Read Thado Chin Thempudan 7 Bible Online

Thempudan 7 - Thado Chin bible

Thempudan 7

¹Chutobangma chun, hichehi suhkhel thilto thudola dan kipe chu ahi: hichehi atheng chungnung ahi.

²Amahon govam thilto athanao muntah-a chu suhkhel thilto chu atha dingu ahi: chule athi chu maicham chung kimvela athe dingu ahi.

³Chule aman chuche thao jouse chu atodoh ding, amei thao le asung toma athao jouse,

⁴Chule akalteni leh akong vel lah-a kai athao, chule athin chunga kai athao chu akal teni puma alahdoh ding:

⁵Chule thempu chun hicheho chu Pakai henga meija kisem thilto hidinga ahalding ahi: hichehi suhkhel thilto ahi.

⁶Thempuho lah-a Pasal tapouvin hiche chu anehdingu: hichu munthenga kineding ahi. Hichu atheng chungnung ahi.

⁷Suhkhel thilto jong hi chonset thilto kibol banga kibol ding ahi: hiche teni-a dinga hi dan khatbou uma ahi: chumuna longlhena bol thempupa chun hichu akilah ding ahi.

⁸Chule mi koija hijongle agovam thilto tohdoh peh-a pang thempupa chun, aman atodoh govam thilto vun chu akilah ahi.

⁹Chule thuh-a kikang anneh thilto jouse le thil kana bel ahiloule khangbela kisem jouse chu, apehdoh-a pang thempupa changding ahi.

¹⁰Chule anneh thilto thao toh kihala kigotsah tapou chu, Aaron chapate jouse chang dingu, khat le khat kibang cheh-a changding ahiuve.

¹¹Chule hichehi aman Pakai henga atoding chamna thilto ganlhaina thudola dan kipe chu ahi.

¹²Aman hichu thangvah na-a ato ahile, aman thangvahna ganlhai chutoh thao toh kihal chol solou changlhah lumho, chule thao kinu changlhah phengho, chule changbong neljet na kisem le kikang changlhah lum thao toh kihal apehtha ding ahi.

¹³Hiche changlhah lumho tailouva chu, achamna thilto thangvahna ganlhaina-a dinga chu chol kiso changlhah atotha ding ahi.

¹⁴Chule hiche thilto jouse lah-a kona chu changlhah khatcheh Pakai henga jap thilto hidinga atoding; hichu chamna thilto ho thisan the-a pang thempupa changding ahi.

¹⁵Chule thangvah na-a dinga chamna thilto ganlhaina saphe chu akitodoh nikho mama-a chu nehding ahi; chule aman hichu jingkah geija akhen louhel ding ahi.

¹⁶Ahinla aganlhaina thilto chu kihahselna, ahiloule lungcham thilto ahile, aman aganlhaina thilto atodoh nikho mama-a chu kineding: chule amoh chu ajing geija jong kineding ahi.

¹⁷Ahinla ganlhaina sa amoh chengse chu anithum channi le meija halding ahitai.

¹⁸Chule ijemtia achamna thilto ganlhaina sa chu themkhat tou nithum chan ni-a ana kineh khah tah-a ahile, hichu kisanpeh louding, atohdoh pa-a dinga jong kitaipeh louding: hichu thilthet umtah hiding; chule chuche ana nepa chun akhangit louna akipoh ding ahi.

¹⁹Chule thilthenglou khattou tongkha tapou sa chu nehlou ding; hichu meija halding ahi, chule satheng vangchu atheng jousen aneh dingu ahi.

²⁰Ahinla mihem khattou athenlouna achunga umpuma Pakaiya dinga kipedoh chamna thilto ganlhaina sa ne-a chu, hiche mipa ngeichu amite lah-a kona paidoh-a umding ahi.

²¹Chujongle mihem khattou thilthenglou, mithenglou ham, ahiloule sathenglou ham, ahiloule thet umtah thilthenglou ham tongkha-a, ahia Pakaiya dinga kipedoh chamna thilto ganlhaina sa ne-a chu, hiche mipa ngeichu amite lah-a kona paidoh-a umding ahi.

²²Chuin Pakaiyin Mosi henga aseijin, hitin ati,

²³Israel chate henga hitin seijin, Nanghon athao kitipou chu, bongchala hihen, kelngoija hihen, ahiloule kelcha-a hijongleh naneh lou dingu ahi.

²⁴Chule gamsa thikam thao le gamsa hon atha sathao chu thildang danga manthei ahi; ahinla iti nama jongle hichu nanghon naneh lou dingu ahi.

²⁵Ijeh inem itile koihileh mihon Pakai henga meija kisem thilto-a dinga atou sa athao nechan chu,hiche mipa ngeichu amite lah-a kona paidoh-a umding ahi.

²⁶ Chujongle nanghon nachenna mun jouseuva thisan kiti pou pou, vacha-a hihen, ahiloule sa-a hijongle naneh lou dingu ahi.

²⁷Koitobang mi hijongle thisan kiti netapou chu, hiche mipa ngeichu amite lah-a kona paidoh-a umding ahi.

²⁸Chuin Pakaiyin Mosi henga aseijin, hitin ati,

²⁹Israel chateho henga hitin seijin, Koi hile Pakai henga chamna thiltoh ganlhaina pechan chun, achamna thiltoh ganlhaina-a kona chu athilto chu Pakai henga apohlut ding ahi.

³⁰Akhut tah-a meija kisem Pakaiya thiltoho chu ahin choiding, a-om chu Pakai angsunga jap thilto-a jap dinga, a-om chu athaotoh ahinchoi ding ahi.

³¹Chule thempu chun athao chu maicham chunga ahalding; amavang a-om chu Aaron le achapate chang dingu ahi.

³²Chule nanghon adah jetlam chu nachamna thilto hou longlhen belap thilto dinga thempu chu napeh dingu ahi.

³³Aaron chateho lah-a chamna thilto thisan le thao pe-a pang amachun adah jetlam chu ama channa changding ahi.

³⁴Ijeh inem itile Israel chateho chamna thilto ganlhaina ho-a kona keiman jap thilto-a kon a-om le dop thilto-a kon adah chu kalah-a, Israel chate lah-a kona atonsotna chondan hidinga Aaron thempu leh achapate chu kapeh ahitai.

³⁵Hichehi thempu natong dinga Pakai henga apehlut nikho-a kona Pakai henga meija kisem thiltoho lah-a kona, thao kinu-a Aaron le thao kinu-a achapate chanding chu ahin;

³⁶Hichu Israel chateho-a kona pehding ahi tia Pakaiyin amaho thao anu nikho-a chu akhang khanguva chondan khatna aneidiuva athupeh ahi.

³⁷Hichehi govam thilto, anneh thilto, chonset thilto, suhkhel thilto, kipeh thengna le chamna thilto ganlhainaho-a dinga dan chu ahin;

³⁸Hichu Pakaiyin Sinai molsanga Mosi henga, Israel chatehon Pakai henga athilto hou ato dingu ahi tia Sinai gamthipma thu apeh chunga athupeh chu ahi.