Read Thado Chin Jeremiah 22 Bible Online

Jeremiah 22 - Thado Chin bible

Jeremiah 22

¹Pakaiyin hitin aseije, Judah lengpa ina chesuh-in lang, hiche thuhi gaseijin,

²Vo David laltouna-a tou Judah lengpa, nangle hiche kotpiho sunga lut nasohte le namite, Pakai thu chu ngaijuvin:

³Pakaiyin hitin aseije, nanghon thutan nale chonphatna bolunlang, nanghon mibolgima konin hunama kichompa chu huhdoh un: gamdang mi paneilou ahiloule meithai henga adihloule pumhat boldaovin, hiche mun'a hin setnabei thisan jong sohih-un.

⁴Ajehchu nanghon hitichu nabol uva ahile, kangtalai le sakola amale asohte, chule amite hiche kotpi ahi hunglut uva, David laltouna-a toudiu ahi.

⁵ Ahinla hiche thuho hi nangai louvule, keimatah kaki hahsel ahi, tin Pakaiyin aseije, hiche inhi akeohela hung umding ahi.

⁶Ahinla Pakaiyin, Judah leng insung jah-a hitin aseije, nangma kei dinga Gilead nahin Lebanon luchang nahi: hijengjongle gamthiple mi chenlouna khopi-a kasem teiding nahi.

⁷Chule nadou ding misumang ho, gal manchahto kithocheh kagona, na cedar thing deichomho aphuh uva, mei sunga aselut dingu ahi.

⁸Nam tamtah-in hiche khopihi ahin hopaova, amitakip min aheng akom henga, ibola Pakaiyin hiche khopi lentah hi ahitibol hitam? atidiu ahi.

⁹Chuteng amahon, ajehchu amahon Pakai Pathen thulhun adonpouvin, pathen dangho ahouvuva ajen jeh-u ahi, tia adonbut dingu ahi.

¹⁰Nangho mithi dingin kaphih-un, lunghempi jong bolhih-un: apotdohpa ding joh-in lhasetah-in kapmun, ajehchu ama hung kilekit talou ding, apenna gam jong mukit lou ding ahitai.

¹¹ Ajehchu Pakaiyin hitin ati, hiche mun'a kona potdoh apa Josiah khela lengchang Judah leng Josiah chapa Shallum thudola, ama chulama hung kilekit louhel ding ahitai, ati.

¹²Ahinla gal hinga akaina lamu mun'a chu thia, hiche gamhi amukit louding ahitai.

¹³Chonphat louna-a a-in kisah-a, adihlouva a-indan kisempa, aheng akom manbeija goija, atohman peloupa chu, Ohe! ada ahi.

¹⁴In lentahle indan lentah chule bangkot ho umin kisah inge, tia cedar thinga sa-a, sandul jetna naloi ahi.

¹⁵Nangin cedar jenga najo jeh-a chu nalengchan ding ham? Napa chun aneh-a, adonna, thutannale thudih anabolla, hichu ama dinga anaphalheh hilou ham?

¹⁶Aman vaicha lhasamho thu anatandih jin, hichu amadin anaphalheh ji-e: hichehi keima hetna hilou ham? tin Pakaiyin aseije.

¹⁷Ahinla namitle nalungthim chu nakiloset na dingle, setnabei thisan sona, suhgenthei nale pumhat manna ding bep ahi.

¹⁸ Hijeh chun Pakaiyin, Judah leng Josiah chapa Jehoiakim thudol hitihin aseije, amahon Vo kasopipa, vo kasopinu tia alunghempi loudiu, amahon ama dinga, vo pakai, ahiloule vo jana-a aloupina, tia alunghempi loudiu ahi.

¹⁹Ama sangan kivui banga kivui ding, Jerusalem kotpi kallama kikaija kipaidoh ding ahi.

²⁰Lebanon'a chetouvin lang, gakap temin, chule Bashana gakisenin lang, Abarim'a konin gakapmin. Ajehchu nangai jouse kimanthahsah ahitai.

²¹Keiman naphatna ding kasei ahin, ahinla nangman ngaiponge nati. Hichehi naneolaija na-umchan ahin, hitia chu kathu nangailou ahi.

²²Huijin nakelngoi chin jouse semlih intin, nalungsette gal hinga chediu, nagitlouna jouse jeh-a najachat ding, chule nakisuhdong ding ahi.

²³Vo cedar phunga bu kiset, Lebanon'a chengte, numei naosonat banga natna nachunga ahungchuh phungteng, iti lungset naum tadem?

²⁴ Keima kahing jinge tin Pakaiyin aseije, Judah leng Jehoiakim chapa Koniah [6] chu kakhut jetlama melchihna hijongle chun, kasutlhah ding nahin:

²⁵Nahinna holtehole amaiju nagin jingho, Babylon lengpa Nebuchadnezzar khut ngeija, chule Chaldea miho khutna kapehdoh ding nahi.

²⁶Chule keiman nangmale nahinga nanu chu napenna hilou gamchombeh-a kapuilutna, hia chu nathi ding ahi.

²⁷Ahinla amaho akilekit nomnao gama chu kilekit louhel ding ahiuve.

²⁸Hiche mipa Koniah hi mi isahlou milim chipsa chu hijam? Amahi deilouhel hitam? Ibola amale achilhahte kipaidoh-a, amahon ahetlouvu gama kipaidoh-a hiuvaham?

²⁹Vo leiset, leiset, leiset, Pakai thu chu ngaitemin.

³⁰Pakaiyin hitin aseije, hiche mipahi chaneilou, ahinkho sunga lolhing lou ding ahi, tin suntaovin: ajehchu achilhah khatcha lolhing lou ding, David laltouna-a touva Judah gama vaihom umlou ding ahi.