Read Thado Chin Jeremiah 13 Bible Online

Jeremiah 13 - Thado Chin bible

Jeremiah 13

¹Pakaiyin kahenga, tupatpon konggah gakilah-in lang, twija sukot louvin, nakonga kigah-in, ati.

²Hitichun Pakai thu dungjuijin konggah khat kaga kilah-in, kakonga kaki gah-in ahi.

³Chuin anivei channan Pakai thu chu kahenga ahung lhungin aseije,

⁴Nagalah nakonga um konggah chu choijin lang, kipat in, Euphrates lama chenlang, chukoma songpi kosung khatna gaselin, ati.

⁵Hitichun Pakaiyin thu eipeh bangin kachen, Euphrates koma kagaseltai.

⁶Chuin ni tamtah jouvin Pakaiyin kajah-a, kipat in Euphrates lama chenlang chua konin, chukoma sel dinga thu kanapeh konggah chu hinchoijin, ati.

⁷Chuin Euphrates lama kachen kalaidoh-in, kaselna mun'a kon chun konggah chu kaladoh-in, chule vetan, konggah chu anangot tan, imachan aphachom tapoi.

⁸Chuin Pakai thu kahenga ahung lhungin aseije,

⁹Pakai chun, Judah hoithonale Jerusalem hoithona chu hiti ahi kasuhset ding ahi, ati.

¹⁰Kathu ngailouva alung ngaito to-a chonna, pathen dangho jenna, chule houva, hiche nam phaloutehi imacha phachom lou konggah tobang bepbou chu ahiuve.

¹¹Ajehchu konggah mikonga abechah banga Israel insung pumpile Judah insung pumpi chu keima-a kabechahsah ahi, tin Pakaiyin aseije, hitia chu amaho kei dinga kamitele kaminthana, kahoinale kaloupina dinga kasem ahin, ahinla amahon angainom pouve.

¹²Hijeh-a chu ajah uva hiche thuhi naseija, Israelte Pakai Pathen'in hai jouse chu lengpitwi sung dimun, ati, nati ding ahi. Chuteng amahon najah-a, hai jouse lengpitwi dim dinghi kahetchen lou uham? atidiu ahi.

¹³Chuteng nangin ajah uva, Pakai jin hitin aseije, vetan, hiche gama chengho jouse David laltouna-a tou lengho, thempuho, themgaoho, chule Jerusalem'a chengho jouse chu khamna-a kadip ding ahiuve.

¹⁴Chule keiman amaho khatle khat, pate leh chapate tahjong kahin tato ding, kalainat louding, kakhen louding, ahiloule kahepi louhel ding ahi, tin Pakaiyin aseije.

¹⁵Ngaijun, nanau sungun, kithahatsah hih-un, ajehchu Pakaiyin thu aseitai.

¹⁶Aman kho ajinsah-a, chule molchung muthim lah-a nakipal lhuh masangin, Pakai na Pathen chu loupina peuvin, chule vah nangaichat laitah-un, thina le-lim asosah-in, muthim lhangkhal in aseme.

¹⁷Ahinla hichu nangailou diule, nahoitho jeh uva kahinna sunthipma kap kapmin tin, Pakai kelngoite gal hinga kikaimang jeh-a kamit teni jong mitlhin achupding ahi.

¹⁸Lengpa le Lengnu jah-a, kineosah lhonin, toulha lhonin, ajehchu nathupina lhonle naloupina lallukhuh lhon jengjong lhamang ding ahitai, tin aseije.

¹⁹Lhanggam khopi lenho kikhah chah gamintin, koimachan ahontheilou ding, Judah aboncha gal hinga kikaimanga, apumpiuva gal hinga kikaimang diu ahitai.

²⁰Dahdoh-un lang sahlama kona hungho khu veuvin, nangma kipe kelngoihon, nakelngoi hon hoitah ho chu hoi hitam?

²¹Aman nangma na-engbol teng ipi nasei ding ham? Ajehchu nangin gal lamkai dia nanahil chu, nachunga vaipon apangtai. Numei naosonat banga na nasah louding ham?

²²Nangin nalunga hiche thilho ibola kachunga hung lhung ham? tia naseile, hichehi nangma nakhansetna alet behset jeh ahin, hijeh-a chu nanih kihoh-a, nakhotal doh-a ahi.

²³Ethiopia min avun akheltheija ahiloule lutnun ajem akhel theijem? Achutile angaina-a thilse boljing nanghon jong thilpha nabol thei diu ahi.

²⁴Hijeh chun gamthipma huijin pol amutcheh banga chu kathecheh diu nahi.

²⁵Hichehi keija kona nakite-a navang chanchu ahi, tin Pakaiyin aseije, ajehchu nangin neisumilin, joubulom joh natahsan tai.

²⁶Hijeh-a chu najachat kilahna dinga, namai changa nanih kahodohpeh ding nahi.

²⁷Loujao lhangchung dunga najon thanhoina, nanahkhon, nahuhna awgin, na noti chon naho, nathet um thilbolho chu kamutai. Ohe Jerusalem, nada ahi, naki suhtheng louding ham? Itih tahle ahitadem?