Read Thado Chin Jeremiah 28 Bible Online

Jeremiah 28 - Thado Chin bible

Jeremiah 28

¹ Chuin Judah lengpa Zedekiah lengchan kipat, kum mama chun ahitin ahi, akumlina lha nga lhina-a chun, Gibeon'a mi Azur chapa Hananiah themgao chun, Pakai insunga thempuho le mipi ho angsung tah-a kahenga thu aseijin,

²Janel Pakai Israel Pathen'in hitihin aseije, keiman Babylon lengpa namkoljon kasubong tai, atie ati.

³Babylon lengpa Nebuchadnezzar'in hiche mun'a kona alahdoh-a, Babylon'a apoh Pakai ina umle belho jouse chu, kumni lhin sunga hiche munahi kahin pohlut kit ding ahitai.

⁴Keima Judah leng Jehoiakim chapa Jeconiah le Judah mi sohchang jouse Babylon'a cheho chu, hiche munahi kahin puikit ding ahi, tin Pakaiyin aseije, ajehchu Babylon lengpa namkoljon kaheboh ding ahitai, ati.

⁵Chuin Jeremiah themgaovin Hananiah themgao henga chun themgaoho le Pakai insunga ding mipi jouse mitmu tah in aseijin:

⁶Jeremiah themgao tahchun, hihen, Pakaiyin chutin bolhen, Pakai ina umle belhole gal hinga kikai jouse chu, Babylon'a kona hiche mun'a hinlelhut kit dinga nagaona thu chu Pakaiyin molsohen.

⁷Hijongle tu-a hiche nangle mijouse nakhanga jah dinga kaseihi ngaitemin.

⁸Nangle kei masanga themgao luiho chun, gam tamtah le lenggam tamtah douna thule thilse chule hise thu anagao jiuve.

⁹Themgao chamna thu gaopa chu, chuche themgaovin asei chu aguilhun tengle, themgaopa chu Pakai hinsol tahbeh ahi akihejie, ati.

¹⁰Chuin Hananiah themgaovin Jeremiah themgao ngonga kona namkoljon chu alan, ahehbongtai.

¹¹Chuin Hananiah-in mijouse anga chun, Pakaiyin hitin aseije, Babylon lengpa Nebuchadnezzar namkoljon chu nam jouse ngonga kona kumni lhingset sunga hiche bang ngeijahi kasuhboh ding ahi ati. Chuin Jeremiah themgao chu alampia akichetai.

¹²Chuin Jeremiah themgao ngonga namkoljon chu Hananiah themgaovin aheboh jouvin Jeremiah themgao henga Pakai thu chu ahung lhungin aseije.

¹³Chenlang Hananiah gahilin, Pakaiyin hitin aseije. Nangman thing namkol ho chubou naheboh ahin, hicheho khela chu keiman thih namkol kahin semdoh ding ahi.

¹⁴Ajehchu janel Pakai Israel Pathen'in hitin aseije. Amahon Babylon lengpa Nebuchadnezzar kin aboltheina diuva hiche namho jouse ngonga thih namkoljon hi kabucheh ahitai. Amahon ajencheh diu ahi, gamsa jouse jong kapeh ahitai, ati ahungtin ahi.

¹⁵Chuin Jeremiah themgaovin Hananiah themgao henga, ngaijin tun Hananiah, Pakaiyin nang nasolpoi, nangin hiche mitehohi jou khat natahsan sah ahibouve.

¹⁶Hijeh chun Pakaiyin hitin ati, vetan, leiset chunga kona kapaidoh ding nahi: Pakai douna-a douna thu nahil jeh-in, tukuma nathitei ding ahi, ati.

¹⁷Hitichun Hananiah themgao chu chuche kum mama lha sagina in athitan ahi.