Read Thado Chin Jeremiah 29 Bible Online

Jeremiah 29 - Thado Chin bible

Jeremiah 29

¹ Tun Nebuchadnezzar'in Babylon gama gal hing akaimangho, sohchang upaho, thempuho, themgaoho chule mipi ho jouse henga Jeremiah themgaovin Jerusalem'a kon lekha athot thuchengho chu hichehohi ahi.

²(Jeconiah lengpa le lengnu, nukiso ho, Judah le Jerusalem'a milenho, thingthemho, thih suho, Jerusalem adalhah nungu chun):

³Shaphan chapa Elasah, Hilkiah chapa Gemariah khutna lekha chu apohsah-in ahi (amani chu Judah lengpa Zedekiah'in Babylon lengpa Nebuchadnezzar henga asol ahin):

⁴Janel Pakai Israel Pathen'in Jerusalem'a kona Babylon gama puimanga aumsah, akipuimang sohchangho henga hitin aseije.

⁵Nanghon in kisah-un lang, hia chun chengun, chule hon kibolun lang aga chu neuvin.

⁶Ji neijun lang chanu chapa hingun, nachapateo jiding puipeh unlang, nachanu teo inneipu ho peovin, chutile chanu chapa hinguntin, hia chun pungun natin kemsuh pouvin nate.

⁷Sohchanga kapuimang sahna lama khopi ho-a chun chamna chu holun, chule hiche ding chun Pakai henga taovun, ajehchu chukom cham na-a chu nanghon jong chamna nanei diu ahi.

⁸Ajehchu janel Pakai Israel Pathen'in hitin aseije, nalah uva um nathemgao hou le na-aisan hou chu kilheplhah sah hih helun; nahin mangmat diu namang hou jong nahsah hihhelun.

⁹Ajehchu amaho thujouva kamina aisan ahiuvin, amaho kasol ahipouve, tin Pakaiyin aseije.

¹⁰ Ajehchu Pakaiyin hitin aseije, Babylon'a kum somsagi alhin jouteng, kahin viluva hiche munahi nahung kilekitna dinguva, nangho dinga kathupha kasuh bulhit ding ahi.

¹¹Ajehchu nangho dinga kagon chu thilse hilou chamna, khonunga peh dinga kagon chu kahenai, tin Pakaiyin aseije.

¹²Chuteng neikouvun natin, kahenga hung taovun natin, keiman sanpeh taovinge.

¹³ Nanghon neiholun natin, nalung pumpi-a neihol tengule neimu diu ahi.

¹⁴Namudoh-u hitange, tin Pakaiyin aseije, chule kadel mangnao mun jouse-a konle nam jouse-a konin chomkhom ungting, nasoh chanao kaheimang ding, kasoh chansah naova kona kahin lepui kit ding nahiuve, tin Pakaiyin aseije.

¹⁵Ajehchu nanghon Babylon gama jong Pakaiyin themgao eitundoh peh uve, nati uve.

¹⁶David laltouna-a tou lengpa le hiche khopi sunga cheng mijouse, chule nang hotoh sohchanga chekhom lou nasopiteu Pakai chun hitin aseije, tiuvin.

¹⁷Janel Pakai chun hitin aseije, vetan, amaho chunga chemjam'a, kel lhah-a, chule hise kasola, nehthei hilouhel aphatna phamo theichang banga kasem diu ahi.

¹⁸Chule amaho chu chemjam, kel lhah-a, hise-a kasuhgentheija, leiset lenggam jouse-a chaulele dinga keiman kanochehna nam jouse lah-a chu gaosap dinga, datmo umleh chehsatna, seisetna tohding bepma kapehdoh diu:

¹⁹Ajehchu jingpi-a thouva kisoldoh kasohte themgaoho-a kona ahenguva kathu kathotho chu angaipouve, tin Pakaiyin aseije. Ahinla nangainom pouve, tin Pakai jin aseije.

²⁰Hijeh chun Pakai thu chu, nangho Jerusalem'a kona Babylon'a sohchang hon ngaijun,

²¹Israel Pathen janel Pakai chun Kolaiah chapa Ahab le Maaseiah chapa Zedekiah kamina jouthu-a gaoho chungchang thua chun hitin aseije, veuvin, Babylon lengpa Nebuchadnezzar khutna amaho chu kapehdoh ding, aman namitmu tah uva atha diu:

²²Amanu thu chu Babylon'a Judah sohchang jousen, Babylon lengpan meija asahgop Zedekiah le Ahab bang helin Pakaiyin nachunga bolhen.

²³Ajehchu Israel gama setkhona hel amahon abolun, aheng akom jiteutoh ajongun, kathupeh louva kamina jou asei jeh-un, keima ngei ahe ale hettohsah kahi, tin Pakaiyin aseije.

²⁴Nehelam mite le Shemaiah henga jong hiti ahi nasei ding ahi, atin:

²⁵Janel Pakai Israel Pathen'in hitin aseije, ajehchu nangin Jerusalem'a um mijouse hengale Maaseiah chapa Zephaniah thempu chule thempu jouse henga naminin lekha nathotnin hitin naseije.

²⁶Pakaiyin Jehoiada thempu khelin thempun napansahtan, Pakai insunga vaipole-a pang ding nahin, ngolla kithemput sah tapou chu songkul'a nakhuma nahen ding ahi, ati.

²⁷Hijeh chun tun ibola amale ama neheng uva kithemput sah Anathoth mi Jeremiah chu napholou ham?

²⁸Ajehchu Babylon gama kahenguva sohchana hi asotnin, in kisah unlang asunga chengun, hon kibolun lang aga neuvin, tin thu eihin thotnuve.

²⁹Chuin Jephaniah thempun Jeremiah themgao jahdia lekhathot chu asime.

³⁰Chuin Pakai thu chu Jeremiah henga ahung lhungin, aseije.

³¹Sohchangho jouse henga chun Nehelam mi Shemaiah thudol chu Pakaiyin hitin aseije, Shemaiah'in kasol louva naheng uva jouthu natahsan sah jeh uvin:

³²Hijeh chun Pakaiyin hitin aseije, veuvin, keiman Nehelam mi Shemaiah le achilhah ho talen kapeh-a, hiche mite lah-a cheng ding khatcha aneilou ding, kamite dinga thilpha kabol ding jong chu amulou ding ahi, tin Pakai chun aseije. Ajehchu aman Pakai dounan thu anahilin ahi.