Read Thado Chin Thempudan 9 Bible Online

Thempudan 9 - Thado Chin bible

Thempudan 9

¹Chuin aniget lhinin ahitin, Mosi'n Aaron le achapate chule Israel lamkaiho akoukhomin,

²Chule Aaron henga, Nangman chonset thilto dingin bongnou khat chule govam thilto dingin kelngoichal khat, nolna beihel lanlang, hicheho chu Pakai anga tohdoh-in.

³Chule nangman Israel chate henga, Nanghon chonset thilto dingin kelchaho nou khat; chule govam thilto dingin bongnou khat le kelngoinou khat, ania kumkhat lhingbep chule nolna beihel cheh kilah-un;

⁴Chule Pakai anga ganlhaina le chamna thilto dingin bongchal khat le kelngoichal khat jong; chule thao toh kihal anneh thilto jong hinlaovin: ijeh inem itile tunia hi nangho henga Pakai hungkilah ding ahi, tin seipeh-in ati.

⁵Chule amahon Mosi'n athupeh jouse chu houkhom ho houbuh maija ahinkai taovin: chule houkhom ho jouse chu ahung naijun Pakai anga ading taove.

⁶Chuin Mosi'n, Hichehi Pakaiyin nanghon nabol diuva nathupeh-u chu ahi: chutile Pakai loupina chu nangho henga hungkilah ding ahi, ati.

⁷ Chuin Mosi'n Aaron henga, Maicham phunglama chen, chule nachonsetna thilto le nagovam thilto gatoh-in, chule nangma dingle mipi ho dingin longlhena gabolin: chule mipi ho thilto chu toh-in lang, Pakai thupeh bangin amaho dingin longlhena gabolpeh-in, ati.

⁸Hitichun Aaron maicham phung lama achen, chule ama chang dingin chonset thilto bongnou chu athat tan ahi.

⁹Chule Aaron chapaten ama henga thisan chu ahinchoijun: chule aman thisana chun akhutjung adelutnin, chule hichu maicham sakiho chunga akoijin, chule thisan chu maicham bula asunglhan ahi.

¹⁰Ahinla chonset thilto thao leh akal teni, chule athin chunga thao umchu, Pakaiyin Mosi athupeh dungjuijin maicham chunga ahaltai.

¹¹Chule aphe le avun chu aman gebuh pamlamah meijin ahallin ahi.

¹²Chuin aman govam thilto chu athatnin, chule Aaron chapaten thisan chu ama henga ahinpeuvin, aman hichu maicham chung kimvela chun athen ahi.

¹³Chule aman govam thilto chu ahal ho le alutoh pumin ama apeovin: chule aman hicheho chu maicham chunga ahalin ahi.

¹⁴Chule aman asung ho le akeng ho chu asopthengin, chule hicheho chu maicham chunga govam thilto chunga chun ahaltai.

¹⁵Chuin aman mipite thilto chu ahin choijin, chule mipi ho dinga chonset thilto kelcha chu amanin, chule athatnin, hichu amasa-a bangin chonset thilton atoh-in ahi.

¹⁶Chule aman govam thilto chu ahin choijin, akibol ding dungjuijin atoh-in ahi.

¹⁷Chule aman anneh thilto chu ahin choijin, chuche-a konchun khut dimkhat alan, chule jingkah govam ganlhaina koma chun hichu maicham chunga ahalin ahi.

¹⁸ Aman mipi ho chamna ganlhai thilto dingin bongchal le kelngoichal jong chu athatnin: Aaron chapaten thisan chu ama ahin peovin, hichu aman maicham chung kimvela chun athen ahi.

¹⁹Chule chuche bongchal le kelngoichal thao, amei thao le asunga kai athaoho, akal teni le athin chunga athao;

²⁰Chuin amahon athao chu a-om chunga akoijun, aman athao chu maicham chunga ahalin ahi.

²¹Chule Mosi'n athupeh bangin, a-om le adah jetlam chu Pakai anga jap thilto dingin Aaron'in ajapmin ahi.

²² Chuin Aaron'in mipi lam ngan akhut adomsangin, amaho chu phatthei aboh-in, chuin chonset thilto, govam thilto chule chamna thilto atona-a konin ahung kumlhatan ahi.

²³Chuin Mosi le Aaron chu houkhom ho houbuh sunga alut lhonin, chuin ahungdoh lhonin, mipi ho chu phatthei aboh lhonin ahi: chuin Pakai loupina chu mipi ho jouse henga ahung kilahtan ahi.

²⁴Chule Pakai anga konin meikou khat ahung doh-in, maicham chunga govam thilto le athao chu akavam tai. Mipi ho jousen hichu amu phatnun apengun, amaiju asulutnun abohkhup taove.