Read Thado Chin Jeremiah 3 Bible Online

Jeremiah 3 - Thado Chin bible

Jeremiah 3

¹Amahon, pasal'in ajinu dahenlang, amanu ama-a konin pot hen, pasal chom khatna hitale, amapa chu amanu koma akilekit dem? Chuche gam chu hatah-a suhboh-a umlou ding ham? atiuve. Ahinla nangma dongma tamtah toh noti'n nakichemin, kahenga nahung kilekit nalaije, tin Pakai jin aseije.

²Munsang ho lam ngan dah-in, pasal tincheng to nalup louna mun umam? Gamthipma Arab ho bangin, amaho din lam tinna natoulen, najon thanhoi nale nagitlou nan gamsung chu nasuboh tan ahi.

³Hijeh chun gohong tuhtangin aumtan, go nunung jong ajutapoi; noti dehpang naneijin, jachat ding nanompon ahi.

⁴Nangman tu-a patnahi, Hepa, nangma hi kakhangdon laija patna eipuihoija chu nahi, tia neikou louding ham?

⁵Ama a-itih-a lunghang jing ding ham? Akhonna geija akoiding ham? vetan, hihochu naseijin thilse najo chanin naboltan ahi.

⁶Leng Josiah nikholaijin Pakai chun keikoma jong anaseijin, Israel kinungchonin abolkhu namu tah-em? Amanu molsang chung jousele thingphung hing noi tina achelen chule akijoh-in ahi.

⁷Chuin keiman, amanun hicheho jousehi aboljou phatnin, keilama hungkilen, kanatin ahi. Ahinla ahung kihei dehpoi, mikitahlou asopinu Judah'in hichu amutan ahi.

⁸Chule keiman, kinungchon Israel chu jonthanhoi jouse jeh-a kapaidoh-a, kadana thu kapeh jing vangin, mikitahlou asopinu Judah chu kichadeh louva, noti'a akichepjing jong kamun ahi.

⁹Chuin ahitin ahi, numei kijoh ahina jalchun gamsung chu asubohtan; chule thingle songhotoh ajongin ahi.

¹⁰Chule hicheng jouse jeh-in tahsanbei asopinu Judah chu alung pumpin kahenga ahung kilehei dehpoi; akilepjo bouvin ahi, tin Pakaiyin aseije.

¹¹Pakaiyin kajah-a, nungchon Israel chu mikitahlou Judah sangin them akichanjoi, tin aseije.

¹²Chenlang hiche thuho hi sahlam sanga seiphonglen, tin Pakaiyin aseije, Kitahna neilou Israel, hungkinungle kitnin, chule kalunghana nachunga chuhsah taponge. Ajehchu keima mikhoto them kahin, a-itih-in lunghang jing ponge, tin Pakaiyin aseije.

¹³Nakhangitlouna bou kihetnin, nangma Pakai na Pathen dounan nasukheltai. Chule nalampi ho chu gamchom miho ding thingphung hing noi tina nathe jah-in, keima aw nangai pouve, tin Pakaiyin aseije.

¹⁴Vo, nungchon chate hung kileuvin, ajehchu nangma kakichenpi nahin, keiman nangho khopi khatna kon khat, insung khatna kon ni ladoh ingting, Zion'a kapui ding nahiuve, tin Pakaiyin aseije.

¹⁵Keiman kalungtoh kelngoiching ho peuvinge, amahon chihnale hetthemna-a nangho navah dingu ahi.

¹⁶Chule hung hiti ding ahi, chuche nikho laiteng, chuche gama nahung punuva, nahungtam phatnile, amahon Pakai thulhun thingkhong tia aseitah lou dingu, geljong ageldohtah lou dingu, viljong avillou diu chule semphatna jong umtalou ding ahi, tin Pakai chun aseije.

¹⁷Chuphatle Jerusalem chu Pakai laltouna atidiu, namtin jouse chu, Jerusalem'a Pakai mina kikhom dingu, alungu gitlouna ngaitona banga chontalou ding ahiuve.

¹⁸Chu nikho chule Judah insung chu Israel insungtoh lhakhom uva, sahlam gama kona hungpot khomdiu, napateu vin alodiuva kapeh gam lamchu ahin jot dingu ahi.

¹⁹Ahinla keiman chate lah-a nangma iti kaumsah-a, namtin janelho gouhoile gam nom chu kapeh ding ham? kanatin ahi. Chule nangin, Hepa tia neikouva, keija kona nakihei mang lou ding ahitai, kanatin ahi.

²⁰Tahbeh-in mikitahlou in-neipi khat, ajipa-a kon apotdoh bangin, Israel insungin jong keima angsunga gilouna aboltai, tin Pakaiyin aseije.

²¹Israel chate kanale taona munsang ho chunga akijadoh tan ahi, ajehchu amahon alampio akaleh-in akisemun, Pakai a-Pathen'u chu asumil taove.

²²Hung kileuvin, nungchon Israel chate, chutile nanung chon nao suhdampeh tange. Ven, keiho nahenga kahunguve, ajehchu nangma Pakai ka Pathen'u nahi.

²³Adihtah-in, lhang ho-a konle mol tamtah ho-a kona huhhingna mudin kakinem kheluve. Dihtah-in, Pakai ka Pathen uva Israel huhhingna chu aume.

²⁴Ajehchu kakhang donlai juva pat kapateule achapateu, achanuteu le aganchahon hou chu jachatnan avallhumtan ahi.

²⁵Eiho jahchan i-umun, lungnoh phahnan eikhu taove. Ajehchu eihole ipateu, ikhangdon uva pat tuni geihin Pakai i-Pathen'u dounan ichonseu vin, Pakai i-Pathen'u awchu inangai tapouve.