Read Thado Chin Jeremiah 38 Bible Online

Jeremiah 38 - Thado Chin bible

Jeremiah 38

¹Chujouvin Mattan chapa Shephatiah, Pashhur chapa Gedaliah, Shelemiah chapa Jucal, chule Malchiah chapa Pashhur in mijouse henga Jeremiah thusei ho chu ajaovin,

²hiche khopi sunga umdenpa chu chemjam'a, kella, chule, hise-a thiding ahi. Ahin Chaldea miho henga chedohpa chu hingding ahi. Ajehchu ahinkho chu gal anchah-a anei ding ahin, hijeh-a chu hingding ahi, tin Pakaiyin aseije.

³Pakaiyin hitin aseije, hiche khopihi Babylon lengpa sepaiho khutna kipe-a, amahon alahdiu ahi.

⁴Hijeh chun pipuiho chun, lengpa henga, kangeh-u nahi, hiche mipahi thatjengin, ajehchu aman hiche khopi sunga umnalai ho henga chutobang thu sei jeh-in sepaiho khutle mipi ho jouse khut hi angoisah-e, hiche pan hiche mite phatna ding aseipon, akisuhmona diu bou aseije, atiuve.

⁵Chuin Zedekiah lengpan veuvin, ama nakhut uva um ahi. Lengpa hi nabolgot-u sutang thei ahipoi.

⁶Chujouvin amahon Jeremiah chu amanun, songkul hongsunga Hammelech chapa Malchiah leiko-a chun alehlutnun ahi. Ahin leiko-a chun twi aumpon, bonngan bou aumin, hitichun Jeremiah chu bonngan lah-a alhalut tai.

⁷Tu-a lengpa in'a um Ethiopia mi, nukiso ho lah-a mi khat Ebed-melech chun, amahon Jeremiah chu leiko sunga akhum taove ti ajatan, hiche petna chu lengpa chu Benjamin kotpi phunga touva ahin,

⁸Ebed-melech chu leng in'a konin apotdoh-in lengpa akihoupin aseije;

⁹Kapu lengpa, hitehon Jeremiah themgao chunga abol jouseu khu thilsetah abolu ahitai. Amahon leiko sunga alehlutnun, aumna mun'a chu thiding kon ahitai. Ajehchu khopi sunga changlhah umlou ahitai, ati.

¹⁰Chujouvin lengpan Ethiopia mi Ebed-melech chu thu apen, hia konin mi thum kipuijin lang Jeremiah themgao chu, athi kah-in leiko-a konin gapuidoh un, ati.

¹¹Hitichun Ebed-melech chun miho chu akipuijin, lengpa ina thil kholna noija chun achen, ponlui ehsaho chu ahinlan, hicheho chu Jeremiah henga leiko-a chun khaovin agah khailhan ahi.

¹²Chuin Ebed-melech Ethiopia mipa chun Jeremiah henga hiche ponluihole asesahohi najahnoija khaohi ngapsah-in, ati. Chuin Jeremiah chun chutichun aboltai.

¹³Hitichun Jeremiah chu khaovin aloidoh-un, leiko-a kon chun aladoh-un, Jeremiah chu songkul honsunga chun aumdentai.

¹⁴Chuin Zedekiah lengpan Jeremiah chu akouvin, Pakai in-lutna thum na-a chun ahenga apuilut tai. Chuin lengpan Jeremiah jah-a, thilkhat donging ting, keija konin imacha imhih-in, ati.

¹⁵Chuin Jeremiah'in Zedekiah jah-a, nahenga kaphondohle neithada mongding hinam? Chule thu kamopma nahile neingaipeh mongding ham? atin ahi.

¹⁶Hitichun Zedekiah lengpan Jeremiah henga guhthim tah-in hiche hinna eisempeh pau, Pakai chu ahinlaisen, nangma that ponge, nahinna hola hiche mite khutna jong pedoh ponge, tin akihahselin ahi.

¹⁷Chuphatnin Jeremiah chun Zedekiah henga Pakai, janel Pathen Israel Pathen'in hitin aseije, nangma Babylon lengpa pipuho henga nakipehlut poupouva ahile hingin natin, hiche khopi jong meija kihal lou ding, nangle na-insung mite nahindiu ahi.

¹⁸Ahinla Babylon pipuiho lengpa henga nakipehlut loule vang, hiche khopihi Chaldea mite khutna kipedoh intin, meija ahaldiu, amaho khutna kona nahoidoh louhel ding ahi.

¹⁹Chuin Zedekiah lengpan Jeremiah henga, Chaldea miho khutna lutsa Judah ho khu kakichai, ajole amaho khutna eipedoh khauvintin eijapi getnunte, ati.

²⁰Ahinla, Jeremiah chun pedoh pouvin nate, najah-a kasei Pakai aw hi juijengin, kangeh nahi, chutile nang din phantin, nahin ding ahi.

²¹Nakipehlut nomloule vang, hichehi Pakaiyin thu eimusah chu ahi.

²²Chule vetan, Judah lengpa ina numei um jouse chu Babylon lengpa pipuho henga kipuija, hiche numei ho chun, aseidio ahi, nagolten natung doh-un, amahon najou taove. Nakengho bon lah-a alhalut tan, amaho akinungle taove.

²³Hiti achu najite jousele nachate jouse Chaldea miho henga apuidoh diu, akhutnuva kona nasochat louhel diu, Babylon lengpa khutna kikaijo ding nahin, nang jeh-a hiche khopihi meija kihal lhading ahitai, ati.

²⁴Chuin Zedekiah chun Jeremiah henga, hiche thuho hi koimacha hetsah hih-in, nangma nathi lou ding ahi, ati.

²⁵Ahinla pipuhon nangma kakihoupihi heleu, nahenga hunguva, najah-a, lengpa henga naseijouse leh lengpan nakoma aseijouse tun keiho henga phongdoh-in, keiho-a konin imhih-in, nangma that pouvinge,

²⁶chuteng nangin ajah uva, Jonathan in'a eikilesah da-a, chua kagathiden louna dinga lengpa henga ngehna kanei jeng ahi, nati ding ahi, ati.

²⁷Chujouvin pipuho jouse Jeremiah henga ahungun, ama adong taove. Aman amaho chu lengpan thu apeh jouse bang chun ahiltai. Hitichun akihouvu chu anga taove. Ajehchu amani kihouna chu ajahlou-u ahitai.

²⁸ Hitichun Jeremiah chu Jerusalem kilahni geijin songkul hongsunga chun aume. Chule Jerusalem kilahni geijin aumin ahi.