Read Thado Chin Jeremiah 2 Bible Online

Jeremiah 2 - Thado Chin bible

Jeremiah 2

¹Chukalvalin Pakai thu chu kahenga ahung lhungin, hitin aseije,

²Chenlang Jerusalem nakhanga gasamin, Pakaiyin hitin aseije; tin seijin; nakhangdon laija namikhotonale, najite nangailutna, lholou gama, gamthipma kanung najuilai chu kahe jinge.

³Israel chu Pakaiya atheng ahin; Ama puntheina ga masaho anahi. Ama vallhum jouse themo changa; achunguva thilse chuding ahi, tin Pakaiyin aseije.

⁴Vo Jacob insungle Israel insungho jouse, Pakai thuhi ngaitemun,

⁵Pakaiyin hitin aseije, napateu vin kagitlouna ipi amu uva, keija kona chegam lhaova, pannabei nung ajuijuva, pannabei soh-u hitam?

⁶Egypt gama kon eipuidoh uva, gamthip nelgam lhunga, nelgamle kokhuhho lah-a, gamgo gama, thina limnoi, koima chekhah lounale mihem chenlouna gam lhungkeija einapuihoi leuva Pakai chu hoijaba um hitam? tin jong aseipouve.

⁷Chule keiman nangho ninglhinna gam, chu-a gamga le aphatnaho nedingin kanapuilutnin; ahinla nangho chu-a nalut phatnun kagam nasuboh-un, kagouho chu kidah um nasosah taove.

⁸Thempuhon, Pakai chu hoija umtam? atipouve, dan tuhhon keima eiheta pouve. Hou lamkaiho jong kachunga achonkhel taove, chule themgao hon Baal thu aseijun phatchomna bei thilho nung ajuijun ahi.

⁹Hijeh achu, Pakai keiman nathu kasei jingding, chule nachateo chateho thu jong kasei ding ahi.

¹⁰Ajehchu Chittim twikol gam chonsoh in lang ven, Kedar geijin mi solin, hitobang thilhi umnam, gunchu tah-in ngaiton.

¹¹Nam khatnin pathen hilou a-pathen ho akhelkhah uvem? Kamiten vang aphachom lou dingin aloupi nao chu akikhel taove.

¹²Vo nangho vanhon, hiche hi datmouvin, tijat umtah in kichauvin, nangho kamhelun, tin Pakaiyin aseije.

¹³Ajehchu kamiten manthah na thil ni aboluve; amahon hinna twinah keima eidalhaovin, twi veithei louna twikul akilaijuve.

¹⁴Israel chu soh khat ham? In le lou neilou soh hija ham? Ijeh-a ama suhsetna uma hitam?

¹⁵Keipibahkai chalgolin angih-in, ahamin chule agam chu asumangin; akhopiho acheng beihelin ahalvamin ahi.

¹⁶Noph le Tahapanes chaten jong nalu-a lallukhuh asukeh taove.

¹⁷Hichehi Pakai na-Pathen'in lamdunga napuihoile laija ama nadalhah jeh-a nangle nangin nakilamdoh hilouham?

¹⁸Chule nangin Egypt lampia hi Sihor twi dona dinga ipi nabol dingham? Ahiloule vadung twiho donna dinga Assyria lampia hi ipi nabol ding ham?

¹⁹Nangmatah gitlouna chun nangma nasuhdih ding, nanungchona chun nangma naphosal ding ahi, hijeh achu Pakai na-Pathen nadalhah-a, keima ginna nasunga aumlouhi thilphaloule thilkha ahi, ti nahetna namu ding ahi, tin janel Pakai Pathen'in aseije.

²⁰Ajehchu sotlaipeh-a na namkoljon kasuhboh-a, naloiho kasuhmangthah ahitai. Chule nangin, keima chonval taponge natin, molsang chung takiple thingphung hing noi takipma numei kijoh bangin navahlen, nakijoh-in ahi.

²¹Ahinla keiman lengpigui pha, muchi dihtah-a kanaphu nahi. Achutile ibola keidinga mansuhna, gamlah lengpigui keh naso jeng hitam?

²²Ajehchu nangma chang-alin kisopmin lang, sabon tamtah mangjong lechun, nakhangitlouna chu kamasanga kimelchih ahitai, tin Pakai Pathen'in aseije.

²³Nangman kakisuboh poi, Baal kajuipoi iti nati ngam ding ham? phaichama nalampi ven, ipi nabol kihetnin, nangmahi mangang tah sangongsang nu acham chama che;

²⁴Gamthipma um gamlah sangan anopnopma hui donlele, ahuhlai chu kon asuhkih thei ding ham? Aholte jouse lungkham daohen, alha lhinteng amutei dingu ahi.

²⁵Kengchot beija naum louna din chule nadang gotlouna din umin, ahinla nangman, Kinepna aumtapoi, Aumtapoi, ajehchu keiman gamdang mi kangailun, anungu kajui ding ahi, tin naseije.

²⁶Gucha akimatdoh phatle ajachat bangin, Israel insung mite ajahcha taove. Amaho, alenghou, aleng chapatehou, athempuhou chule athemgao houvin,

²⁷Thingbul jah-a, nangma kapa nahin, song jah-a nangin neihin vahdoh ahi, atiuve. Ajehchu amahon eimaingat louvin einungsun taove. Ahivangin amahon agenthei phattah ule, kipat in, neihuh doh-un, tiuvinte.

²⁸Ahinla nangman nakisemthu na-pathen ho chu hoija umtaovem? Amaho chu kipatdoh uhen, nagenthei pet uva nahuhdoh jou uvem? ajehchu vo Judah, nakhopi jouse jatna na-pathen ho umsa ahije.

²⁹Ijeh-a nangho keimatoh kinelkal ihiuvem? Nangho nabonchaovin keima dounan nachonkhel taove, tin Pakaiyin aseije.

³⁰Nachateo chu mohseh-a kajep bep ahitai, kisuhdihnan anei tapouve. Nangho chemjam maman nathemgao hou chu, misugam keipibahkai bangin asugamtan ahi.

³¹Vo, khang mite, nangman Pakai thuhi veuvin, Keima Israel dinga gamthiple muthim gam kahi hitam? Ijeh-a kamiten, keihohi pakaiho kahiuve, nahenga kahunglou dingu ahitai, atiu hitam?

³²Nungah in akivona ho asuhmil theija, ahiloule, mouvin avonho asuhmil theijem? Hinla kamiten nikho simjoulou khopmin eisumil taove.

³³Ijeh-a dongma holna-a nalampi nakisuhjol ham? Hijeh chun migilou chu nalampi ho nahiltan ahi.

³⁴Chule napon mongho-a jong chaga monabei hinnaho thisan beh akimun ahi. Keiman hichehi holguh-a kamu ahipon, phongtah-a kamudoh ahi.

³⁵Ahinla nangman, themona bei kahi jeh-in alunghana keija konin kiheimang teijinte nati-e. Ven, keima kachonsepoi nati jeh-a nathu katan ding ahi.

³⁶Nalampi khelna dinga ibola vahle humhal nahim? Assyria-a najachat lheh banga Egypt jeh-a jong najachat ding ahi.

³⁷Ahi, nakhut naluchunga nangapma, ama-a kona nachedoh ding ahi. Ajehchu Pakaiyin natahsan ho jouse chu alahlousa ahin, amaho-a chu lolhinna nanei lou ding ahi.