ahi.

²³Chule hiche ho-a jonghi nangho nakisem thah lou nahlai juva, chule keima toh kikala nachon nahlai uva ahile;

²⁴Keima jong nangho to kikala kacheding, chule nachonset nahou jeh-a sagivei kasuhgimbe ding nahiuve.

²⁵Chule keiman kakitepna nelkalna phula dinga, nachung uva chemjam kachuh sah ding ahi: chule nakhopi hou sunga nangho nakikhop khom tengule, nalah uva natset kalensah ding; chule nangho namelma teu khutna kipedoh ding nahiuve.

²⁶Chule keiman na-an neh-u hungkon dohna kasuhtan tengle, numei somin thuh khatna nachang lhah-u akandiu, chule amahon nachang lhah-u chu agih dungjuija napehdiu; nanghon naneh uva, ahivanga nava loudiu ahi.

²⁷Chule hicheho jouse jenga jonghi nanghon kathu nangailou uva, chule keima toh kikala nache nahlai juva ahile;

²⁸Chuteng keima nangho toh kikala lungsa tah-a kacheding; chule keima, keimatah-in nachonset nahou jeh-a sagivei kagimbol ding nahiuve.

²⁹Chuteng nanghon nachapateo tahsa naneh dingu, chule nachanuteu tahsa jong naneh dingu ahi.

³⁰Chule keima namun sanghou kasuhsetna, nalimsem hou kasuh boh-a, nalongu chu namilim hou long chunga kaselhah ding, chule kahinnan nangho ahotding ahi.

³¹Keiman nakhopi hou agoh-a kakoija, namun theng hou chu agohkeova kakoiding, chule nathil namtui hou nam chu kanahpeh louding nahiuve.

³²Chule keiman gamsung chu agohkeova kakoiding: chule namelma teu asunga chengho chun hichu kidang asahdiu ahi.

³³Chule keiman Pathen helouho lah-a nangho kathecheh ding, nanung uva chemjam'a kalap ding ahi: chule nagamu chu agohkeova uma, nakhopi hou chu ahomkeo hiding ahi.

³⁴Chuteng gamsung chu agohkeova aumsungse-a acholngah nikhoho amanding, chule nangho namelma teu gamsunga naum dingu ahi; chutengle gamsung chu kicholdo ding, acholngah nikhoho aman ding ahi.

³⁵Agohkeova aumlai sungse-a kicholdo ding ahi; ajehchu nangho asunga nachen laijun, cholngah nikho hon akicholdo pon ahi.

³⁶Chule nangho lah-a ahingdoh amoh chasun chunga chu, aumnao amelmateu gamsunga chu alungsunga kichatna kachuh sah ding; thingdo kilin ginin jong amaho adel ding; chule chemjam masanga jam banga jam dingu; chule koiman adellou tengu jongle amaho lhuding ahiuve.

³⁷Chule koiman adellou tengu jongle amaho chemjam masanga jam banga, khat chu khat chunga lhuding ahiuve: chule nanghon namelma teu masanga dinjou nathei tha nanei loudiu ahi.

³⁸Nangho Pathen helouho lah-a namanthah heldiu, chule namelma teu gamin nangho naneh jouhel dingu ahi.

³⁹Chule nangho lah-a ahoidoh hochun namelma teu gamsunga ana khangitlou naho anguipi diu; chule apu apateu khangitlou naho jong chu angui mangpi dingu ahi.

⁴⁰Iti hama amahon akhangit lounao le apu apateu khangitlouna, asuhkhel nao keima douna-a asuhkhelna hou, chule keima toh kikala alamlhah nahou aphondoh uva ahile;

⁴¹Chule keima jong amaho toh kikalin kanachen, chule amelmateu gamsunga kana puilut tan; ijemtia alungsung cheptan louho chu asuhnemuva, chule akhangit lounao talen chu akisanuva ahile;

⁴² Keiman Jacob to kakitepna, Isaac to kakitepna, chule Abraham to kakitepna chu kageldoh kitding; chule gamsung chu kahin geldoh ding ahi.

⁴³Gamsung jong amahon adalhah uva, gamsung chun amaho beija agohkeova aum sunga chu acholngah nikhoho aman ding: chule amahon akhangitlou naova atalen matnu chu asandiu ahi: ajehchu amahon kathu tanho anahsah loujeh uva, chule amahon keima chondan ho ahotbol jeh-u ahi.

⁴⁴Chule hiche ho jouse jeh-a hi amelmateu gamsunga aumtengule, keiman amaho kapaidoh louding, suhmanghel ding le kakitepna suhkeh nadinga kahot loudingu ahi: ajehchu keima Pakai a-Pathen'u chu kahi.

⁴⁵Hijongle keiman amaho jala hi, a-Pathen'u kahi theina dinga Pathen helouho mitmu-a Egypt gama kona kahungpuidoh aputeo apateu to kakitepna chu kageldohkit ding ahi: keima Pakai chu kahi.

⁴⁶Hicheho hi chondanho, thutan naho, danthuho, Pakaiyin amale Israel chate kah-a Sinai molsanga Mosi khutna asemchu ahi.