Read Thado Chin Jeremiah 33 Bible Online

Jeremiah 33 - Thado Chin bible

Jeremiah 33

¹Chukalvalin kihenna hongsunga akulkhup laijun Jeremiah henga, Pakai thu chu aniveina in ahung lhungin, aseije,

²Leiset hinsempa, ijakai hingong tohpa Pakai chun hitin aseije, Pakai kiti chu ama min ahi.

³Neihin kouvin, keiman donbut-ing ting, nahetkhah louvu thil lentahle loupitah vetsah inge,

⁴Ajehchu molhole chemjam'a kisuchim hiche khopi inhole Judah lengte inho chungchang thudol chu Pakai Israel Pathen'in hitin aseije,

⁵Amaho Chaldea mite toh kisat dingin ahungun, ahinla kalungnatnale kalungsatna-a kathagam thilongho chun adipjoh dingu, chule agitlounahou jouse jeh-a hiche khopi-a kona kamai kasel ahitai.

⁶Vetemin, damtheina le damdohna hinpong ting, amaho damsah ingting, chamnale thudih lhingset kamusah ding ahi.

⁷Keiman Jadah le Israel sohchana chu kinunglesah ingting, amasa-a banga kasahphat kitding ahi.

⁸Keima douna-a achonsetnao, athemo nao jouse-a konin thensah ingting, akhangit lounao jouse kachunga achonsetnao leh kachunga asuhkhelnau jouse ngaidam tange.

⁹Chule hiche khopihi leiset nam jouse, adiuva kabolphat jouse muho masanga chu, kei dinga kipanale vahchoina, chule loupina hintin, phatnale khantouna kalhunsah jouse jala kicha-a kithing thing diu ahi.

¹⁰Pakaiyin hitin aseije, hiche mun, nanghon mile sa umlouna ahomkeo ahi natinao mun Judah khopihole Jerusalem khosung lamlen mile sa, acheng beina natiu mun ahi,

¹¹ thanopnale kipana aw, moulangle mounu aw, janel Pakai chu vahchoijun tia aseidiu aw, ajehchu Pakai chu aphan, ahepina itih-in aumjinge, chule Pakai in'a vahchoina ganlhaina hinchoiho hugin kija kit ding ahi. Ajehchu masanga banga, gamsunga sohchangho chu kakinungle sah ding ahi, tin Pakaiyin aseije.

¹²Janel Pakaiyin hitin aseije, mile sa umlouna gamgoh, hiche munahi, chule chuche khopiho jouse sung chu, kelngoihon ho kolsah nale kelngoiching ho chenna mun hung hiding ahi.

¹³Mola khopiho-a, phaicham khopiho-a, lhanglam khopiho-a, Benjamin gamsunga, Jerusalem kimvel munho-a, Judah khopiho-a chu ahilteu khutnoija kelngoihonho kijotjot jengdiu ahi, tin Pakaiyin aseije.

¹⁴ Vetan, Israel insungle Judah insung chungchanga thilpha kathutep chu kamolso ding ahi, ati nikhoho chu hunglhung ding ahi, tin Pakaiyin aseije.

¹⁵Chuche nikhoho-a, chuche phatteng David dinga chonphatna bah kajamdohsah-a, aman gamsunga chu thutannale chonphatna apohdoh ding ahi.

¹⁶Hiche laichule Judah huhhingin umintin, Jerusalem bitkeija umding ahi; chule akihouna ding min chu Ichon phatnao Pakai [8] kitiding ahi.

¹⁷ Ajehchu Pakaiyin hitin aseije, Israel insung laltouna-a touding chu David lhasamkha louhel ding ahi,

¹⁸ Ahiloule thempuho, Levi ho jong kamasanga govam thilto chule anneh thilto le tanglouva ganlhaina bolding lhasamkha louhel ding ahi.

¹⁹Chuin Pakai thu chu Jeremiah heng ahung lhungin, aseije.

²⁰Pakaiyin hitin aseije, nanghon sun le jantoh kakitepna nasukeh jou uva chule hiti achu sunle jan aphatcha aumthei louva ahile,

²¹Chuteng kalhacha David toh kakitepna jong kehthei bouvinte, alaltouna-a touding chapa aneilou ding bou ahin, Levi ho thempuho, kalhachaho toh kakitepna jong chuti ding ahi.

²²Van janelpi kisim joulou bangle, twipi neldi kitejoulou banga, kasoh David chilhahle kahenga kinbol jing Levi te chu, hitobanga chu kapunsah ding ahi, ati.

²³Chukalvalin Pakai thu chu Jeremiah henga ahung lhungin, aseije.

²⁴Insung ni Pakaiyin alhen chu apaidoh geltai, tia hiche miten aseiju chu nangaito khahlouvu ham? Amahon kamite i-sah louvin abolun, chutia chu amaho masanga namkhat hikit louhel diu ahitai.

²⁵Pakaiyin hitin aseije, sun le jantoh kakitepna chu aumdet louva, leile van umding dan kana gontoh lou hile,

²⁶Jacob chilhahhole kasoh David chu kapaidoh hella, Abraham, Isaac chule Jacob chilhah chunga vaihom ding achilhah khatcha kalhen louding ahi. Ajehchu keiman asohchannau kakinungle sah-a, achunguva hepina kanei ding ahi, ati.