Read Thado Chin Jeremiah 25 Bible Online

Jeremiah 25 - Thado Chin bible

Jeremiah 25

¹ Judah lengpa Josiah chapa Jehoiakim lengchan kal kumli channa-a, Judah mite jouse chungchang thudol Jeremiah henga hung lhung chu Babylon lengpa Nebuchadnezzar lengchan kumkhatna ahin,

²hichu Jeremiah themgaovin Judah mite jousele Jerusalem'a chengte jouse henga aseije.

³Judah leng Amon chapa Josiah kum somle kumthum na-a pat tuni geijin hichu kum somni le kumthum ahin, Pakai thu chu kahenga ahung lhungin, keiman naheng uva kaseijin, matah-in kathouvin, kaseijin, ahinla nangaipouve.

⁴Chule Pakaiyin naheng uva asohte themgaoho jouse ahinsolin, jingpi-a thouvin ahinsolin, ahinla nanghon nangaipeh pouvin, jahdin jong nanau nasung pouve.

⁵Amahon aseijun, amitakip tuhin alampi phalouva konle thilphalou nabol uva konin hungkileu hen lang, Pakaiyin nanghole napateu atonsot tonsotna dinga anapeh gama chun chengtauvin.

⁶Chule pathen dangho chu jendingle hou dingin juidaovin lang, nakhutsoh uva lunghansah din neiphinse hih uvin, chutile bolsetda taovinge.

⁷Ahijengvangin kathu nangaipouvin, hitichun nakisuh khahna diuva nakhutsoh uva lunghansah din neiphinse uvin, ahi tin Pakaiyin aseije.

⁸Hijeh chun janel Pakaiyin hitihin aseije, nanghon kathu nangailou jeh un:

⁹Veuvin, mi solingting sahlam gama insung jousele kasoh Babylon lengpa Nebuchadnezzar hiche gam dou dingle asunga chengho, chule akimvela namho jouse sumanghel dinga kahinpuija, amaho chun kidang asah-va cheh sasa diu, chule a-itih-a kamhela kalha ding ahi, tin Pakaiyin aseije.

¹⁰ Chukalvala amaho-a kona kipana ogin, thanopna ogin, moulang ogin, mounu ogin, sumhei song kiheh gin, chule thaomeivah kasuhbei ding ahi.

¹¹ Hiche gam pumpihi kamhelle datmotah-a umding, hiche namho chun Babylon lengpa chu kum somsagi ajendiu ahi.

¹²Chule kum somsagi lhinteng hiti ding ahi, akhangit lounao jeh-a Babylon lengpa chule hiche Chaldea mite gam chu talen kapeh-a a-itih-a dinga kamhela kalha ding ahi, tin Pakaiyin aseije.

¹³Chule hiche gam douna-a kaseisa thuho jouse nam jouse douna-a Jeremiah themgaovin anasei, hiche lekhabu kisun jouse ngei chu kahin lhunsah ding ahi.

¹⁴Ajehchu amahon nam tamtah le leng lenho ajendiu, atoh-u dungjuile akhuttah uva athilbolu dungjuija kalethuh ding ahi.

¹⁵Ajehchu Israelte Pathen Pakai chun kahenga hitin aseije, kakhutna lunghanna khonhi lanlang, kasolna ding namho jouse chu donsah in.

¹⁶Chule amahon adonuva alah uva kasol ding chemjamho jeh-a chu lonle leuva ngoldiu ahi.

¹⁷Chuin Pakai khutna khon chu kalan, Pakaiyin eisolna namho jouse chu kadonsah in ahi.

¹⁸Jerusalem le Judah khopiho, chua lenghole milenho chu tulai bangahi kamhela, datmo uma, leihit khongleuva gaosapma umsah dingin,

¹⁹Egypt lengpa Pharaoh le asohte, chule amilentele amipite:

²⁰Mi kichoh hal ho jousele Uz gamsunga lengho jouse, Philistine gamsunga lengho jouse, chule Ashkelon, Azzah, Ekron chule Ashdod na amoh um jouse,

²¹Edom le Moab, chule Ammon chate,

²²Trye lengte jousele Zidon lengte jouse, chule twipi gala twikol gamho lengte,

²³Dedan, Tema, Buz chule gamningkoi kikhonnaho jouse,

²⁴Arabia lengho jousele nelphaija cheng michoplop ho jouse,

²⁵Zimri lengte jousele Elam lengte jouse, chule Media lengte jouse,

²⁶Chule naija gamla sahlam gamkai lengho jouse khat khatna, lei chunga vannoi lenggam jouse, chule amaho nunga chu Sheshach lengpan adon ding ahi.

²⁷Hijeh achu ajah uva Israel Pathen janel Pakaiyin hitin aseije, donun lang kham uvin, chule phidohun lang lhu uvin, thoukit tahih un. Nalah uva kahinsol ding chemjam jehchun, tia nasei ding ahi.

²⁸Chule hiti ding ahi, amahon nakhutna khon chu lah-a donding adaova ahile, nangman ajah uva, janel Pakaiyin nadon teidiu ahi ati, nati ding ahi.

²⁹Ajehchu ven, kamina kivo hiche khopi chunga thilse kahin pohlut patding ahitan, nangho talen manlouvin umun natem? Nangho talen manlouvin umpouvin nate: ajehchu leiset chung cheng jouse chunga chemjam kakou ding ahi, tin janel Pakaiyin aseije.

³⁰Hijeh chun amaho jouse dounan hiche thuho hi gaovin, ajah uva seijin, chunga konin Pakai hung kitumin tin, achenna munthenga konin a-aw hinsodohin tin, thanei tah-a muntheng chunga kituma, lengpiga chilho banga, leiset chunga cheng jouse douna-a aoding ahi.

³¹Leiset kolmong geija aw khat kitollele ding ahi, ajehchu Pakaiyin nam jouse toh kinelna aneijin, aman tahsa hing jouse thu atanna, migiloute jouse chemhema apehdoh ding ahi, tin Pakaiyin aseije.

³²Janel Pakaiyin hitin aseije, vetan, setna chu nam khatna kona nam khatna kitollele ding, chule leiset kolmonga kona chimpei nasatah hungnung ding ahi.

³³Chule chuche ni-a Pakai mitha chu leiset kolmong langkhatna pat langkhat gei hiding ahin, amaho chu kilunghempi louding, kichom khom lou dingu, vui jong kivui louding, amaho leichunga eh-a pangdiu ahi.

³⁴Nangho kelngoiching ho pengun lang kapmun, nangho kelngoihon lah-a pipuiho vut lah-a kilih leuvin, ajehchu nakithana diule naki thecheh na diu nikho abulhing tai. Chule dei umtah um le bel banga nalhahmang diu ahi.

³⁵Kelngoichingpan jamna ding ahetlou ding, kelngoihon lah-a pipuipan jong hoidohna ding aneilou ding ahi.

³⁶Kelngoiching ho ka awgin le, kelngoihon pipuipa pen awgin kija ding ahi. Ajehchu Pakaiyin ahamhing jouse asuhmang pehtai.

³⁷Chule tijat umtah Pakai lungsat jeh-in mongtah-a chennaho akisumang tai.

³⁸Aman keipibahkai chal bangin akiselna adalhatai. Ajehchu suhgentheina tijat umjehle, alungsatna tijat umtah jeh-in gamsung chu akamheltai.