Read Thado Chin Jeremiah 30 Bible Online

Jeremiah 30 - Thado Chin bible

Jeremiah 30

¹Jeremiah henga Pakaiya kona thu hunglhung chu,

²Pakai Israel Pathen chun hitin aseije, nahenga kathusei jouse chu lekhabu khatna sunin.

³Vetan, nikhoho chu ahung lhunge, tin Pakaiyin aseije, kamite Israel le Judah sohchangho chu kalepui kit ding ahi, tin Pakaiyin ati. Apateu kapehna gama kakilesah kitna hichu alo dingu ahi.

⁴Hichehohi Israel le Judah chungchanga Pakai thusei chu ahi.

⁵Ajehchu Pakaiyin hitin aseije, keihon chamna thu hilou tijatna, awgin kithing selsul khat kajauve.

⁶Dong leuvin lang veleuvin, pasal'in nao avop ngaijem? I-atile pasal tapouvin numei naosonat thoh banga atai akisot cheh uva, amaiju dangdih deh-a sohdoh gama hitam?

⁷Ohe, hiche nichu aloupi lheh-in, hitichun akibahpi aumpon, hichu Jacob hesoh phattah chu ahin, ahinla hichea kona chu ama huhdoh-a umding ahi.

⁸Ajehchu hiche ni chule hiti ding ahi, nangonga kona namkoljon chu kaheboh-a, ahennaho kasuhtan ding, chule gamdang min amaho soh-a aneitah lou diu ahi, tin janel Pakaiyin aseije.

⁹Ahinla Pakai a-Pathen'ule, katundohpeh ding alengpao David ajenjoh diu ahi.

¹⁰ Hijeh chun Vo kasoh Jacob, kicha hih-in, chule vo Israel, lungthoi hih-in, ajehchu ven gamlatah-a kona nangmale nachilhahte kahuhdoh ding, Jacob chu hungkile kitna koimachan akichatsah lou ding ahitai, tin Pakaiyin aseije.

¹¹Ajehchu nahuhhing dingin kaumpi jinge, tin Pakaiyin aseije: nangho kathecheh nao nam jouse akichainao boljong leng nangho kichaina vang bolhih laijing ting atin, ahinla thutah-a kasuhdih ding nahin, hijongle talen pelouva kalhadoh louhel ding nahi.

¹²Pakaiyin hitin aseije, nakimavona chu damdoh theilou namaput chu nase behset ahi.

¹³Nakikanchah theina din nathu seilhap pehdinga khatcha aumpoi, damna ding lou nanei hihhele.

¹⁴Nangailu jousen nasumil tan, nadon tapouve; nakhangitlouna atam behset jeh le nachonsetna punbe jing jeh-in, melma kimavona in kamavon, mi engse gimbolna in kagimboltai.

¹⁵Ibola nagim jeh-a kap nahim? nakhangit louna tambehset jeh-a, nalungkham nachu suhdam theihoi hilou ahitai. Nachonsetna apun jeh-a hichehi kabol ahitai.

¹⁶Hijeh achu nabahgamho jouse chu kibahgama, nakidoupi jouse khat khatna sohchanga chediu, chule nachomgam ho kichomgama, anchah-a nanei jouse chu anchah-a kapehdoh ding ahi.

¹⁷Ajehchu nachunga damna kalhunsah kitna, namaha ho kadamsah ding ahi, tin Pakaiyin aseije. Ajehchu amahon nangma akinodoh ahi nati uvin, hichehi koimachan adonlou Zion chu ahi, atiuve.

¹⁸Pakaiyin hitin ati, Ven keiman Jacob ponbuh sohchangsa chu kahin puikitna, achenna mun'a kahepi ding, akisetvumna chunga chu khopi chu kasahdoh-a, leng inpi chu aumdan bang banga umkit ding ahi, tin Pakaiyin aseije.

¹⁹Amaho-a kon chun thangvahnale kipana husa gingdoh-in tin, amaho chu punsah ingting, lhomcha hilou diu, loujong loupisah ingting, neocha hilou diu ahitai.

²⁰Achateu jong masanga bangin umuntin, akikhopnao kiphutdet ding, chule amaho sugenthei hojouse talen kapeh ding ahiuve.

²¹Amilunhou chu amaho-a kontah hiuvintin, avaipopau chu amaho lah-a hung hiding, ama chu kinaisah ingting, aman eihin naija hung lutngam jengthei ding ahi, tin Pakaiyin aseije.

²²Chuteng nangho kamite nahiuva, keima na-Pathen'u kahi ding ahi.

²³Ngaijun Pakai lungsatna huipi, tanglouva nungjing huipi chu ahung nunge, hichun migiloute luchang asuhnat ding ahi.

²⁴Hichu abolchai kahsehle alunggot phalou chu amolso kahse-a, Pakai lungsat tijat umtah chu dailha louhel ding ahi. Ninunung lamteng hin ngaito taovinate.