Read Thado Chin Jeremiah 17 Bible Online

Jeremiah 17 - Thado Chin bible

Jeremiah 17

¹Judah chonset nahi thih lekhamol le song mantam muhhema kisunlut ahin, alungsungu dokhang chungle namaicham sakiho chunga kikhenga ahi.

²Achateuvin thinghing phungho leh molsang chungho-a amaicham hou leh adoikhom hou ageldoh jiuve.

³Vo gama kamolsang, naneile nagou jouse gal laija thil kichom banga kapehdoh ding chule nagam pumpi lhung keija namun sangho, chonset mana kapeh ding ahi.

⁴Chule nangma, nangma ngeijin, nagoulo kapehsa chu nalo jomlou ding, nahetphah lou gama namelmate jena kapansah ding nahi. Ajehchu kalunghana meikong nakou sah-un, a-itih-a kongjing ding ahitai, ati.

⁵Pakaiyin hitin ati, mihem'a atahsan na ngama, atichunga abantha kisema, chule Pakaiya kona alungthim petmang mipa chu sapset chenghen.

⁶Ajehchu ama nelphaija phaipheng keh banga thilpha ahungteng amulou ding, ahinla gamthipma gambeh neoho chi umna gamle mihem chenlouna gama cheng ding bou ahi.

⁷Pakai tahsana, akinepna Pakai hia mipa chu anun nom ahi.

⁸Ajehchu ama twipanga thing kiphut, vapanga ajung jamdoh-a, nisa satnin sangkha louva ana jong hingjing tobang chu hiding ahi, gamgot kum-a olmo louva, aga jong geongai louding ahi.

⁹Lungthimhi thil jouse chunga joulhepna dimset, gitlouna-a sesoh hel ahin, hichehi kon hethei jintem?

¹⁰ Mitin ama ama lamlhah dungjuile atohga dungjui cheh-a kapeh theina dingin, keima Pakaiyin lungsung kakholin, lunggil ho kapatepjin ahi,

¹¹vabuh-in [4] atwi athah-a khelouva adalhah banga, adihlouva haojong chu chutobang ahin; chule ahinkho kimtuh-a adalha-a, akichaina chu mingol hiding ahi.

¹²Atila pat laltouna sang loupi khat umchu kamun theng laiju chu ahi.

¹³Vo Israelte kinepna Pakai, nangma dalha jouse jahchaova keija kona kidalseho chu tolla kijihlut ding ahiuve, ajehchu amahon Pakai hinna twi longjing chu adalha taove.

¹⁴Neidam sah-in, Vo Pakai, chutile dam tange, neihuh-in chutile huhhing hitange, ajehchu nangma kavahchoi jing pa nahi.

¹⁵Vetan, amahon kajah-a, Pakai thusei chu hoiba ham? Tuhin hung guilhung hen, atiuve.

¹⁶Keima vang, kelngoichingpu kahina-a nakoma kon kavah mangpon, dana nikho jong kangaichapoi, namasanga kakama thupot chu, adih ahi nangin nahenai.

¹⁷Kei dingin manthah na hihih-in, nikho phalou ni-a kakinepna nahi.

¹⁸Eibolgimho jahchaohen lang, keivang nei jachatsah hih-in, amaho lungthoijuhen lang, keivang neilungthoi sah hih-in, achunguva nikho phalou lhunsah inlang, manthah na jatni-in sumangin.

¹⁹Pakaiyin kajah-a hitihin aseije, Jerusalem kotpi jouse, Judah lengte lutle potlena, mihem chate kotpi phunga khun gadingin,

²⁰Chule ahenguva, hiche kotpi-a lutji nangho Judah leng tele, Judah mite, chule Jerusalem'a chenghon Pakai thusei hi ngaijun.

²¹ Pakaiyin hitin aseije, kichihtheijun lang cholngah nin pohgih pohdaovin, chule hichu Jerusalem kotpi-a jong hinpolut hih-un.

²² Na inhouva konin jong cholngah nile pohgih podoh hih-un, najong imacha tong hih-un, napateu thu kapeh bangin cholngahni chu jabol uvin.

²³Ahinla amahon ajuipouve, anaujong asungpouvin ahi, ajahlouna diule hilchahna asanlouna diuvin alouchal uve.

²⁴Chule hung hiti ding ahi, Pakai jin cholngah ni-a hiche khopi kotpi-a pohgih pohlut louna dingle, na imacha tohlouna dinga choldoni najabol joh uva, lunglut tah-a neijop ule,

²⁵David laltouna-a tou lenghole lengchate, kangtalai le sakolchung chongho, amahole amilenteu Judah mitele Jerusalem'a chengho chu, hiche khopi kotpi sunga lutnuntin, hiche kotpihi a-imatih-a umjing ding ahi.

²⁶Chule amaho Judah khopiho-a konle, Jerusalem kimvela konin, Benjamin gama konle phaichama konin molsang ho-a konle, lhanglama konin govam thil tole ganlhaiho Pakai ina hinpouvinte.

²⁷Ahinla nanghon choldoni jabolna dingle, choldoni-a Jerusalem kotpi-a lutna-a, pohgih pohlouna dinga kathu nangai lou uleh, chuche kotpiho phunga chu mei kakonsah-a, hichun Jerusalem'a leng inpiho akahvama, mitlouhel ding ahitai, ati.