Read Thado Chin Jeremiah 11 Bible Online

Jeremiah 11 - Thado Chin bible

Jeremiah 11

¹Jeremiah henga Pakai thu hunglhung chun aseije,

²hiche thulhun thuhi ngaijun lang, Judah mitele Jerusalem'a chengho henga seipeh-un.

³Chule nangman amaho jah-a seijin, Israel Pathen Pakai chun hitin aseije, hiche thulhun thuho ngailoupa chu sapset changhen.

⁴Hichu napateu Egypt gamma thih meilhuma kona kahin puidoh ni-a kana thupeh a kanasei, Ka aw ngaijun lang chule kathupeh ho dungjuijin bollun. Hitia chu nangho kamite nahiuva, chule keima na Pathen'u kahi ding ahi.

⁵Chutia chu napateu henga, khoijule bongnoi lonna gamkhat pehdinga tunia bangahi kakitepma kahahselna chu katohdoh thei ding ahi, ati. Chuin keiman, hihen, Pakai tin kadonbutne.

⁶Chujouvin Pakaiyin kahengah aseije, Judah khopihole Jerusalem khopi lamlen ho-a hiche thuho hi phongjalun lang, hiche thulhun thuho hi ngaijunlang, boluvin, ati.

⁷Egypt gama kona amaho kanapuidoh nikhon napateu henga hatah-in kana kiphin in, tuni chan geijin jong, matah-a kipatdoh pumin kagihsal lin, ka-aw ngaijun katijingin ahi.

⁸Ahinla angaipouvin, anau jong sunglouvin, amitakip alungaito gitlouna-a achonun, hijeh chun abol dinguva kana thupeh-a, ahivanga ana bolou-u, hiche thulhuna thucheng ho jouse hi achunguva kahin lhunsah ding ahi.

⁹Chuin Pakaiyin kajah-a, Judah mitele Jerusalem'a cheng mite lah-a thilguh kigong akimudoh-in ahi.

¹⁰Apu apateu, kathu ngainomlouho khangitlouna lama akilehei gamun, pathen dangho jen dingin anungu ajuijun, Israel insungle Judah insungin, apateutoh kanasem thulhun chu asukeh taove, ati.

¹¹Hijeh chun Pakaiyin hitin aseije, veuvin, ahoidoh theilou hel nadiu thilse achunguva kalhunsah-a, kahenga hungpeng jongleu kangaipeh louding ahi.

¹²Chuteng Judah khopihole Jerusalem'a chengho chu, gimnamtui ahalnau pathenho henga chun cheovintin, ahenguva pengdiu, hijongle alungdon petnuva hiho chun ahuhdoh louhel diu ahi.

¹³Ajehchu vo Judah, nakhopihou jat dung juijin pathen naneijun, Jerusalem khosung lamlen jat dung juijin jachat umtah Baal henga gimnamtui halna maicham natung doh-un ahi.

¹⁴Hijeh chun hiche mite dinghin taohih-in, kanale thumna jong bolhih-in, ajehchu alungkham jeh uva kahenga atao tengu jongle kangaipeh louding ahi.

¹⁵Kangainun thil thet um tahtah bolpumle, nanga kona tahsa theng achemang munasasa a ka-insunga ipi abol nahlai dingham? Nangin aphalou nabol tengle nakipah jilheh-e.

¹⁶Pakaiyin namin chu Olive thingphung hing, ga hoitahle phatah tin nanaminvon, mipi hugin thong chu achunga meijin akongin, ahin abahho chu abong gamtai.

¹⁷Ajehchu Kei phinset na-a lunghansahna dia Baal henga gimnamtui hal Israel insung le Judah insung setna jeh'in, Janel Pakai nangma phutpa chun, nachunga thilgilou ahinbol ding aphongdoh tai.

¹⁸Chuin Pakaiyin eihetsah-in, kahetan, chuphatnin nangin athilbolu neimusah tai.

¹⁹Ahinla keima kelngoinou, ahiloule bongchal tha dinga kikai bangbou kahin, amin kihetkit louhel nadin mihing gama konin ama chu sumangu hitin, thingphung chu aga pumin subeiju hite, tia kachunga adoha bolu chu kanahe hihhelin ahi.

²⁰Ahinla Vo janel Pakai dihtah-a thutanpa, lungsung gille lungthim sung patep jipa, achunguva naphulahna chu neimusah tan, ajehchu kachung chang thu nangma-a kaphondoh ji ahi.

²¹Kakhut uva nalou louna dingin Pakai minin gao thu seitahih-in tia kahin na suhmang dinga chang lhijing Anathoth mite chungchanga Pakaiyin hitin aseije.

²²Hijeh chun janel Pakai chun hitin aseije, vetan, amaho chu talen pengting, gollhangho chu chemjam'a louvuntin achapateule achanuteu chu kela thidiu ahi.

²³Chule amaho amoh himhim umpou vinte. Ajehchu Anathoth mite chunga thilse kalhunsah ding, gotna achan kum-u jong hiding ahi.