Read Thado Chin Jeremiah 37 Bible Online

Jeremiah 37 - Thado Chin bible

Jeremiah 37

¹ Chuin Josiah chapa Zedekiah chu Babylon lengpa Nebuchadnezzar'in Judah gam lenga anasem Jehoiakim chapa Koniah khelin alengchang tai.

²Ahinla ama ahin, asohte ahin, gamsunga mite ahin, Jeremiah themgao kama asei Pakai thuho chu angai pouvin ahi.

³Chuin Zedekiah lengpan Shelemiah chapa Jehucal le Maaseiah chapa Zephaniah thempu chu Jeremiah themgao henga Pakai ka Pathen'u henga tuhin neitao peh-un, ti dingin asole.

⁴Tun Jeremiah chu mipi ho lah-a chun alutle apotle in ahi. Ajehchu ama songkul'a akhum loulaiju ahi.

⁵Chuin Pharaoh sepaiho Egypt'a konin ahung kondoh taove; chuin Jerusalem kul-a Chaldea miten amaho thulhut ajah phatnun, Jerusalem adalha taove.

⁶Chuin Pakai thu chu Jeremiah themgao henga ahung lhungin aseije;

⁷Pakai Israel Pathen'in hitin aseije, eidop dinga nahinsolpao Judah lengpa henga hitihin seijun, vetan, nahu dinga hungkondoh Pharaoh sepaiho chu, agam lamu Egypt'a kilekit diu ahitai.

⁸Chule Chaldea mite hungkit uva, hiche khopihi ahin satnuva, meija ahallhah diu ahi.

⁹Pakaiyin hitin ati, Chaldea mite chun eidalhah teidiu ahi, tin nanghole nangho kilhemlha hih-un, nadalhah louhel diu ahi.

¹⁰Ajehchu nahin dou uva Chaldea sepai pumpihi satchai jongleu chun, alah uva machang umnalai ho jengjong, apon ina kona kipatdoh uva, hiche khopihi meija ahaldiu ahi, tin seijin.

¹¹Chuin ahitin ahi, Pharaoh sepaiho ginna Chaldea sepaiho Jerusalem'a kona akitoldoh phatnun,

¹²Jeremiah chu, mipi ho lah-a kona chom umdingin, Jerusalem'a konin apotdoh-in, Benjamin gam lama achetai.

¹³Chuin Benjamin kotpi agei phatnin, chuche veng lamkai khat, Hananiah chapa, Shelemiah chapa, amin Irijah chu anaumin, ama chun Jeremiah chu amanin, Chaldea miho henga jam nahi, ati.

¹⁴Chuin Jeremiah chun, jou ahi, Chaldea mite henga jammang kahipoi ati. Ahinla aman angaipeh hih-in: hitichun Irijah chun Jeremiah chu amanin, lamkaiho henga apuitai.

¹⁵Hijeh chun pipuiho chu Jeremiah chunga analunghang lheh-un, avouvin, lekhasun Jonathan insunga songkul'a chun akhumtaove. Ajehchu hichu songkul'a akisemu ahi.

¹⁶Jeremiah chu leinoi'a, lhambuh sunga alutphatnin, chua chun nisottah aumtan ahi.

¹⁷Chujouvin Zedekiah lengpan mi asolin, Jeremiah chu agapuidoh tai. Chuin lengpan a-insunga guhthim chan adongin, Pakaiya kona ipi thu umam? ati. Chuin Jeremiah chun, aume, atin ahi; ajehchu Babylon lengpa khutna kipedoh ding nahi, tin aseije.

¹⁸Chukalvalin Jeremiah chun Zedekiah lengpa henga, nangma chungle nasohte chunga, ahiloule namite chunga ipi kasuhkhel uma songkul'a neikhum ham?

¹⁹Babylon lengpa nangma satdin ahiloule hiche gam satdin hungponte tia gaochangho nathemgao ho chu tu-a hoijaba um hitaovam?

²⁰Hijeh chun tun, ngaijin, katao ahi. Vo kapu lengpa, katao ahi, kangeh nahi na-angsunga neisanpeh in, hitichun lekhasun Jonathan ina neikilesah hih-in, ajole chukoma thidenget inge, ati.

²¹Chuin Zedekiah lengpan Jeremiah chu songkul hongsunga akoina dingun, chule changlhah semho lamlena kona changlhah halkhat, khopi sunga changlhah abeihel kahse-a niseh-a apehjing diuvin thu apen ahi. Hitichun Jeremiah chu songkul hongsunga chun aumdentan ahi.