Read Thado Chin Jeremiah 16 Bible Online

Jeremiah 16 - Thado Chin bible

Jeremiah 16

¹Pakai thu chu kahenga ahunglhung kitnin aseije.

²Nangin hiche munnahi ji naneilou ding, chapate chanute jong naneilou ding ahi.

³Ajehchu Pakaiyin, hiche munna pengho chapatele chanute thudol, chule ahinguva anuteo thudol le hiche gama ahinguva apateu thudol hitihin aseije.

⁴Amaho hesohtah-a thiuva, kikalou diu, vuijong kivui louva tollhanga ehbang bep hidiu, amaho chemjamle gilkela mangthah uva alongu chu chunga leng vachate le leija gamsaho anneh hiding ahiuve.

⁵Ajehchu Pakaiyin hitin aseije, lunghemna insunga lut hih-in, akapi dingle alunghempi dingin jong che hih-in, ajehchu keiman hiche mite-a konin kacham nale kahebolna chule kahepina kaladohtai, tin Pakaiyin aseije.

⁶Alen aneu hiche gamahi thicheh diu, amaho kivuilou diu, minjong aka loudiu, atahsao jong ki-at pop louding, luchaija jong umlou diu ahi.

⁷Thi jeh-a lhamonsahna dinga mite kapma lhisoh lou ding, koimachan anu ahiloule apa lungmonsahna dinga donding khon apeh louhel ding ahi.

⁸Nang jong amaho toh nedingle dondinga golvahna insunga nalut louhel ding ahi.

⁹ Ajehchu Israel Pathen janel Pakai chun hitin aseije, vetan, namitmule nahinkho uva hiche nuina oginle kipana ogin, moulang nopna oginle mounu ogin katansah hel ding ahi.

¹⁰Chule hung hiti ding ahi, thu jousehi hiche mite nahetsah tengle, amahon najah-a, ipijeh-a Pakaiyin thilse nasatahhi keiho douna-a aphondoh hitam? Pakai ka-Pathen'u douna-a kakhangit lounao leh kachonsetnau ipiham? ati dingu ahi.

¹¹Chuteng nangin ajah uva nasei ding ahi, ajehchu napateu vin eidalhaovin, pathen dangho nung ajuijun, amaho ajenun, ahouvun keima eidalhaovin, kadan thupeh anitpouve, tin Pakaiyin aseije, natiding ahi.

¹²Nanghon napateu sanga sejocheh nabol taove, ajehchu veuvin, amahon kathu angaida theina diuvin amitakip ama ama lunggel gilou dungjuijin achonuvin,

¹³hijeh-a chu keiman hiche gama kona nahetkhah louvu, nanghole napateu vin ahetkhah louvu gama kapaidoh-a, chua chu sunle jana pathen dangho najen diu, hia chu lungsetna kamusah loudiu nahiuve.

¹⁴Hijeh chun vetan, Egypt gama kona Israel chate puidoh-a Pakai chu ahing jinge, tia akiseikit tahlouhel na nikho hochu ahung lhunge, tin Pakaiyin aseije.

¹⁵Ahinla, Israel chate sahlam gama konle, aman anochehna gamho-a kona hinpuidoh-a Pakai chu ahing jinge. Chule apateu kanapehsa amaho gama chu kahin lepuikit dingu ahi.

¹⁶Ven, ngamanho tamtah kasol ding ahi, tin Pakaiyin aseije, amahon ahinmat dingu, chujoule sadelho tamtah solingting, amahon moltinle lhangtin chule songkoho-a kona adel lele dingu ahi.

¹⁷Ajehchu alampiu jouse kamitnin amun, amaho kamaija konin akisel pouvin, akhangit lounao kamitmu-a konin akiselpoi.

¹⁸Chule amasatah-a keiman akhangitlou naole achonsetnao ajatnia kalethuh ding ahi. Ajehchu amahon kagam asuboh un, kagoulo chu ki-dah le thet umtah athilongu chun adipset taove.

¹⁹Vo Pakai kahatnale kakuldet, chule bolgenthei ni-a jamlutna, leiset kolmonga konin chidang namdangte nahenga hunguntin, ipateovin jouthule ahomkeo phatchomna beihel ana kisan-u ahi atidiu ahi.

²⁰Pathen la hilou, pathenho mihemin akisem dingham?

²¹Hijeh chun vetan, keiman amaho hichehi khatvei hetsah ingting, kakhutle kathahat hetsah inge, chutile amahon kamin hi Pakai ahi ti hetao vinte.