Read Thado Chin Jeremiah 10 Bible Online

Jeremiah 10 - Thado Chin bible

Jeremiah 10

¹Israel insung naheng uva Pakai thusei chu ngaijun.

²Hitihin Pakaiyin aseije, Pathen hephalouho lamlhah chu kihil hih-un, van melchihna ho jeh-in jong lungthoi hih-un, ajehchu Pathen helouho hitiho ahin alungthoi jiuve.

³Ajehchu miho puchon pachon chu moh ahi. Ijeh-inem itile khatnin gammanga konin thing aphuh-in, hichu heicha-a natongpa khutsoh ahi.

⁴Amahon hichu dangkale sanan ajemuvin, akilonlou nadin thihkille seh-in amandetnuve.

⁵Amaho lusu thingphung bangin akitung jangpetnun, ahinla apaothei pouve. Achetheilou jeh uva poh ngaitei ahiuve. Amaho ginghih uvin, amahon thilse abolthei pouve, thilpha bolna dingjong amaho-a aumpoi.

⁶Vo Pakai, nangma tobangtah koimacha aumpoi, nangma loupitah nahin, naminhi thanei na-a loupi ahi.

⁷ Vo namtin vaipi lengpa, nangma kichalou ding koi ham? Ajehchu nangma-a hichu uma ahin, ajehchu nampiho michingte jouse lahle alenggamhou jouse-a, nangma tobang khatcha aumpoi.

⁸Amaho lungselle angol ahiuvin, lim semthu ahouvu jong chu manthah na lhongpi ahibouve.

⁹Tarshish'a konin dangka kikhen pheng chule Uphaz'a konin sana ahinpouvin, khutthemho khutsohle thihkheng themho khutsohho, adumle asandup akivonun, aboncha chu doha thuh khutthemho khutsoh ngen ahi.

¹⁰Pakai vang chu Pathen dihtah ahin, ama hingjing Pathen le tonsot leng ahi. Alunghana-a leiset kihot ding! athangtomna chu namtin vaipin anan joulou diu ahi.

¹¹Hiti ahi nanghon ajah uva, vanle lei sem hilou pathenho, amahotah chu leisetna konle hiche vanho noija konahi mangthah ding ahiuve, natidiu ahi.

¹²Aman athaneina-in leiset asemin, achihna-in vannoi atungdoh-in, ahetthem na-in vanho ajandoh-e.

¹³Aw aso tengle, van'a twi tamtah aging lullul jin, kolmonga pat twimei ajamtousah jin, kolphele gotwi asemin, agou boma konin hui ahin nundoh sah jin ahi.

¹⁴Mitinhi ahetna-a lungsel ngen ahin, asemdoh takip milim kilhah tho-a akisudongun ahi. Ajehchu amilim kilhahtho hochu jouthubuh ahin, asunguva haitheina aumpoi.

¹⁵Amaho pannabei le natoh dihlou ahiuvin, gotna akipeh tengule mangthah ding ahiuve.

¹⁶Jacob chan chu hicheho bangchu ahipoi; ajehchu Ama thil jouse sempa hin; Israel hi agoulo nam tenggol ahin, amin chu janel Pakai ahi.

¹⁷Vo kulpi sunga chengho, gamsunga konin nakiveina thilho chom khomin.

¹⁸Ajehchu Pakaiyin hitin aseije, vetan, agamsunga chengho chu khatveihi hinpaidoh inting, amahon chutia amutheina diuva amaho kasuhgenthei ding ahi.

¹⁹Kakisuh natna jeh-in ada kahitai, kamaha put hi analheh jenge, ahinla keiman, hichehi thohgimna tahbeh ahin, chule kathoh teiding ahi kati.

²⁰Kahoubuh asetan chule kakhao jouse atantai. Keija konin kachate achedoh-un, aumtapouve chule kahoubuh songdoh dingle kapondal ho tungdoh ding koima aumtapoi.

²¹Ajehchu kelgnoi chingho la alungsel ngen ahiuvin, Pakai hola aumpouve. Hijeh-a chu lolhing loudiu, akelngoiteu jouse chehchao ding ahiuve.

²²Veuvin, Judah khopiho kamhelsah dingle, Dragon ho kokhuh sosah dingin, sahlam gama konin thuthang le husa nasatah ahunge.

²³Vo Pakai mihem chondanhi ama-a um ahipoi ti kahetai, akalson hil dinga chu mihem sunga um ahipoi.

²⁴Aw Pakai imacha hilou munna neilhut louna dingin, nalunghanna-a hilouvin nathu tan najoh-in neisu dih-in.

²⁵Nangma hephalouho chungle, namina taolou insungho chunga nalungsatna bunglha tan, ajehchu amahon Jacob anejouvun, abahgamun, asumangun, chule achenna mun kamhelin alhauve.