Read Thado Chin Jeremiah 26 Bible Online

Jeremiah 26 - Thado Chin bible

Jeremiah 26

¹ Judah lengpa Josiah chapa Jehoiakim lengchan kipat in, Pakaiya konin hiche thuhi ahung lhungin,

²Pakaiyin hitin aseije, Pakai houin leitola dingin lang, Pakai insunga chibai boh-a hung, Judah khopiho jouse jah-a, ajah uva sei dinga kathupeh thujouse chu cheng khatcha lhajah louvin seijin.

³Hiti achu amahon angaijuva, alampi phalouva kona amitakip akileheijule, amaho thilse bol jeh-a achunguva bol dinga kagotsa thilse akona kalung kisih thei ahi.

⁴Chule nangin ajah uva, Pakaiyin hitin ati, nanghon namasanguva kakoi kadanthupeh najuidinguva;

⁵naheng uva kahinsol kasohte themgaoho, matah-a thouva hungkisol ho thuho ngai ding golouva nadon daole,

⁶ chuteng hiche inhi Shiloh kabahsah-a, leiset nam jouse gaosap kahisah ding ahi.

⁷Hitichun thempuho le themgaoho chule mijousen Pakai insunga Jeremiah thusei chu ajataove.

⁸Tun ahitin ahi, mipi ho jouse henga sei dinga Pakaiyin athupeh Jeremiah in aseichai phatnin, thempuho le themgaoho, chule mijouse chun ama chu amanun, nathitei ding ahi, atiuve.

⁹Ibola nangma Pakai mina nagao chana, hiche inhi Shiloh bang ding, chule hiche khopiho chenna louva kamhel ding ahi natiham? atiuve. Chuin mipi ho chu Pakai insunga chun Jeremiah dounan akikhom taove.

¹⁰Judah milenhon hiche thu chu ajah phatnun, leng ina konin Pakai ina ahung touvun, Pakai in lutna kotpi thah-a chun atoutaove.

¹¹Chuin thempuho le themgaoho, milenhole mipi jouse jah-a chun, hichepahi thi dinga lom ahi. Ajehchu nanghon nanauva najah bangu chun hiche khopi dounan gaothu aseije, atiuve.

¹²Chuin Jeremiah in milenho jousele mipi jouse jah-a, Pakaiyin hiche inle hiche khopi douna-a nanghon najah-u thu jousehi gao dinga eihinsol ahi.

¹³Hijeh chun tun nalampiule nathil bolu kisem phatnun lang, Pakai na-Pathen'u thu ngaijun, chutile Pakaiyin nangho douna-a thilse aphondohsa chu alung kisih kit ding ahi.

¹⁴Keidin vang, veuvin, nakhut uva um kahi. Pha nasah bangule nadei bangun neibol taovin.

¹⁵Ahinla kichentah-in heuvin, keima neithauva ahile nanghotah leh hiche khopi chule asunga chengho chungahi setnabei thisan nakipohlut teidiu ahi. Ajehchu hiche thu jouse naheng uva sei dinga Pakaiyin eihinsol tahmong ahi, ati.

¹⁶Chujouvin milenhole mipi jousen thempuho le themgaoho henga chun, hichepahi thi dinga lom ahipoi. Ajehchu aman ihenguva Pakai i-Pathen'u mina thu asei ahi, atiuve.

¹⁷Chujouvin gamsunga upa phabep akipatdoh- un, mipi akikhomho jouse henga chun aseijun,

¹⁸ Judah lengpa Hezekiah nikho laijin Morasthih mi Micah anagao changin, Judah mite jouse jah-a janel Pakaiyin hitin anati, Zion chu lou banga kikaija, Jerusalem chu alhuh-a umding, chule insahna mol chu gammang munsang bang ding ahi, anatin ahi.

¹⁹Judah lengpa Hezekiah le Judah mijouse chun anatha beh monguvem? Aman Pakai agingin, Pakai chu angeh in, Pakaiyin amaho douna-a thilse anaphondohsa chu alung kisih kit hilouham? Hiti achu ihinnao douna-a thil setah ikilhut khumdiu ahi, atiuve.

²⁰Chule Kirjath-jearim mi, Shemaiah chapa Urijah kiti mi khat jong Pakai minin anagaovin, aman hiche khopi dounale hiche gam douna in, Jeremiah thusei dungjuijin anagaovin:

²¹Chuin Jehoiakim lengpan, agal hat ho jousele milenho jousen ajah phatnun, lengpan ama chu thadin aholtai. Ahinla Urijah in hichu ajah phatnin, akichatan, ajamin Egypt gama achetai.

²²Chuin Jehoiakim lengpan Achbor chapa amin Elnathan chu mi phabep khatto Egypt gama chun asolin ahi.

²³Chuin Urijah chu Egypt gama konin agamandoh-un, Jehoiakim lengpa henga ahinpuijun, aman chemjamin athatnin milhamho lhan sunga athilong chu asepluttai.

²⁴Ahijengvangin amahon ama chu mipi khutna tha dinga apehdoh louna dingun Shaphan chapa Ahikam khut chun Jeremiah chu aumpin ahi.