Read Thado Chin Thempudan 27 Bible Online

Thempudan 27 - Thado Chin bible

Thempudan 27

¹Chuin Pakaiyin Mosi henga aseijin, hitin ati,

²Israel chate henga thu seijin lang, ajah uva hitin seijin, Mikhatnin mihem khat chu Pakaiya katdoh nadinga kitepna aneija ahile, nangman nahisah sah chu hiding ahi

³Nangman nahisah ding dan chu pasal kum somni apat kum somgup upa ahile, amachu munthenga shekel dungjuija dangka somnga hiding ahi.

⁴Numei ahile nangman nahisah ding chu shekel somthum hiding ahi.

⁵Chule kum nga-a pat akum somni sung ahile, nangman pasal la chu shekel somni, chule numeija chu shekel som nahisah ding ahi.

⁶Chule lhakhat napat kum nga gei ahile, pasal ho dinga natepeh dingchu shekel nga hiding, numei hoding chu shekel thum hiding ahi.

⁷Chule kum somgup mapat chunglam ahia, pasal ahile, shekel somlenga nahisah ding, numei ahile shekel som nahisah ding ahi.

⁸Ahinla nangman nahisah sanga ama anavaichat johle, amachu amale ama thempu henga hung kipelut ding, chule thempun aman atepding ahi. Akihahselpa hijouna dungjuija, thempun aman atepding ahi.

⁹Chule Pakaiya thilto dinga ahin kaiju chu gancha ahia ahile, mitinin Pakaiya dinga ahin to jouseu chu atheng hiding ahi.

¹⁰Aman hichu akhel louding, aphalou chu apha-a jong alheh louding ahi: chule ijemtia gan chu gana alheh tah-a ahile, hiche chule alhetna chu ania atheng hiding ahi.

¹¹Chule hichu Pakai henga ganlhaina atoji louvu sathenglou ahia ahile, aman gan chu thempu anga ahin pehlut ding:

¹²Chule hichu thempun hichu apha hile ase hile aman atepding; thempu nangman aman natep jat jat chu aman hijeng ding ahi

¹³Ahinla aman hichu alhatdoh dinga ahile, nangman aman natep chunga chu nga-a khat abelap ding ahi.

¹⁴Chule mikhatnin a-in chu Pakaiya atheng hidinga asuhtheng tengle, thempun hichu apha hile ase hile aman atepding: thempun atep jatjat chu hijeng ding ahi.

¹⁵Chule a-in suthengpa chun a-in chu alhatdoh dinga ahile, nangman aman natep chunga chu nga-a khat abelap ding, chule hichu ama-a hiding ahi.

¹⁶Chule mikhatnin agoulo loumun behkhat chu Pakai henga asuhtheng tah-a ahile, aman dingchu chuche-a muchi kilhah dungjuija nangman natepding ahi; sakolchang chi homer khat chu dangka shekel som nga-a kitepding ahi.

¹⁷Aman alou chu Jubilee kum-a pat asuhthenga ahile, nangman aman natep jatchu hijing ding ahi.

¹⁸Ahinla aman alou chu Jubilee jouva asuhtheng ahile, thempun apehding sum avat chu Jubilee hunglhun nading kum avatho dungjuija asimdoh pehding, chule hichu nangman nateppeh jatna kona kisulhom ding ahi.

¹⁹Chule lou suthengpa chun ipijeh hama alhatdoh dinga ahile, nangman aman natep chunga chu nga-a khat abelap ding, chuteng hichu ama-a dinga kisuhdet pehding ahi.

²⁰Chule aman alou chu alhatdoh louding ahia, ahiloule alou chu midang khat henga ajohdoh-a ahile, kilhatdoh kit louding ahitai.

²¹Ahinla louchu Jubilee sunga pehdoh ahia ahile, akikatdoh lou banga hichu Pakaiya atheng hiding ahi; hichu thempu gouchan hiding ahi.

²²Chule khattouvin ama neilegou hilou, amavang achohtho loumun chu Pakai henga asuhthenga ahile;

²³Chuteng thempun Jubilee kum geija dinga nangman natep chu ama dinga asimpeh-a, chule hiche nikho mama chule amapan nangman natep jat chu thiltheng banga Pakai henga apeh ding ahi.

²⁴Jubilee kum tengle alou chu akichohna pa henga kile kitding, masanga agam neipa heng ngeija chu kile kitding ahi.

²⁵Chule nangman natep ho jouse chu munthenga shekel dungjui hicheh ding, gerah somni chu shekel hiding ahi.

²⁶Gancha peng masapen, Pakaiya dinga apeng masapen hidingho bouchu koimachan asuhtheng louding ahi; bongchal hihen, ahiloule kelngoiho hijongle; hichu Pakaiya ahi.

²⁷Ahinla hichu gantheng louva kon ahile, natep dungjuija amapan alhatding, chule achunga nga-a khat abelap ding; ahiloule hichu akilhat lou dinga ahile, nangman aman natep dungjuija kijohdoh ding ahi.

²⁸ Hijeng jongle thil kikatdoh tapou, mikhatnin aneiho jouse lah-a kon mihem le gancha lah-a kon hihen, agouchan alouva kon hijongle Pakaiya dinga akatdoh chan chu kijoh louding, lhatjong kilhatdoh louding ahi: thil kikatdoh jouse chu Pakaiya ding atheng chungnung hia ahi.

²⁹Mihem lah-a kona suhmang dinga kikatdohsa mihem vangchu koiman alhatdoh louding, amavang kithat teiding ahi.

³⁰ Chule gamsunga somma khat jouse, gamsung muchi-a kon hihen, ahiloule agam theiga lah-a kon hijongle, Pakaiya ahi: Pakaiya dinga atheng ahi.

³¹Chule mikhatnin asoma khat hochu lhatdoh ding agotna ahile, aman hiche chunga chu nga-a khat abelap ding ahi.

³²Chule bonghon, ahiloule kelngoi hon thudola somakhat chu, moljol noija lut tapou asom lhina jouse chu Pakai henga dinga atheng hiding ahi.

³³Aman hichu aphaham ahiloule aseham akholkhoh louding, chule khel jong akhel louding ahi: chule iham tia aman akhel khah tah-a ahile, hiche chu le akhelpa chu ania atheng hiding ahi; hichu kilhatdoh louding ahi.

³⁴Hicheho hi Sinai molsanga Israel chatea dinga Pakaiyin Mosi henga athupeh chu ahi.