Read Thado Chin Jeremiah 23 Bible Online

Jeremiah 23 - Thado Chin bible

Jeremiah 23

¹Kakelngoite hamset na-a sugamle thecheh-a kelngoiching ho adau ahi, tin Pakaiyin aseije.

²Hijeh chun kamite vah-a kelngoiching ho douna-in Israelte Pakai Pathen'in hitin aseije, nanghon ka kelngoi hon nathe cheh-un, nano mangun, navil pouve: veuvin, nathil gilou bolu chunga gotna kapeh ding nahiuve, tin Pakai jin aseije.

³Chule ka kelngoi hon amohho chu kadeldohna gamho jouse-a kona kachom khoma, ahong sunguva kalepui kitna, amaho gatheijuva pungthei diu ahi.

⁴Keiman amaho vahdinga achunguva kelngoiching ho katundoh ding, amaho kichatalou ding, lungjong lungthoitalou diu: imacha jong lhasam talou diu ahi, tin Pakai jin aseije.

⁵ Vetan, keiman David dinga chonphatna bah khat katundoh-a, leng khatnin vai ahoma lolhing ding, leisetna thudih-a thu atan ding nikhoho ahung lhunge, tin Pakaiyin aseije.

⁶Ama nikho sunga Judah kihuh hinga, Israel bitkeija cheng ding ahin: chule ama kikouna ding min chu Ichon phatnao Pakai [7] kitiding ahi.

⁷Hijeh chun ven, Egypt gama kona Israel chate hinpui dohpa Pakai chu ahing jinge, atikit louna diu nikhoho chu ahung lhunge, tin Pakaiyin aseije.

⁸Ahin sahlam gamkaija kona kanadelmangna gamkaiho jouse-a kona, Israel insung chilhah hinpui touva, kaihoipa chu ahing jinge, chule amaho agamtah uva cheng dingu ahiuve.

⁹Themgaoho jeh-in kalunghi kasunga apohkeh tan, kagu jouse akilong gamin, Pakai jehle athenna thuho jeh-in, jukhampa jun ajo mipatoh kabangtan ahi.

¹⁰Ajehchu gamsunghi jonthanhoi adimsetnin, kihehsetna jeh-in gamsung alunghemin, gamthip nomlaiho agolhan, alamlhah-u asetan, ahetnao adihtapoi.

¹¹Themgaole Thempu agomin aboh geltan ahi; henge, ka-insunga jong agitlounau kamudohtai, tin Pakai chun aseije.

¹²Hijeh-a chu alampiu chu amaho dinga muthima lamnal tobang hintin, amaho kino lele uva, chua lhugam diu: achunguva thilse kapohlut ding, gotna achan kum-u hiding ahi, tin Pakaiyin aseije.

¹³Samaria Themgaoho lah-a ngolna kamudoh-in, amaho Baal jenga agao vun, kami Israelte achonsetsah taove.

¹⁴ Jerusalem themgaoho lah-a jong tijat umtah thil kamu doh-e: amahon jonthanhoi abolun, jou amangun agitlounauva kona khatcha ahung kile louna din, thilse bolho khuttha ahatsah-un, amaho abonun kei dingin Sodom abangun, chule asunga chengho chu Gomorrah tobang ahiuve.

¹⁵Hijeh chun janel Pakaiyin themgaoho thudol chu hitin aseije, ven, keiman amaho thinglunga kavah-a, thinkha twi kadonsah diu ahi. Ajehchu Jerusalem themgaoho-a konin gamsung pumpi-a kisuhbohna ajaltai.

¹⁶Janel Pakaiyin hitin aseije, naheng uva gao thusei themgaoho thu chu ngaihih-un, amahon manmo nasouva agaothu seiju jong amaho lunggela kon ahin, Pakai kamsunga kon ahipoi.

¹⁷Amahon einahsah louho henga, Pakaiyin asei ahi, nanghon chamna nanei diu ahi, atiuve. Chule amahon amaho lungngaito banga chonho mitin henga chun, nachunga thilse imacha chuponte, atiuve.

¹⁸Ajehchu Pakai thumop na-a koi gadinga, athu ja-a koiham?

¹⁹Vetan, Pakai lungsatna chimpei khohtah ngeichu ahung nunge, hichu migilou luchunga khohtah-a chuding ahi.

²⁰Pakai lunghanna chu atohdoh kahsehle, alung ngaito amolso kahse-a kilekit louding ahin, ninunung tengle chamkimtah-a nahet them diu ahi.

²¹Hiche themgaohohi kasol ahipon, hijongle alhaijun, kenla amaho thu kamoppon, ahinla agaochanguve.

²²Ahinla amaho kathumopna-a dinga hiuhenlang, kamite kathu ajahsah-u hile, amahon alampiu phalouva kon chule athilbolu phalouva kona alehei diu ahi.

²³Keima naitah-a um Pathen, gamlatah-a umlou Pathen chu kahilou ham? tin Pakaiyin aseije.

²⁴Kamuthei louna dinga munthipma kiseljouva mi umintem? Pakai jin ati. Keima vanle leisetna dimsoh kahilouham? tin Pakaiyin aseije.

²⁵Kamina jouva gaova themgaoho thusei kajan, mang kaneije, mang kaneije, atiuve.

²⁶Jouva gaothusei themgaoho lungsunga itih chanpi hichehi umding ham? Henge, amaho alungsung uva mijoulhep themgaoho ahiuve.

²⁷Apateuvin Baal jeh-a kamin asuhmil banguva, aheng akomuva mitinin amang aseijuva, kamite chu kamin suhmilsahna ding angaitou ahi.

²⁸Mangnei themgaovin mangthu seihen lang, kathu neija chun kathu tahsan umtah-in seihen: suhlouchang dinga asi chu ipi ham? tin Pakaiyin aseije.

²⁹Kathuhi meikong tobang hilou ham? tin Pakaiyin aseije. Songpi disela vokeh sehtum tobang hilou ham?

³⁰Hijeh chun vetan, keiman aheng akoma kona kathu gumang themgao takip chu kadou ahi, tin Pakaiyin aseije.

³¹Veovin, aman aseije, tia aleiju mangcha-a themgaoho chu keiman kadouve, tin Pakaiyin aseije.

³²Veovin, mang dihlou gaothua seija miho hille-a, ajounaole anahsahmo naova kamite puise-a, keisola hilou, thu kapeh jong hilouho chu kadou ahi, tin Pakaiyin aseije. Hijeh achu hiche mitehi aphatchom sah louhel diu ahi, tin Pakaiyin aseije.

³³Hiche mitele themgao, ahiloule thempu khattouvin, Pakai pohgih chu ipiham? tia nadoh ule, chuteng nangin ajah uva, ipi pohgih ham? Nangho tahhi kapaidoh ding nahiuve, tin Pakaiyin aseije, tin seijin.

³⁴Chule Pakai pohgih, tia seiding themgaole thempu mipa thudol chu, chuche mipa tahle a-insung chu talen kapeh ding ahi.

³⁵Mitinin aheng akomchehle asopipa cheh henga, Pakaiyin ipi adonbut nem? Chule Pakaiyin ipi aseijem? tia nasei diu ahi.

³⁶Chule Pakai pohgih tia naphahpoh kit loudiu ahitai. Ajehchu amitakip thu chu ama pohgih hiding, ajehchu i-Pathen'u janel Pakai Pathen hingjing thu chu akaleh-in nahei gamtaove.

³⁷Themgaopa henga chu hiti ahi nasei ding ahi, Pakaiyin ipi nadonbut nem? Chule Pakaiyin ipi aseijem?

³⁸Ahinla Pakai pohgih chu, nati uva pat hiche thu nasei jeh-un, Pakaiyin hitin aseije, Pakai pohgih chu tia nasei jeh-un, Pakai pohgih chu natikit loudiu ahi, tia naheng uva thu kahinthot ahi.

³⁹Hijeh chun, ven kei keimatah-in nangho kasuhmil uva, nanghole napateu kapehsa khopi chu kapaidoh-a, ka-angsunga kona kaledoh diu nahiuve.

⁴⁰Chule a-itih-a nachung uva housetnale tonsot jachatna kahin pohlut khumuva, hichu suhmiltih umtalou ding ahi, ati.