Read Thado Chin Thempudan 8 Bible Online

Thempudan 8 - Thado Chin bible

Thempudan 8

¹Chuin Pakaiyin Mosi henga aseijin, hitin ati,

²Aaron le achapate chu puijin lang, chule vonho, kinuding thao, chule chonset thilto dingin bongchal khat chule kelngoichal ni le cholsolou changlhah ephah khat kengin,

³Chule mipi ho jouse chu houkhom ho Houbuh kotphunga chun khom khomin.

⁴Chuin Mosi'n Pakaiyin athupeh bangchun anabolin; chule mipi ho chu houkhom ho Houbuh kotphunga akikhom khom taovin ahi.

⁵Chuin Mosi'n houkhom ho henga, Hichehi Pakaiyin boldinga athupeh chu ahi, ati.

⁶Chule Mosi'n Aaron le achapate chu ahinpuijin, amaho chu twijin asilin ahi.

⁷Chuin aman sangkhol chu a-ah peh-in, konggah chu akonga agahsah-in, sangkhol cho chu a-ah peh-in, thempu sangkhol chu a-ah peh-in, phatah-a kikhong thempu sangkhola gahna-a chun agah-in, chule hiche-a chun thempu sangkhol chu achunga akhitnin ahi.

⁸Chuin aman a-ompho chu a-ah peh-in; chule aman ompho-a chun Urim le Thummim akoijin ahi.

⁹Chule aman alua thempu lukhuh akhuhpeh-in: chule Pakaiyin Mosi athupeh bangin alukhuh achalpang lama chun sana lheng, lallukhuh theng chu akoijin ahi.

¹⁰Chuin Mosi'n nuding thao chu alan, chule Houbuh leh asunga umjouse chu thao anun, abonin asuthengin ahi.

¹¹Chule aman hichea chun maicham chung chu sagivei athin khumin, maicham le akongle bel, atwi luina kongle akeng geijin asuthenna dingin thao anun ahi.

¹²Chuin aman kinuding thao chu Aaron lujanga asunglha-in, suhthengna dingin thao anutan ahi.

¹³Chule Mosi'n Aaron chapate chu ahinpuijin, Pakaiyin Mosi athupeh bangin sangkhol hochu a-ah peh-in, konggah-in akongu agah-in, chule alu uva lukop akop peh-in ahi.

¹⁴Chuin chonset thilto dingin bongchal chu ahin kaijin; chule Aaron le achapate chun chonset thilto-a dingin chuche bongchal luchanga chun akhutnu angam mun ahi.

¹⁵Chule aman hichu athatnin; chule Mosi'n thisan chu alan, maicham sakiho chunga chun akhut jungin akoikimvelin, maicham chu asuthengin, chule thisan chu maicham bula asunglhan, achunga kichamna bolna dingin asuthengin ahi.

¹⁶Chule aman asunga athao beh jouse le athin chunga athao aumho, chule akal teni le athao chu alan, chule hichu Mosi'n maicham chunga ahaltan ahi.

¹⁷Ahinla bong chal le avun, aphe leh a-eh chu, Pakaiyin Mosi athupeh bangchun gebuh pama meijin ahaltan ahi.

¹⁸Chule aman govam thilto-a dingin kelngoi chal chu ahinkaijin: chule Aaron le achapaten hiche kelngoi chal luchanga chun akhutnu angamun ahi.

¹⁹Chuin aman hichu athatnin, chuleh Mosi'n thisan chu maicham chung kimvel athekhumin ahi.

²⁰Chuin aman kelngoichal chu a-at tel telin, chuin Mosi'n aluchang, ahal holeh athao chu ahaltai.

²¹Chule aman asunglam ho le akengho chu twijin asopthengin; chuin Mosi'n kelngoi chal chu apumpin maicham chunga ahaltai. Hichu Pakaiyin Mosi athupeh banga, Pakai henga dinga meija kisem thilto, gimnamtui hidinga govam thilto chu ahi.

²²Chuin aman kelngoichal dang khat, kipeh thengna kelngoichal chu ahin kaijin: chule Aaron le achapate chun hichu kelngoichal luchanga akhutnu angamun

²³Chuin aman hiche chu athatnin; chule Mosi'n chuche-a konchun thisan chu alan, Aaron bilkol mong jetlam le akhut jetlam khutpi chunga, chule akeng jetlam khopi chungah anun ahi.

²⁴Chujouvin aman Aaron chapate chu ahinpui doh-in, chule Mosi'n thisan chu abilkol mong jetlamu le akhut jetlamu khutpi chunga, chule akeng jetlamu khopi chungah anun ahi: chuin Mosi'n thisan chu maicham chung kimvela athin khumin ahi.

²⁵Chuin aman thao, amei thao le asunga kai athao jouse, athin chunga athao lom, chule akal teni le athao chule adah jetlam chu alan:

²⁶Chule Pakai angsunga um cholsolou changlhah kikoina Pocha-a konchun, cholsolou changlhah lumkhat, chuleh thao kinu changlhah lumkhat, chule changlhah paset khat alan, hicheho chu athao le adah jetlam chunga chun akoijin ahi.

²⁷Chule aman abonchan Aaron khut chung le achate khutchunga akoijin, Pakai angsunga jap thilto hi dingin hicheho chu ajapmin ahi.

²⁸Chuin Mosi'n hicheho chu amaho khutna konin alan, chule maicham chungah govam thiltoho chunga chun ahaltan ahi. Hicheho hi gimnamtui hidinga kipetheng ho chu ahi. Hichehi Pakai henga dinga meija kisem thilto chu ahi.

²⁹Chuin Mosi'n a-om chu alan, Pakai anga jap thilto dingin ajapmin ahi: ajehchu Pakaiyin Mosi athupeh banga, kipeh thengna kelngoichala kona chu Mosi chan ding uma ahi.

³⁰Chule Mosi'n kinuding thaova kon phabep leh maicham chunga um thisan phabep alan, chule hichu Aaron le avon chung, achapate chung le achapate avonhou chunga athin khumin, chule Aaron le avonho, chule achapate le achapate aumpiho von chu asuthengin ahi.

³¹Chule Mosi'n Aaron le achapate henga, Houkhom ho houbuh kotkhah phunga chun asa chu honun; chule keiman Aaron le achapaten anehdiu ahi tia kathupeh bangchun, chua chun kipehthenga pocha sunga um changlhah chutoh neuvin.

³²Chule asa-a kon le changlhah-a kona akinemoh chengse chu nanghon meija nahal dingu ahi.

³³Chule nangho ni sagi sung nakipeh theng nao nikho akichai tokahse-a houkhom ho houbuh kotphunga kona napotdoh louhel dingu ahi: ajehchu nangho ni sagi nakisuh theng dingu ahi.

³⁴Aman tunia abol banga hi, chutobanga chu nangho-a dinga longlhen bolna dinga Pakaiyin bol dinga ana thupeh ahi.

³⁵Hijeh-a chu nangho nisagi sung sun le jana houkhom ho houbuh kotphunga naum uva, Pakaiyin nanganse nao chu nathilouna dinguva nanit dingu ahi: ajehchu chutia chu keima eina kithupeh-a ahi, ati.

³⁶Hitichun Aaron le achapate chun Pakaiyin Mosi khutna athupehho jouse bangchun abol taovin ahi.