Read Thado Chin Thempudan 3 Bible Online

Thempudan 3 - Thado Chin bible

Thempudan 3

¹Chule ama thilto chu chamna thilto ganlhaina ahia, ganhon lah-a kona ato-a ahile: hichu achal hihen lang anu hijongle, Pakai anga atodoh ding chu nolnabei ahi.

²Chule aman athilto luchanga akhut angapma, houkhom ho houbuh kot phunga atha ding; chule Aaron chapate thempuho chun athisan chu maicham chung kimvela chu athekhum diu ahi.

³Chule aman chamna thilto ganlhaina chu Pakai henga meija kisem thilto-a apehding; asungho toma athao le asungho chunga athaova kaijouse,

⁴Akal teni leh akong vel lah-a kai athao, chule athin chunga kai athao chu akal teni puma alahdoh ding ahi.

⁵Chule Aaron chapaten hichu maicham meichunga um thing chunga govam ganlhaina chunga chu ahal dingu ahi: hichu meija kisem thilto Pakai henga gimnamtui chu ahi.

⁶Chamna thilto ganlhaina-a Pakai henga ato chu kelngoihon lah-a kona ahile; hichu achal hihen anu hijongle nolna beihel ato ding ahi.

⁷Aman athilto dinga chu kelngoi nou ato-a ahile, aman hichu Pakai anga atoding ahi.

⁸Aman athilto doh luchang chunga chu akhut angapma, chule houkhom ho houbuh masanga hichu athading: chule Aaron chapaten chuche thisan chu maicham chung kimvel athinkhum dingu ahi.

⁹Aman chamna thilto ganlhaina-a kona chu Pakai henga meija kisem thilto atoding; chua um athao le amei geija athao jouse chu ating juija lahdoh ding; chule asunga kai athao le asungho toma pang athao jouse,

¹⁰Chule akalteni leh akong vel lah-a kai athao, chule athin chunga kai athao chu akal teni puma alahdoh ding ahi.

¹¹Thempu chun hichu maicham chunga ahalding: hichu Pakai henga meija kisem anneh thilto chu ahi.

¹²Chule athilto chu kelcha ahia ahile, aman hichu Pakai anga atoding ahi.

¹³Aman chuche luchang chunga chu akhut angapma, houkhom ho houbuh masanga athading; chule Aaron chapaten chuche thisan chu maicham kimvela athekhum dingu ahi.

¹⁴Aman hiche athilto-a kona chu Pakai henga meija kisem thilto atoding; asungho toma athao le asung chunga kai athao jouse,

¹⁵Chule akalteni leh akong vel lah-a kai athao, chule athin chunga kai athao chu akal teni puma alahdoh ding ahi.

¹⁶Chule thempu chun hichu maicham chunga ahalding: hichu gimnamtui hidinga meija kisem anneh ahi: athao jouse chu Pakaiya ahi.

¹⁷Nanghon thao hileh thisan hileh naneh louhel dingu ahi tihi nachennao mun jouse-a akum kho-a nakhang uva chondan hijing ding ahi.