Read Thado Chin Jeremiah 20 Bible Online

Jeremiah 20 - Thado Chin bible

Jeremiah 20

¹Tun Pakai insunga vaipo pipuija pang Immer chapa Pashhur Thempu'n, Jeremiah hiche thuho-a agao chu ajatan,

²chuin Pashhur in Jeremiah Themgao chu avon, Benjamin kotpi sunga soulah-a ahenin, hichu Pakai inkom ahi.

³Chuin ajingin ahitin ahi, Pashhur in soulah-a kon chun Jeremiah chu ahin puidohtai. Chuin Jeremiah in ajah-a, Pakaiyin namin Pashhur hilouvin “Magor-missabib” [5] asahtai, ati.

⁴Ajehchu Pakaiyin hitin aseije, ven, nangma tahle nagol ho jouse dinga tijat umtah-a kasem ding nahin, amaho chu amelmateu chemjamin louvuntin, nangin namitna navet ding, chule Judah te jouse Babylon lengpa khutna kapeh-a, aman gal hinga Babylon'a akaija, amaho chu chemjam'a atha ding ahi.

⁵Chukalvala chu hiche khopi haona jouse, atohdoh jouseu, thil manlu jouse, Judah lengte gou jouse chu amelmateu khutna kapehdoh-a, hichu asuh chatvaijuva akilah uva, Babylon'a apoh diu ahi.

⁶Chule nang, Pashhur na-insunga cheng jousetoh gal hinga Babylon gama nacheuva, chuachu nathi ding, nangle jouthu nanaseipeh nagol ho jousetoh chu-a nakivuiden diu ahitai, ati.

⁷Vo Pakai, nangin neijou lhepmin, joulhep kahitai, nangma kei sangin nahatjon, neinajou tai. Keima nisehle i-sah louvin kaumin, mitinin eitotnop naove.

⁸Kathusei chanin kapeng doh-in, hunamle suhmang jeng katijin ahi. Ajehchu Pakai thu chu kei dingin niseh-a mihouset nale i-sah louna ahitai.

⁹Chuin keiman ama chu phahpoh dangting, aminin jong thu seitaponge kati. Ahinla ama thu chu kalungsunga hin, kaguho sunga meikong kilhakhum abangin, kathohlel behsetnin kaumthei tapoi.

¹⁰Ahinla mi tamtah-in eiminset sahnao kajan, ningtina tijatna adime, amahon hehseuvin, hehseuhite akitiuve. Kakihet gilpiho jousen eichanglhi uvin, ijemtin lheplhah-in umintin, eihon ama jouvuhitin, achunga iphu kilah uhite akitiuve.

¹¹Ahinla Pakai chun mihangsan tijat umtah bangin eiumpin, hijeh achu eibolgimho kipal lhuva eijo lou diu, alolhin loujeh uva chu jahcha lheh diu ahin, tonsotna akisuh dongnao chu suhmila umlou ding ahitai.

¹²Ahinla Vo janel Pakai, midih patepna lungsungle lunggil muletsohji, achunguva naphulahna neimusah-in. Ajehchu kachung chang thu nahenga kakhe lhahsoh ahi.

¹³Pakai henga la saovin, Pakai chu vahchoijun, ajehchu aman thilse bolho khutna konin migenthei ho hinna-a ahuhdoh-e.

¹⁴ Kapenni chu sapset hihen lang, kanun eihin ni chu vangboh hidahen.

¹⁵Kapa henga nang dingin chapa khat apengtai tia thu hung lhutna, kapa kipasah pa chu sapset changhen.

¹⁶Hiche mipa chu Pakaiyin asuhchim, lungheilou khopiho toh banghen lang, jingkahle kana, sunphatle kho kisap jahen.

¹⁷Ajehchu kanu chu kalhankhuh anahi theina dingle, chule phattina anaobu keima dinga alet jingna dingin, aman naobu-a konin einathat tapon ahi.

¹⁸Kahinkho jachatna-a lhum mang ding, tohgimna le lunggimna mubep dinga, ibola naobu-a kona kahung pendoh hitam?