Read Thado Chin Thempudan 6 Bible Online

Thempudan 6 - Thado Chin bible

Thempudan 6

¹ Chuin Pakaiyin Mosi henga aseijin, hitin ati,

²Mi khattou achonsetna, Pakai douna-a suhkhel khat aneija, chule aheng akoma thil le lo avop dinga kikoisah chungham, ahiloule kiloikhomna chungham, ahiloule pum hatna kiladoh thil kila chunghama jou abola, ahiloule aheng akom adoha bola ahile;

³Ahiloule thil mangkhat amudoh-a, hiche chungchanga chu jou aseija, chule jouva kihahsela ahile, hitiho jouse lah-a khatpenpen abola, achonsetna ahile:

⁴Chuteng hitiding ahi, ama achonset, athemo tah jeh-a chu aman pumhatna alah ham, ahiloule doha-a kona amu ham, ahilouleh aman avop dinga kikoisah ham, ahiloule amang akimu chu hijongle alepeh ding,

⁵Ahiloule ajouva ana kihahselna jouse chu hijongle; abonchang keija alhingsetna alepeh ding, chule hichea chu nga-a khat abe ding, chule suhkhel thilto ato nikho le hichu aneipa alepeh ding ahi.

⁶Chule aman Pakai henga asuhkhel thilto-a dinga kelngoihon lah-a kona nolna beihel achal khat, aman chu nangman kilom nasah dungjuija natanpeh ding, thempu henga suhkhel thilto dinga ahinkai ding ahi.

⁷Chule thempu chun Pakai angsunga amapa dinga chu longlhena abolpeh ding: chule aman suhkhela anaboldoh hicheho khatpenpen jeh-a chu ngaidam changding ahi.

⁸Chuin Pakaiyin Mosi henga aseijin, hitin ati,

⁹Aaron le achapate thu penlang, hitin seijin, Hichehi govam thilto thudola dan kipe chu ahi: maicham chunga jan khovah kei jingkah geija akihala, chule maicham meikong chu hiche sunga chu koujing jengding ahi jeh-a chu govam thilto kiti ahi.

¹⁰Chule thempu chun atupatpon von chu akivon ding, chule tupat pon delchen chu akichen ding, chule maicham chunga govam thilto meikouvin akahvam vut hochu alodoh-a, hicheho chu maicham panga akoiding ahi.

¹¹Chule aman avonho chu asutlhah-a, chule von dangho akivon ding, chule avutho chu gebuh pam muntheng khatna apohdoh ding ahi.

¹²Chule maicham chunga meichu asunga chu koujing ding; hichu kisumit louding ahi: chule thempu chun jingkah sehleh hiche chunga chu thing atiding, hiche chunga chu govam thilto chu akoitoh ding; chule hiche chunga chu chamna thiltoho thao chu ahal ding ahi.

¹³Mei chu maicham chunga chu a-itih-a koujing ding; hichu mitlouhel ding ahi.

¹⁴Chule hichehi anneh thilto chunga danthu ahi; Aaron chapaten Pakai angsung maicham masanga chu atodoh dingu ahi.

¹⁵Chule aman anneh thilto changbong le athao chu anneh thilto chunga kikoi bego jouse puma akhutna ahamdoh ding, hichu Pakai henga gimnamtui dinga maicham chunga hetjingna dinga ahal ding ahi.

¹⁶Chule hichea kona amohse chu Aaron le achapaten aneh dingu: hichu muntheng phunga cholsolou changlhah toh amediu, houkhom ho houbuh hongsunga chu aneh dingu ahi.

¹⁷Hichu chol toh kikantha louding ahi. Keiman hichehi eikipe meija kisem thilto lah-a kona amaho chan dinga amaho kapeh ahitai; hichehi chonset thilto le suhkhel thilto banga atheng chungnung ahi.

¹⁸Hichu Aaron chapate lah-a pasal jousen aneh dingu ahi. Hichehi meija kisem Pakaiya thiltoho chungchanga nakhang khanguva a-itih-a dinga chondan kipe chu ahi: hicheho tongkha tapou chu atheng hiding ahi.

¹⁹Chuin Pakaiyin Mosi henga aseijin, hitin ati,

²⁰Hiche thilto hi thao akinu nikhouva patna Aaron le achapaten Pakai henga ato dingu thilto chu ahi; anneh thilto-a niseh-a atojing dingu chu changbong neljet ephah khat hopsom-a hopkhat hiding, akehkhat chu jingkah lamle atouva, chule akehkhat chu janle ato dingu ahi.

²¹Hichu khangbela thao toh kibol ding; chule hichu akikan joutengleh nangman nahin choilut ding: chule anneh thilto apheng penga kikang jousaho chu nangman Pakai henga gimnamtui hidinga nato ding ahi.

²²Chule ama khela thao kinu achapate lah-a kona thempupa chun ato ding ahi: hichehi Pakai henga a-itih-a dinga chondan kisem chu ahi; hichu aboncha halchai helding ahi.

²³Ajehchu thempu-a ding anneh thilto tapou chu aboncha halchai ding ahi: hichu nehlou ding ahi.

²⁴Chule Pakaiyin hichu Mosi henga aseijin, hitin ati,

²⁵Aaron le achapateho henga hitihin seijin, Hichehi chonset thilto thudola dan kipe chu ahi; Govam thilto akithana mun tah-a chu chonset thilto chu Pakai angsunga kithat ding ahi: hichehi atheng chungnung ahi.

²⁶Chonset thilto toh-a pang thempu chun hichu anehding ahi: hichu houkhom ho houbuh hongsung munthenga kineding ahi.

²⁷Ipi hitale chuche saphe tongkha tapou chu atheng hiding ahi: chule hiche thisan chu von khattou chunga akithekhum teng, nangman ana kithekhum von chu munthenga nasopding ahi.

²⁸Ahinla chuche kihona leibel chu kisukeh ding ahi: ijemtia hichu sumsan bela kihon ahile, abel chu not thenga chule twija lhaotheng ding ahi.

²⁹Thempuho lah-a pasal jouse chun hichu aneh diu ahi: hichu atheng chungnung ahi.

³⁰Chule munthenga kichamna bolna dinga houkhom ho houbuh sunga thisan kipolut chonset thilto tapou chu nehlouhel ding ahi: hichu meija govam ding ahi.