Read Thado Chin Thempudan 5 Bible Online

Thempudan 5 - Thado Chin bible

Thempudan 5

¹Mi khattou amu ahiloule ahet thilkhat chunga hettohsah-a apana, kihahselna aw ajah-a jong phongdoh louva a-ima kona achonset tah-a ahile; amatah-in themona akipoh ding ahi.

²Ahiloule mi khattouvin thilthenglou khattou, sathenglou thilong hihen, ahiloule ganthenglou thilong hihen, ahiloule athenglou tolla kithol thoho thilong hijongle atoh khah-a, chule hichu aman ahetdohlou ahileh; amajong athenglou hiding, chule themmo chang hiding ahi.

³Ahiloule aman mihem khat thenlouna atoh khah-a, itobang thenlouna hijongle mihem khat suhboh theija chu atohkhah-a, chule hichu aman ahetdohlou ahileh; aman hichu ahetdoh teng, ama themmo chang hiding ahi.

⁴Ahiloule mi khattou aphalou hihen, apha hijongle bolding akama akihahsela, itobang kihahselna hijongle akama aphondoh-a, hichu aman ahetdohlou ahileh; hichu aman ahetdoh teng, hicheho khatpen pena themo changding ahi.

⁵Chule hitiding ahi, ama hiche thilho khatpen pena themo achanteng, aman chuche thilla chun kachonse tai tia aphondoh ding ahi.

⁶Chule aman chonsetna abol achonsetna jeh-a chu Pakai henga athemona thilto, chonset thilto-a dinga ahonlah-a kona anu, kelngoinou ahiloule kelcha nou khat ahinkai ding; chule thempu chun ama-a dinga achonsetna chungchanga chu longlhenna abolpeh ding ahi.

⁷Chule ijemtia aman kelngoinou chu ahinpoh theilou tah-a ahileh, aman anabol chonsetna jeh-a chu vakhu ni ahiloule vapal nou ni, khat chu chonset thilto dinga, chule adang khat chu govam thilto dinga Pakai henga ahinchoi ding ahi.

⁸Chule aman hiche ho chu thempu koma ahinchoi ding, thempu chun chonset thilto ding joh chu atodoh masatna, chule angonga kona alu ahepela ahetan pai louding ahi.

⁹Chule aman chonset thilto thisan chu maicham chung apanga athinlhah ding; chule thisan umnalai jouse dangho jouse chu maicham bula athin lhah ding ahi: hichehi chonset thilto chu ahi.

¹⁰Chule aman anina chu govam thilto-a dinga akibolji ngaibanga atoding: chule thempu chun chonset anabol chonsetna jeh-a chu ama dinga longlhenna abolpeh ding, chule ama kingaidam ding ahi.

¹¹Ahinla aman vakhu ni ahiloule vapal nou ni chu ahinchoi jou tah louva ahileh, achonsepa chun athilto dinga changbong neljet ephah dimkhat hopsom-a hopkhat chu chonset thilto-a dinga ahinchoi ding; hiche chunga chu thao asunlou ding, chule bego jong akoilou ding ahi; ajehchu hichu chonset thilto ahi.

¹²Chujou tengle aman hichu thempu henga ahinchoi ding, chule thempu chun melchihna dinga hichea kona chu akhut dimkhat alah-a, Pakai henga meija kisem thiltoho kibol banga, maicham chunga ahalding ahi: hichu chonset thilpeh ahi.

¹³Thempu chun hiche thilho lah-a achonsetna penpen jeh-a chu longlhena abolpeh ding, chule ama chu kingaidam ding ahi: chuleh amohcheng chu anneh thilpeh banga thempu-a ding hiding ahitai.

¹⁴Chuin Pakaiyin Mosi henga aseijin, hitin ati,

¹⁵Mi khattouvin suhkhel ana neija, chule hettohlou jeh-a Pakai thil thengho chunga ana chonset tah-a ahile; chuteng aman Pakai henga asuhkhel jeh-a kelngoihon ho lah-a kona nolna beihel achal khat ahinkai ding, aman chu nangman muntheng thil tena dungjuija dangka shekel nateppeh ding: hichu suhkhel thilto hiding ahi.

¹⁶Chule aman thiltheng chunga anasuhkhel na chu adit ding, chule nga-a khat abe-a hichu thempu henga apehding: chule thempu chun ama dinga suhkhel thilto kelngoichala chu longlhenna abolpeh ding, chule ama chu kingaidam ding ahi.

¹⁷Chule mi khattou achonsetna, chule Pakai thupeh-in boldinga aphal lou thilho lah-a khattou anabol tah-a ahileh; aman kihet hih jongle themmo chang ahin, chule akhangit louna chu akipoh ding ahi.

¹⁸Chule aman kelngoihon lah-a kona nolna beihel achal khat, aman chu nangman kilom nasah dungjuija natanpeh-a, suhkhel thilto dinga thempu henga ahinkai ding: chule thempu chun ama dinga akihetdoh lou asuhkhelna chungchanga chu longlhena abolpeh ding, chule ama chu kingaidam ding ahi.

¹⁹Hichu suhkhel thilto ahi: aman tahbeh-a Pakai douna-a asuhkhel ahi.