Read Thado Chin Jeremiah 21 Bible Online

Jeremiah 21 - Thado Chin bible

Jeremiah 21

¹Zedekiah lengpan Jeremiah henga Melchiah chapa Pashhur le Maaseiah thempu chapa Zephaniah asol laija Pakaiya kona Jeremiah henga thu hunglhung chun aseije,

²Kangeh nahi, keiho dingin Pakai chu neidoh peh-un, ajehchu Babylon lengpa Nebuchadnezzar'in kachunguva gal abolin, chuti ahile athilbol kidangho jouse dungjuijin Pakaiyin eihuvintin, ama keiho-a konin chetouthei nante, ati.

³Chuin Jeremiah'in ajah lhona, nangnin Zedekiah henga hitin seilhonin:

⁴Israelte Pakai Pathen'in vetan, kul polama nangho na-umkol khumuva, Babylon lengpa le Chaldea mite nadouna diu, nakhut uva gal manchah ho chu kanung heiding, chule amaho chu hiche khopi sungahi kahin khopkhom ding ahi.

⁵Chule keimatah-in khut lhangdoh le banthahat toh, lunghangle lungsa tah-a, chule lungnatah puma nangho kasatdiu nahiuve.

⁶Chule hiche khopi sunga chengho mihem le ganhing agoma katha ding, hise nasatah-a kona thiding ahiuve.

⁷Hichejou chun Pakaiyin aseije, keiman Judah lengpa Zedekiah le asohte, chule mipi ho, chule hiche khopi-a hise-a, chemjam'a, kela kona hoidohho chu Babylon lengpa Nebuchadnezzar khutna, amelmateu khutna, ahinnao holte khutna kapehdoh ding, aman amaho chemjam'a atha-a, akhenlou diu, achunga hepina anei louhel ding ahi.

⁸Chule hiche mite henga hiti ahi nasei ding ahi, Pakaiyin hitin aseije, veuvin, keiman namasanguva hinna lampile thina lampi kakoije.

⁹Hiche khopi sunga uma chu chemjam'a, kela, hise-a thiding: ahinla chedoh-a nangho hin um khuma Chaldea miho henga kipelutpa chu hingintin, chule ahinna chu ama dinga gala kichomdoh bangbep hiding ahi.

¹⁰Ajehchu keiman hiche khopi hin thilse atona dinga kamaingat ahitai, thilpha dinga ahipoi, tin Pakai jin aseije. Hichehi Babylon lengpa khutna kipedoh-a, aman meija ahalvam ding ahi.

¹¹Judah lengpa insung thudola, Pakai thu ngaijun, tin seijin.

¹²Vo David insung mite, jingkahle thu tannun lang, misugenthei pa khutna konin hunama kichompa chu huhdoh-un, ajole thilse nabol jeh uvin, koima phelmit theilou kalunghana meikong tobang potdoh getninte, tin Pakaiyin aseije.

¹³Vetemin, eidou diuva koi hungsuh-a, ichen naova koi hunglut dingham? tia seija, vo damphaija chengpa, chule phaicham songpi, Pakai keiman nangma kadouve, ati.

¹⁴Ahinla Pakaiyin natohga dungjuija kabolgima, gammang sunga mei kakousah-a, hichun akimvela thil jouse akahvam ding ahi, ati.