Read Thado Chin Thempudan 4 Bible Online

Thempudan 4 - Thado Chin bible

Thempudan 4

¹Chule Pakaiyin Mosi henga aseijin, hitin ati.

²Israel chate henga seipeh-in, Mihem khattouvin Pakaiyin bollou dinga athupehho khattou abola, hettoh lou jeh-a bollou dingho lah-a khat penpen chu anabola achonset tah-a:

³Thao kinu thempu chu mipi ho chonset dungjuija achonset tah-a ahileh; ama chun anabolna chonset jehchun chonset thilto dingin Pakai henga nolna beihel bongchalnou khat hinkaihen.

⁴Aman bongchal chu Pakai anga houkhom ho houbuh kot phunga ahin kaiding, chule chuche bongchal luchang chunga chu akhut angapma, chule Pakai anga abongchal chu atha ding ahi.

⁵Thao kinu thempu chun chuche bongchal thisan chu alah-a, chule hichu houkhom ho houbuh-a ahin choiding:

⁶Thempu chun chuche thisanna chu akhut jung adelut ding, chule thisan chu muntheng pondal masang, Pakai angsunga chu sagivei athe ding ahi.

⁷Thempu chun thisan phabep houkhom ho houbuh sunga um, Pakai anga gimnamtui maicham sakiho chunga chu akoiding; chule bongchal thisan jouse chu houkhom ho houbuh kotkhah phunga govam thilto maicham bula chu asunlhah ding ahi.

⁸Chule aman chuche-a kona chu bongchal thao jouse chu chonset thilto dinga alahdoh ding; asungho toma athao le asungho chunga kai athao jouse,

⁹Chule akalteni leh akong vel lah-a kai athao, chule athin chunga kai athao chu akal teni puma alahdoh ding,

¹⁰Chamna thilto ganlhaina bongchala kona akilahdoh banga chu alahdoh ding: chule thempu chun hiche ho chu govam thilto maicham chunga ahal ding ahi.

¹¹Chule bongchal vun le aphe jouse, aluchangl e akengho, chule asungho le a-eh,

¹²Abongchal pumpi chu aman gebuh pam vut ho kiboh lhahna munthenga chu apohdoh-a, hichu thingchunga meija ahal ding: vut ho kisun lhah na-a chu ahal ding ahi.

¹³Chule Israel houkhom ho chu apumpiuva hettohlou jeh-a achonset tah uva, chule athil chu houkhom mipi ho mitna kona akisela, chule amahon bol louding dol thilho chungchanga Pakai thupeh ho lah-a khatpen chu anaboluva, chule athemmo tah uva ahile;

¹⁴Chonset abolnao chonsetna chu akihetdoh teng, houkhom ho chun chuche chonsetna jeh-a chu houkhom ho houbuh masanga bongchal nou khat ahinkai dingu ahi.

¹⁵Houkhom upaho chun akhutnu chu bongchal luchang chunga Pakai angsunga angap diu: chule bongchal chu Pakai angsunga kithat ding ahi.

¹⁶Chule thao kinu thempu chun bongchal thisan chu houkhom ho houbuh-a ahin choiding:

¹⁷Chule thempu chun chuche thisan phabep lah-a chu akhutjung adelutna, pondal masanga Pakai angsunga chu sagivei athinlhah ding ahi.

¹⁸Chule aman thisan phabep houkhom ho houbuh sunga um, Pakai anga gimnamtui maicham sakiho chunga chu akoiding; chule bongchal thisan jouse chu abona houkhom ho houbuh kotkhah phunga govam thilto maicham bula chu asunlhah ding ahi.

¹⁹Aman hichea kona chu athao jouse alahdoh sohding, chule hichu maicham chunga ahalding ahi.

²⁰Aman hiche bongchal chu chonset thilto bongchal abolna bang banga abolding, hitobanga chu hiche chunga hi abolding ahi: chule thempu chun amaho dinga longlhenna abolpeh-a, chule amaho kingaidam ding ahi.

²¹Chule aman bongchal chu gebuh pama apohdoh-a, bongchal masajo ahal banga chu ahalding ahi: hichehi houkhom ho dinga chonset thilto ahi.

²²Vaihom khat achonsetna, chule aman bol louding dol thilho chungchanga Pakai thupeh ho lah-a khatpen chu anabola, chule athemmo tah-a ahile;

²³Ahilouleh, chonsetna anabol achonsetna chu ahin kihetdoh-a ahile; aman athilto-a dinga nolna beihel kelcha nou achal khat ahinkai ding;

²⁴Chule hiche kelcha luchanga chu akhut angapma, chule amahon Pakai angsunga govam thilto athanao mun'a athading ahi; hichu chonset thilto ahi.

²⁵Chule thempu chun hiche chonset thilto thisan chu akhutjunga alah-a, govam thilto maicham sakiho chunga chu akoiding, chule athisan chu abona govam thilto maicham bula chu asunlhah ding ahi.

²⁶Chule aman chamna thilto ganlhaina thao ahal banga, hiche thao jouse chu maicham chunga ahalding: chule thempu chun ama-a dinga achonsetna chungchanga longlhen abolpeh ding, chule ama ngaidam hiding ahi.

²⁷ Chule milham ho lah-a khattou achonsetna, chule aman bol louding dol thilho chungchanga Pakai thupeh ho lah-a khatpen chu anabola, chule athemmo tah-a ahile:

²⁸Ahilouleh, chonsetna anabol achonsetna chu ahin kihetdoh-a ahile; aman chonsetna anabol achonsetna jeh-a chu, athilto-a dinga nolna beihel kelcha nou anu khat ahinkai ding ahi.

²⁹Chule aman chonset thilto luchang chunga chu akhut angapma, chonset thilto chu govam thiltona munna chu athading ahi.

³⁰Chule thempu chun chuche thisan phabep chu akhut junga alah-a, govam thilto maicham kiho chunga akoiding, chule chuche thisan jouse chu abona maicham bula asunlhah ding ahi.

³¹Aman chuche thao ho jouse chu chamna thilto ganlhai thao akilahdoh banga alahdoh ding, chule thempu chun hichu Pakai henga gimnamtui dinga maicham chunga ahalding ahi.

³²Aman chonset thilto dinga kelngoi nou khat ahinpohle, aman nolna beihel anu khat ahinpoh ding ahi.

³³Aman chuche chonset thilto luchunga chu akhut angapma chule chonset thilpeh dinga amahon govam thilto abolnao munna chu hichu atha dingu ahi.

³⁴Thempu chun chonset thilto thisan chu akhut junga alah-a chule govam thilpeh maicham kiho chunga chu anuding, chule maicham bulla chu chuche thisan jouse chu asunlhah sohding:

³⁵Aman chuche-a kona athao jouse chu, chamna thilto ganlhaina-a kona kelngoinou thao akilahdoh banga alahdoh-a; chule thempu chun Pakai henga meija kisem thilto ho kibol dungjuija maicham chunga ahalding ahi: chule thempu chun amapan anabol achonsetna jeh-a chu longlhena abolpeh-a, chule ama chu kingaidam ding ahi.