Read Thado Chin Jeremiah 24 Bible Online

Jeremiah 24 - Thado Chin bible

Jeremiah 24

¹ Babylon lengpa Nabuchadnezzer in, Judah leng Jehoiakim chapa Jeconiah le Judah milenho, thingthem hole thihthem ho Jerusalem'a kona Babylon'a apuimang nungin Pakaiyin Pakai houin maija chun theichang pocha ni einamu sah-in ahi.

²Pocha khat chu theichang phatah, theichang gamasapen tobang hel ahin, pocha khatjoh chu theichang phaloubeh, nehthei louhel, phamo behseh jeng ahi.

³Chujouvin Pakai chun kajah-a, Jeremiah ipi namu em? eiti, chuin keiman theichang ho kati; theichang phaho chu aphalheh-in, chule phaloutah nehthei louhel, chuti phatmo jeng ahi, kati.

⁴Chuin Pakai thu chu kahenga ahung lhungin aseije,

⁵Pakai Israelte Pathen'in hitin aseije, hiche theichang phamoho bangahi Judah mite, hiche mun'a kona Chaldea gama kasoldohho, gal hinga kikaiho chu aphatna diuva kahet ding ahi.

⁶Ajehchu achunguva aphatna diuva kavet lhih jinga, hiche gamahi kahinlepui ding: kasahdoh-a kasotlhuh lou ding, kaphudetna kabodoh lou ding ahitai.

⁷Keima Pakai kahi ahetdohna diu lungthim khat kapeh-a, amaho kamite hiuva, keima a-Pathen'u kahi ding ahi. Ajehchu amaho alung pumpiuva kahenga hungkile diu ahitai.

⁸Theichang phalou, nehthei hilou, chuti phatmo bang chun tahbeh-in Pakaiyin hitin aseije, Judah lengpa Zedekiah le amilenho Jerusalem'a umden, hiche gama amohho, chule Egypt gamsunga chengho chu, chutia chu kapehdoh ding:

⁹chule kanomangna ding mun jouse-a, seisetle thuchih dinga seichahle gaosap dinga, leiset lenggam jouse-a akisuh khahna diuva chaulele dinga kapehdoh ding ahiuve.

¹⁰Chule keiman amahole apateu kanapehsa gama kona amanthah hel kahseuva alah uva chemjam, kellhah, hiset kasolpeh ding ahiuve.