Read Thado Chin Jeremiah 1 Bible Online

Jeremiah 1 - Thado Chin bible

Jeremiah 1

¹Benjamin gamsunga Anathoth'a um thempuho lah-a Hilkiah chapa Jeremiah thuho,

² Judah te leng Amon chapa Josiah nikholaija alengchan kal kum somle thumna in akoma Pakai thu ahung lhunge.

³ Judah te leng Josiah chapa Jehoiakim nikholai jin jong, Judah te leng Josiah chapa Zedekiah kum somlekhat kichailam gei, Jerusalem gal hinga kikaimang lha nga lhinna geijin hiche thuhi ahung lhungin ahi.

⁴Chuin Pakai thu chu kakoma ahung lhungtan,

⁵Keiman nangma naobu sunga kasem masanga kanahetsa nahin, naobu-a kona nahung potdoh masanga kanasuh thengsa, chule namtin themgao dinga kapansah nahitai.

⁶Chuin keiman, kate, Pakai Pathen! ven, chapang kahi jeh-in, ima kasei theipoi katin ahi.

⁷Ahinla Pakai chun, chapang kahi tihih-in, ajehchu keiman nangma kasolna jouse-a nache ding, keiman kathupeh chan naseidoh ding ahi, tin kajah-a aseitai.

⁸Chuin aman, amaho mai khu kicha hih-in, ajehchu keiman nang huhdoh dingin kaumpi e, tin Pakaiyin aseije.

⁹Chuin Pakai chun akhut alhangin, kamuh akhoije. Chuin Pakaiyin kajah-a, Ven, keiman kathuhohi nakam sungah kakhum luttai, tin aseije.

¹⁰Ven, tunia hi ajungho kaldoh dingle, aloilhu ding, asumang ding, asuchim ding, chule aphutdoh dinga namtin vaipihole lenggam ho chunga kapansah nahitai.

¹¹Chukalvalin, Pakai thuchu kakoma ahung lhungin, Jeremiah, ipi namu em? eiti e, chuin keiman, Almond thing tenggol khat kamu e, katin ahi.

¹²Chuin Pakaiyin kajah-a, namuchen lheh-e, ajehchu kathu tohdoh-a aumna dinga kavetlhih jing ahi, ati.

¹³Chuin Pakai thu chu aniveinan kakoma ahung lhungin, ipi namu em? eiti e, keiman bel soulahlah amai sahlam ngat khat kamui, tin kaseije.

¹⁴Chuin Pakaiyin kajah-a, sahlama pat thilphalou khat hungpotnintin, gamsunga chengho jouse chunga hung chuding ahi, tin aseije.

¹⁵Ajehchu ven, keiman sahlam lenggam ho jouse kakou ding, amaho hung dingu, Jerusalem lutna kotpiho phungle akimvele kulbangho, chule Judah khopiho jouse douna-a alaltounao atundoh cheh dingu ahi, tin Pakai jin aseije.

¹⁶Chule keiman, keima eidalhah uva pathen dangho houna-a gimnamtui ahalu, chule akhut uva kisemho joh ahou uva, agitlounau chunga thutanlhahna kanei ding ahi.

¹⁷Hijeh chun, nangman nakong kigah-in, chule kipatdoh-in lang, keiman kathupeh jouse chu amaho lah-a seijin, a-angsung uva meidoi hih-in, achutiloule keiman amasanguva nangma kisuh dongsah get inge.

¹⁸Ijeh inam itile, ven, tunin keiman nangmahi kihuh dohna khopi kasema, chule thihkhompi, gamsung pumpi, Judah lengho, pipuiho, thempuho chule agam miteu douna sum-eng kulpi detna kasem nahitai.

¹⁹Amahon nangma nadou diu, hijongle najolou dingu ahi. Ajehchu nangma huhdoh dinga keiman kaumpi nahi, tin Pakaiyin aseije.