Read Thado Chin Jeremiah 36 Bible Online

Jeremiah 36 - Thado Chin bible

Jeremiah 36

¹ 1 Judah lengpa Josiah chapa Jehoikim lengchankal kumli lhina in ahitin ahi, Pakaiya konin Jeremiah henga hiche thuhi ahung lhungin, hitin aseije.

²Lekhajol bukhat lanlang, nahenga Israel thudol, Judah thudol, chule nam jouse thudol Josiah nikho laija patna tuni geija nahenga kanasei jouse chua chun sunlutnin.

³Achunguva thilse bol dinga kagot jouse Judah insung miten ajah theina diuva, hiti achu mitin achonphatlou naova kona akiletheijuva, akhangitlou naole achonsetnao kangaidam theina diu ahi, ati.

⁴Chuin Jeremiah chun Neriah chapa Baruch chu akouvin, Baruch chun Pakai thu jouse ahenga anaseisa chu Jeremiah kama konin lekhajol bukhatna ajihlut tai.

⁵Chuin Jeremiah chun Baruch chu akouvin, keima kikulkhup kahin, Pakai insunga kache theipon ahi.

⁶Hijeh chun chenlang, kakama kona najah Pakai thu lekhajol nasut chu anngol nile, Pakai ina mipi ho jahdin gasim doh-in, akhopiuva kona hungdoh Judah te jouse jahdia nagasim doh ding ahi, ati.

⁷Chutile ataonao Pakai angsung hung lhungintin, amitakip achonphatlou naova kona hung kilehei thei diu ahi.

⁸Chuin Neriah chapa Baruch chun Jeremiah themgao thupeh jouse bangtah chun, Pakai in'a Pakai lekhabua thu chu asimdohtai.

⁹Chuin Judah leng Josiah chapa Jehoiakim lengchankal kum nga lhina lhako na-in ahitin ahi. Jerusalem'a mijousele Judah khopiho-a kona Jerusalem'a hungho jouse jahdin Pakai masanga, anngol thu aphong taove.

¹⁰Chuin Baruch in Pakai in'a chun Jeremiah thu chu lekhabua, lekhasun Shaphan chapa Gemariah indan-a, inhong chungnung jo-a, Pakai in kotpithah lutna-a chun, mijouse jahdin asimdohtai.

¹¹Shaphan chapa Gemariah chapa Michaiah chun, Pakai thu jouse lekhabua kona ajahdoh phatnin,

¹²Lengpa insunga lekhasunpa indan sunga chun achesuh-in ahile, vetan hia chun milen jouse lekhasun Elishama tahjong, Shemaiah chapa Delaiah, Achbor chapa Elnathan, Shaphan chapa Gemariah, Hananiah chapa Zedekiah chule milen jouse anatouvun ahi.

¹³Chuphatnin Michaiah chun mipi ho jahdinga lekhabu asim, athu jouse chu ajah uva aphongdoh tai.

¹⁴Hijeh chun Kushi chapa, Shelamiah chapa, Nethaniah chapa Jehudi chu milenho jousen Baruch henga asolun, mipi jahdinga nasim lekhajol bu chu hinchoi jinlang, hungin, atiuve. Hitichun Neriah chapa Baruch chun lekhajol chu ahenguva ahinchoijin ahi.

¹⁵Chuin amahon, tun touvin lang, keiho jahdin hinsimin, atiuve. Hitichun Baruch chun amaho jahdin asimtai.

¹⁶Tun ahitin ahi, amahon thu jouse chu ajah phatnun, amaho khatle khat akicha taovin, Baruch jah-a chun keihon hiche thu jousehi lengpa kaseipeh tei dingu ahi, atiuve.

¹⁷Chuin amahon Baruch chu adongun hitin aseijuve, hiche thu jousehi akama kona itijong najih ham? neihilun atiuve.

¹⁸Chuin Baruch chun, hiche thu jousehi akamin eihilin, lekhatuija lekhabua kasutjeng ahi, tin adonbutne.

¹⁹Chuin milenho chun Baruch henga, chenlang nangle Jeremiah kisel lhonin, koiman na-umnao hetdahen, atiuve.

²⁰Chuin inhong sunga lengpa henga alut lhonin, lekhajol vang chu lekhasunpa Elishama indan sunga adalha lhonin, thu jouse chu lengpa jahdin ahil lhone.

²¹Hitichun lekhajol ladin lengpan Jehudi chu asolin, lekhasunpa Elishama indan-a konin agaladoh tai. Chuin lengpa le lengpa vela ding milenho jah dingin Jehudi chun asimin ahi.

²²Tun lhako na-in lengpa Phalbi laile aumjina insunga atouvin, amasanga meikhuh-a chun mei akongin ahi.

²³Chuin ahitin ahi, Jehudi'n phengthum phengli asimjouvin, chemcha khatnin a-at tanin, thuh-a mei chun akahvamhel kahsen, thuh meija chun asepluttan ahi.

²⁴Ahinla lengpa le akinbolho, hiche thu jouse ngaiho koimacha akicha pouvin, apon bottela jong aumpouve.

²⁵Ahijengvangin lekhajol chu ahal louna din Elnathan, Delaiah chule Gemariah chun lengpa chu angeh un, ahinla amaho thu angaipehpoi.

²⁶Ahin lengpan lekhasun Baruchle Jeremiah themgao mandin, Hammelech chapa Jerahmeel, Azriel chapa Seraiah, Abdeel chapa Shelemiah thu apen, ahinla Pakaiyin amani chu aseltai.

²⁷Chuin lekhajol le Jeremiah kama kona Baruch in ajih thuho jouse lengpan ahalvam jouvin, Pakai thu chu Jeremiah henga ahung lhungin ahi.

²⁸Lekhajol bu adang lanlang, lekhajol bu masa-a thu jouse, Judah lengpa Jehoiakim ahalvam saho chu jihdoh kitnin ati.

²⁹Chule Judah lengpa Jehoiakim henga chu hiti ahi nasei ding ahi. Pakaiyin hitin aseije, Babylon lengpa chu hungtei ding hiche gamhi asuhmanga, hichea patna chu mile sa kisubei ding ahi, tia kijihna chu, ibola chutobang thu najih ham? natin lekhabujol kisun chu nana halvamtan.

³⁰Hijeh chun Judah lengpa Jehoiakim thudol chu Pakaiyin hitihin aseije, aman David laltouna-a touding, koimacha aneilou ding, along jong sun nisatah noile jan buhdap lah-a kipaidoh ding ahi.

³¹Akhangit lounao jeh-a, amale achilhah chule asohte talen kapeh-a, amahole Jerusalem'a chengho, chule Judah mite chunga chu, achunguva kaphondohsa anahsah louvu, thilphalou jouse chu kalhunsah ding ahi, ati.

³²Chuin Jeremiah chun lekhabujol dang alan Neriah chapa Baruch chu apen, hia chun aman Jeremiah kama kona lekhabu jihsa jouse, Jehoiakim'in meija ahalsa thuho chu ajih-in, chuche tilou jong akibahpi tamtah abelapme.