Read Thado Chin Jeremiah 14 Bible Online

Jeremiah 14 - Thado Chin bible

Jeremiah 14

¹Twihah thudola Pakai thu chu Jeremiah henga ahung lhungin ahi.

²Judah alunghemin, akotpihou chu anguije, amaho tolla aduplha taovin, Jerusalem khopi ka ogin akitol toutai.

³Amilal houvin asohteu twikhaijin asolun, luikhuh-a ahungun, twi amupouve. Atuibelu keo pumin akileuvin, amaho jahchan akisujumuvin ponlu akikhuvin ahi.

⁴Leija go juhlou jeh-a, leiset akhit jeh-in, loukaiho ajahchauvin ponlu akikhuh taove.

⁵Henge, sajuh pin jong hamlah-a nou aneijin, hamhing umlou jeh-in adalhatai.

⁶Gam sanganho munsang ho-a adingun, dragonho bangin hui ahoplut helhol-un, hamhing umlou jeh-in amitnu athabei gamtai.

⁷Vo Pakai kakhangitlou naovin eilansan jongleu, namin jal-in hichu boljengin, ajehchu kakinungtol nao atamin, nangma dounan kachonse taove.

⁸Vo Israel kinepna pa, lungkham laija huhhingpu, ibola gamsungahi kholjin banga jankhat gehdia kiheimang lamjot nabah ding hitam?

⁹Ibola milungthoile pasal hat kihuh hing theilou bang bepma naum ding ham? Vo Pakai kalah uva naum nalaijin, naminin katao jiuve, neidalha hih-un.

¹⁰Pakaiyin hiche mite thudol hitin aseije, amahon vavei ding adeijun, akengu atuhtang pouvin, hijeh chun Pakai jin amaho asang tapouve. Tu-a aman akhang gitlounao ageldoh-a, asetnao jeh-a gotna apehding ahitai.

¹¹Chuin Pakaiyin kahenga, hiche mite phattheina dingin taopeh hih-in,

¹²an ngola apennau kangaipeh louding, govam thilto atotengu jongle kasanpeh louding, chemjamle kela chule hise-a kasuhmang johdiu ahi, ati.

¹³Chuin keiman kaseije, Pakai Pathen vetan, themgaoho chun ahenguva, chemjam nato loudiu, keljong nahet loudiu, chamna mong mong kapehjoh ding nahiuve, atiuve.

¹⁴Chuphatnin Pakaiyin kahenga, themgaoho chu kamina jouva ahiuve, keiman kasolpon, thujong kapepoi, houjong kakihoupi poi. Naheng uva thilmu dihloule, gaothu chule mohthu pannabei aseijuva, alungu alheplhah-u ahi.

¹⁵Hijeh chun hiche gama hin chemjamle kellhah chuponte tia, keiman kasol louva gaothusei themgaoho chungchang chu chemjamle kellhah in hiche themgaoho chu asuhmang ding ahi, tin Pakaiyin aseije.

¹⁶Chule agao thuseinao miho chu kel lhahle chemjam jeh-a, Jerusalem khosung lamlena kipaidoh diu, amaho ajiteu ahiloule achapateule achanuteu vuiding koimacha aneilou diu ahi. Ajehchu agitlounau achunguva kabuh lhah ding ahi.

¹⁷Hijeh-a chu nangin hiche thuhi ajah uva nasei ding ahi: sunle jan-in kamitlhi longhen lang, kanghih behhen. Ajehchu kamite chanu nungah theng chun mavona hoisetah, manthah na nasatah athohtai.

¹⁸Keima loujaova kagapot dohle, chemjam'a kithat ho pikhu vetan! chuin khopi sunga kagalut le kel lhah naho pikhu vetan! henge, themgaoho le thempuho chu ahetlou nau gama avah leuve, nati ding ahi.

¹⁹Judah chu napaidoh hel hitam? Zion chu nahinnan akidah hitam? Kadamna diu umlou hela ibola neivoh-u hitam? Chamna kaholun apha imacha aumpoi, damna ding phat chu, vetan lungkhamna bep ahitai.

²⁰Vo Pakai kagitlou naole kapateu khangitlou naho kakihet taove. Ajehchu nangma douna-in kachonse taove.

²¹Namin jal-in neithet bol hih-un, naloupina laltouna chu jaboldan umhih hen, keihotoh nasem nathulhun chu hejingin lang, sukeh hih-in.

²²Chidang namdang pannabei ho lah-a, go juhsah theija umam? ahiloule van'in gohong ajuhsah theijem? Vo Pakai ka Pathen ama chu nangma nahilou ham? Hijeh-a chu nangma kanga diu ahi. Ajehchu hicheho jouse nangma sem ahi.