Read Thado Chin Jeremiah 27 Bible Online

Jeremiah 27 - Thado Chin bible

Jeremiah 27

¹ Judah leng Josiah chapa Jehoiakim lengchan kipat in Pakaiya konin Jeremiah henga hiche thuhi ahung lhungin aseije.

²Pakaiyin kahenga hitin aseije, namkoljon kisemin lang nangonga kivonlang,

³hiho chu Edom lengpa, Moab lengpa, Ammon lengpa, Tyre lengpa, Zidon lengpa henga, Jerusalem'a Judah lengpa Zedekiah henga palai hungjiho khutna gahthot temin,

⁴chule apakaiteu henga asei diuvin thu pen, janel Pakai Israelte Pathen'in hitin aseije, tia apakaiteu henga nasei diu ahi.

⁵Keiman kathilboltheina nasatahle kaban lhang doh-a, leiset chule achunga um mihemle ganhinghohi kasema, hichu pha kasahsah kapehji ahi.

⁶Chule tuahi keiman hiche gamhohi kasohpa Babylon leng Nebuchadnezzar khutna kapehdoh ahitai. Chule gamlah-a, ganhingho jong ama jen dinga kapehtha ahitai.

⁷Chule ama gam mongmong chu ahunglhun kahsen nam jousen ama, achapa, achapa chapa ajen diu ahi.

⁸Chule hung hiti ding ahi, Babylon lengpa Nebuchadnezzar jen nomlou chuche namle lenggam, chule Babylon lengpa namkoljon noija angong donomlou, chuche nam chu chemjam'a, kela, hise-a, ama khutna chu kasuh manghel kahse-a talen kapeh ding ahi, tin Pakaiyin aseijin ahi.

⁹Hijeh chun nathemgao hou, na-aisan hou, namang neihou, ailhim themho, doithemho, naheng uva Babylon lengpa najen lou diu ahi, tiho thu ngaihih-un.

¹⁰Ajehchu amahon, nagam uva kona gamlatah-a nakichona diu, kanomangna diu, namanthaina diuva thujouva gaova ahiuve.

¹¹Ahinla Babylon lengpa namkoljon noija angong do-a, jenho chu, agamuva kaumden sah-a, aleisetnu akilhouva, chengden diu ahi, tin Pakaiyin aseije.

¹²Hiche thuho jouse banghin Judah lengpa Zedekiah henga jong kaseijin, Babylon lengpa namkoljon noija na-ngong donlang amale amite jenin lang, hingin tin kaseije.

¹³Babylon lengpa jen nomlou nam douna-a Pakaiyin anasei chemjam, kel, chule hise-a kona nanghole namite ibola nathi jeng diuham?

¹⁴Hijeh chun, Babylon lengpa najen lou diu ahi, tia themgaoho thusei chu ngaihih-un, ajehchu amahon naheng uva jouva gao ahiuve.

¹⁵Ajehchu keiman amaho kasolpoi, tin Pakaiyin aseije; ahijengvangin amahon kaminin, nangho kanomang theina dingule namanthah theina dinguva, nanghole naheng uva gaochangho, namanthah theina dinguva jouthu-a gaochang ahiuve, ati.

¹⁶Keiman thempuho le hiche miteho jouse henga jong kaseijin Pakaiyin hitin ati, veuvin, Pakai ina umle belho chu Babylon'a kona hung kiletol vahding ahitai, tia gaova themgaoho thu ngaihih-un, amaho thujouva gao ahitaove, kati.

¹⁷Amaho thu ngaihih-un, Babylon lengpa jenun lang, hinguvin, ibola hiche khopi kamhela umding ham?

¹⁸Ahinla amaho themgao ahiuve, Pakai thu amaho-a auma ahile, janel Pakai henga tuhin Pakai ina kidalha umle bel ho, chule Judah lengpa insungale Jerusalem'a ho Babylon'a akitol louna dingin, tuhin taovuhen.

¹⁹Ajehchu khomho, twikongho, akitun naho, chule hiche khopi sunga um le bel amoh kidalha ho chungchang thu chu janel Pakaiyin aseijin;

²⁰Babylon lengpa Nebuchadnezzar'in, Jerusalem'a kona Babylon gamgeija Judah lengpa Jehoiakim chapa Jeconiah le Jerusalem'a umle bel ho, milenho jouse gal hinga akai laija anapoh lou ahi.

²¹Pakai ina kidalha, Judah lengpa inle Jerusalem'a umle bel ho chungchang thu chu janel Pakai Israel Pathen'in hitin aseije.

²²Hitiho chu Babylon'a kipoding, keiman amaho kavil kahse-a, chuachu umdiu ahi, tin Pakai chun aseije; chujoule keiman kale poh-a hiche munahi avela kakoi kitding ahi.