Read Thado Chin Jeremiah 32 Bible Online

Jeremiah 32 - Thado Chin bible

Jeremiah 32

¹ Judah lengpa Zedekiah lengchan kum som lhin kum, hichu Nebuchadnezzar lengchan kal kum somle kum get lhin kum chun, Jeremiah henga Pakaiya konin thu ahung lhungin ahi.

²Ajehchu hichelai chun Babylon lengpa sepaihon Jerusalem aumkulun, Jeremiah chu Judah lengpa inhong sunga, mihenna ina akulkhupmun ahi.

³Ajehchu Judah lengpa Zedekiah chun ama chu ahentupma hitia asei ahi, ibola nangman gaothu naseija, Pakaiyin hitin aseije, Veuvin, keiman hiche khopihi Babylon lengpa khutna kapeh-a, aman ahinlah ding ahi;

⁴Chule Judah leng Zedekiah chu Chaldea miho khutna kona hoidoh lou ding, Babylon lengpa khutna kapehdoh joh-a, akamtah-a akihoupia, amitnin ama mit avet ding ahi.

⁵Chule Zedekiah chu Babylon'a apuija, keiman kavil kahse-a chu umding ahi, tin Pakaiyin aseije. Chaldea miho chu kisatpi jongleu chun lolhing pouvinte, tin Pakaiyin aseije, tia naseiham? ati.

⁶Chuin Jeremiah chun Pakai thu chu kahenga ahung lhungin hitihin aseije, ati.

⁷Vetan, napangah Shallum chapa Hanameel nahenga hungintin, Anathoth'a um kalou kichoh-in, ajehchu chohna ding lhatdohna thahat naneije ati ding ahi.

⁸Hitichun kapangahpa chapa Hanameel chu, Pakai thu dungjuijin kihenna hongsunga kahenga ahungin, kajah-a aseije, Benjamin gama Anathoth a kalou chu goulo thei nahijeh-a nalhatdoh ding ahi, nang dingin kichoh-in, ati. Hichun hichehi Pakai thu ahi kahetai.

⁹Chuin kapangahpa chapa Hanameel lou, Anathoth a um chu kachon, sumchu katepeh-in dangka shekel somlesagi jen ahi.

¹⁰Chuin lekha kajih-in kamin kasunin, namdet kanamun ahetoh kakouvin, sumchu agihdan katepehtai.

¹¹Chuin kichohna lekha chu chondanle angai dungjuijin, akichohdan kisutna namdet kinamsa lekha chu kaladoh-in hichu akiphong dohsa ahi.

¹²Chuin kichohna lekhabu chu Maaseiah chapa Neriah chapa Baruch chu, kapangahpa chapa Hanameel mitmule akichohna-a minchong ahettohho mitmun chule kihenna hongsunga tou Judah te jouse anga chun kapetan ahi.

¹³Chuin amasanguva Baruch chu thu kapen,

¹⁴Israel Pathen janel Pakaiyin hitin aseije, hiche kichohna lekha, sinkhana kinamle kichohna lekha kihonghi akopmin lanlang, sottah aumtheina dingin leibel sung khatna koijin.

¹⁵Ajehchu janel Pakai Israel Pathen'in hitin ati, hiche gama inho, louho, lengpilei ho hi hinkilo kit ding ahi, ati.

¹⁶Tun kichohna lekha chu Neriah chapa Baruch kapeh phatnin Pakai henga kataovin,

¹⁷Vo Pakai Pathen, vetan, nathilboltheina nasatahle naban jahdoh-in, leile van nasemin, nangma dingin ahahsa ima aumpoi.

¹⁸Asang asang henga lungset le khotona namusah-in, chule pate khangitlouna chu anunguva achateu chunga nalethuh jin: Loupitah, Pathen Hattah, janel Pakai chu amin ahi.

¹⁹Thumop themtah, thilbol hattah, mihem chapate jouse atoh dunjui cheh-a lethuhna pedinga alamlhah jouseu vejing nahi,

²⁰Egypt gama melchihna le datmo bola, tuni geija Israel le midangho lah-a boljom jinga, tunia bang banga min khat hin kiboldoh-a,

²¹Egypt gama kona nami Israelte melchihna hole datmoho-a, khut thahattahle banjahdoh-a, chule tijatna nasatah puma hinpuidoh-a,

²²hiche khoijule bongnoi lonna gam, apateu pehdinga anakihahsela, amaho anapepa,

²³chuin ahung lutnun alotauve, ahinla nathu angai hih-un, nadanthupeh-a jong achonpouve. Aboldiuva napeh jouse khatcha abolpouve. Hijeh achu hiche thilse jousehi achunguva nalhunsah ahitai.

²⁴Mol ho khu vetemin, khopi lodingin amaho ahungtaove, chemjamle kellhah, chule hise jeh-in, galla hinsatna Chaldea mite khutna khopihi pehdoh-in anaumtan, naseisa chu aguilhung tai, vetan, nangin namun ahi.

²⁵Chule Vo Pakai Pathen, nangin kahenga, lou chu sumin kichoh inlang, khopihi Chaldea mite akipehdohtah jeh-in, ahetoh ding mi kikoijin, natin ahi.

²⁶Chuin Pakai thu chu Jeremiah henga ahung lhungin, aseije,

²⁷Ven, keima Pakai tahsahing jouse Pathen kahi, keima dinga thil hahsa behseh ipi umam? ati.

²⁸ Hijeh chun Pakaiyin hitin aseije, vetan, hiche khopihi Chaldea mite khutna, Babylon lengpa Nebuchadnezzar khutna pengting, aman alah ding ahitai.

²⁹Chule hiche khopi hinsat Chaldea mite chu hunguntin, hiche khopihi ahal uva, lunghansahna dinga eiphinset nao, Baal dinga gimnamtui ahalnau, inchunghole Pathen dang dinga don thilpeh asunlhah nao chu akahvam gamding ahitai.

³⁰Ajehchu Israel chatele Judah chaten aneulaijuva pat kamasanga thilse jengbou aboluve. Ajehchu Israel chaten akhutnuva athilbol jaluvin eiphin lunghang jinguve, tin Pakaiyin aseije.

³¹Ajehchu hiche khopihi asahdoh uva pat tuni geija kalunghana le kalungsatna dinga phinsetna khopi anahin, kamasanga kona kachon mang ding ahi.

³²Israel chatele Judah chate amaho, alengteu, amilenhou, athempuhou, athemgaohou, chule Judah mihole Jerusalem'a chengten, keima lunghan sah-a phinsetna dinga thilse abol jeh-u ahi.

³³Matah-a thouva kahil vangin, akihilnao kisanding agelkhoh pouve, anung eingatnun, eimaingat pouve.

³⁴ Kamina kivo in chu suhbohna dingin, thet umhou chu atunglut jiuvin ahi.

³⁵ Amahon Hinnom chapa phaicham, kathupeh louhel kalunga jong chengkhalou, Judah chonsetsah nadingin thil thet umtah abolun, achapateule achanuteu Molech henga meija pehdohna dingin Baal munsang ho asadoh-un ahi.

³⁶Hijeh chun tuhin Pakai Israelte Pathen'in, hiche khopihi chemjam, kel, hiset jeh-a Babylon lengpa khutna kipedoh ahitai, natiu thudola chun hitin aseije,

³⁷Vetan, keiman amahohi kalungnatna, kalungsatna, kalunghana nasatah jeh-a, kana nomangna gamtina kona kakhop khom kitna, hiche munahi kahinpui kitna, mongtah-a kachensah ding ahi.

³⁸Chule amaho kamite hiuva, Keima a-Pathen'u kahi ding ahi.

³⁹Keiman amahole amaho nunga achateu phatna dinga, a-itih-a eigin theina diuva lungthim khatle lampi khatseh kapeh diu ahi.

⁴⁰Chule amaho phatna ding kabolpeh-a kona kakiheimang louna dinga, amahotoh tonsot thulhuhna kasemdoh-a, amaho keija kona akiheimang louna diuva, alung sunguva eikichatnao kakhum peh dingu ahi.

⁴¹Ahi, aphatnao bolpeh chu kakipana lam hintin, kalung pumpile kahinna pumpi-a hiche gamhi kaphudet mongding ahi.

⁴²Ajehchu Pakaiyin hitin aseije, hiche mite chunga thilse nasatah jouse kahin pohlut khum bangahi, amaho kanateppeh thilpha jouse chu kahin pohlut peh ding ahiuve.

⁴³Nanghon mihemle ganhing beina gamgo hi, Chaldea mite khutna kipedoh ahitai, tia nasei laiju gamho chu kichodoh soh ding ahitai.

⁴⁴Benjamin gamle Jerusalem khopi vel munho-a, chule Judah khopiho-a, lhang gama khopiho-a, chule phaicham khopiho-a louho chu mihon suma achoh uva, kichohna lekha asutnuva, namdet anamuva, hettohsah ho akoicheh diu ahi. Ajehchu keiman asohchannau chu kakilesah kit ding ahi, tin Pakaiyin aseije.