Read Thado Chin Jeremiah 31 Bible Online

Jeremiah 31 - Thado Chin bible

Jeremiah 31

¹Hiche phat tah chule, keihi Israel pumpi Pathen hingting, amaho jong kamite hitaovinte, tin Pakaiyin aseije.

²Israel choldosah dia kachelaitah chun, chemjam'a thimoh hochun, gamthipma lungsetna akimutaove, tin Pakaiyin aseije.

³Masangin Pakai kahenga akilah-in, hitin aseije, keiman nangma tonsot lungsetna-in kalungsetnin: hijeh chun lainatna-in kakaile jinge.

⁴Vo nungah theng Israel, keiman nasaphang ting sahphat nahi ding ahitai: na cha'ngeng ho-a nakijephoi kitna, kipah thanop bolho lamna-a nachedoh ding ahi.

⁵ Samaria molsangho chunga lengpigui nakiphuna laija aphuthon aphuva, agachu aneh diu ahi.

⁶Ajehchu Ephraim mol chunga khongah hon, nangho kipat un Pakai i-Pathen'u heng, Zion'a chetou vuhite, tia asapna diu nikho khat hungum ding ahi.

⁷Pakaiyin hitin aseije, Jacob din kipah-in la saovin lang, namtin haosaho lah-a aodoh-un: phongjalun, vahchoijun lang, Vo Pakai, Israel amoh umsun namitehi huhdoh-in, tiuvin.

⁸Veuvin, sahlam gama konin hinpuijing ting, leiset kolmonga konin khoming ting, alah uva chun mitcho elbai, numei naovop, numei naoso natna na, mihon atama tam hung kilekhom diu ahi.

⁹Kappum pumin hunguntin, kalhep lhepma kapui ding, vadunglen twilah lamdih tah-a chesah ungting, hia chu kipalhu loudiu ahi. Ajehchu keima Israel pa kahin Ephraim chu kachapa lenpen ahi.

¹⁰Vo nangho namtinho, Pakai thusei ngaijun lang, twikol gam gamlatah-a phongjalun, Israel thechehpa chun achopkhom kitna, kelngoi chingpa banga amaho chu achin ding ahitai, tin aseije.

¹¹Ajehchu Pakaiyin Jacob alhatdoh-in, asanga hatjopa khutna konin alhatdohtai.

¹²Hijeh achu hunguva Zion chungvuma la ahinsah diu, Pakai phatna, suhlouchang, lengpitwi, thaotwi, kelngoihon noutele ganchahon noute chunga kipah uva, ahinkhou chu hon twi kichapnou jing bang hiuva, lunghem kit talou hel ding ahitaove.

¹³Chuteng nungah theng chu gollhanghole tehse ho toh lamna-a kipah khomdiu ahi. Ajehchu alunghem nao kipana-a kaheidoh-a, kalhamona, alunghem naova kona kakipasah ding ahi.

¹⁴Thempuho hinna chu tahsa damtheina-a kalunglhai sah-a, kamite chu kaphatna-a lunglhai diu ahi, tin Pakaiyin aseije.

¹⁵Pakaiyin hitin ati, Ramah-a lunghemnale nasatah-a kana awgin akijai, Rachel'in achate aka akan, aumlou jeh uvin lhepbi ding anomtapon ahi.

¹⁶Pakaiyin hitin aseije, naka awginle namitlhi lonna-a konin haijin, ajehchu nathilbol kipaman umding ahi, tin Pakaiyin aseije, chule amaho amelmate gama kona hung kilekit diu ahi.

¹⁷Nakhonung ding thua kinepna aume, tin Pakaiyin aseije, chutia chu nachate agamsung lamuva hungkit teidiu ahi.

¹⁸Keiman Ephraim kagin kaja monge, nangin neiseh gimin, bongchal namkoljon pokhalou bangin neiseh gimtai. Nei lehei lechun kihei kit tange, ajehchu Pakai ka Pathen nahi.

¹⁹Tahbeh-in kakilehei nungin kakisih tai. Eikihil nungin kapheipi kabengin, kajah achan, kaneo laija minsetna chu kapohjing jeh-in, kakisudong heltai.

²⁰Ephraim kachapa deitah ham? Ama kalungtoh kacha ham? Ajehchu ama douna-a thu kasei chanin lungset tah-in kageldoh jing nalaije, hijeh chun ama dingin kasung akithingin, ama kahepi mongding ahi, tin Pakaiyin aseije.

²¹Lampi melchihna kisemin lang, sangtah-in kiset vumin, nagachena lampi, lamlhongpi lam geljingin, Vo nungah theng Israel, hung kihei kitnin, hiche nakhopi lama hung kiheijin.

²²Vo nang chanu nungchonnu, itihchan navale ding ham? Pakaiyin leisetna thilthah khat asemin, numei jin pasal adei ding ahi.

²³Janel Pakai Israel Pathen'in hitin aseije, asohchan naova kona kalepui kit tengle, Judah gamle akhopiho-a chu hitobang kamso, Vo thudihtah chenna, Vo thenna mol, Pakaiyin phatthei boh-in, tihi amankit diu ahi.

²⁴Chuachu Judah tele akhopi jouse-a mite, loubol mihole kelngoihon vahho chengkhom diu ahi.

²⁵Ajehchu cholte kavahva-in, lungkhamte kahaldohsah tai.

²⁶Hiche thua hin kahung khangin, kavelen, chule ka-imut chu anomlheh-e.

²⁷Vetan, Israel insungle Judah insunga mihem muchile sahem muchi katuna ding nikho chu ahung lhunge, tin Pakaiyin aseije.

²⁸Chule hiti ding ahi, amaho botdoh-a, subonga, pailha-a, sumanga chule suhgenthei dinga kachan jing bangahi, sadoh dingle phutpha dinga kachan jing ding ahi, tin Pakaiyin aseije.

²⁹ Hiche nichule paten lengpiga thuh aneuvin, chate ha ajatai atikit louhel dingu ahi.

³⁰Ahinla amitakip ama amacheh khangitlouna-a thia, lengpi ga thuh nechan chu, ama hacheh jading ahitai.

³¹ Vetan, Israel insungle Judah insungtoh thulhun thah khat kasemna ding nikho ahung lhunge, tin Pakaiyin aseije.

³²Keima amaho dinga ajipau hijongleng, apateu Egypt gama kona puidoh dinga akhutnuva kakai ni-a thulhun kanasem asuhkeh-u tobang chu hilou ding ahitai, tin Pakaiyin aseije.

³³ Ahinla chuche nikhoho jouva Israel insungtoh thulhun kasem ding chu hichehi ahi, tin Pakaiyin aseije. Asunguva kadanthupeh koijing ting, alungsung uva kasutlut ding, chule a-Pathen'u kahia, amaho kamite hidiu ahitai.

³⁴ Chule koimachan aheng akomle asopi takip jah-a Pakai chu hen, atilou diu ahitai. Ajehchu aneopena pat alenpen geija eihet soh hel diu ahitai, tin Pakaiyin aseije. Ajehchu akhangit lounao kangaidam-a, achonsetnao kageldoh kit louhel ding ahitai.

³⁵Suna vahdinga nisa pe-a, jana vahdinga lhathahle ahsi ho vahding dan sempeh-a pepa, twipi kinong ginglul lula homkhenpa, Pakai chun hitin aseije, janel Pakai chu amin ahi.

³⁶Hiche danho chu kamasanga keija kona achemangle, Israel chilhah jong namkhat ahina-a kona, a-itih-a dinga kamasanga beihel ding ahi, tin Pakaiyin aseije.

³⁷Pakaiyin hitin aseije, chunga van khu akite theija, noija leiset kingapna hohi holdoh thei ahilebou, kenjong Israel chilhah jousehi, athilbolhou jouse jeh-a kapaidoh diu ahi, tin Pakaiyin aseije.

³⁸Vetan, Hananeel insanga patna kul ning kotpi geija Pakai khopi kisahdohna ding nikho chu ahung lhunge, tin Pakaiyin aseije.

³⁹Chule thil tena khao chu Gareb lhangchung jona kilhung jangpetna chule Goath akolkhum ding ahi.

⁴⁰Thilonghole vut kinotna damphai pumpile Kidron luipi gei loujao jouse, solam sanga sakol kotpi, ning geija chu Pakai dinga atheng hiding ahin, a-imatih-a kibotdoh-a kiseplha kit louhel ding ahitai.