Read Thado Chin Jeremiah 39 Bible Online

Jeremiah 39 - Thado Chin bible

Jeremiah 39

¹Judah lengpa Zedekiah lengchan kal kumko lhinna, lha som alhinna chun, Babylon lengpa Nebuchadnezzar le asepaite Jerusalem satdin ahungun, aumkul taove.

²Chule Zedekiah lengchankal kum somlekhat lhina, lha li na-a ni ko lhinnin, khopi chu akeh tan ahi.

³Chuin Babylon pipuiho jouse ahung lutnun, Nergal-sharezer, Samgar-nebo, Sarsechim, Rab-saris, Nergal-sharezer, Rabmag, Babylon lengpa pipuiho dang jouse toh kulpi lailha penachun atoutaove.

⁴Chuin ahitin ahi, Judah lengpa Zedekiah le asepaiho jousen, amaho amu phatnun, jan-in khopi-a kon chun apotdoh-un, lengpa honlei lampia acheuvin, kulbang teni kikah-a kotpi-a chun ajamdoh taove; chule ama phaicham lampia achetai.

⁵Ahinla Chaldea sepaihon anung delun, Zedekiah chu Jericho phaichama aphapao vin, ama amat phatnun Hamath gama Riblah ah Babylon lengpa Nebuchadnezzar henga apuijun, hia chun aman athu atanlhatai.

⁶Chuin Babylon lengpan Riblah'a Zedekiah mitmu tah-in achapate chu athatnin, Babylon lengpan Judah milun jouse jong athatgam heltai.

⁷Chukalvalin Zedekiah mitchang teni jong akaldoh-in, Babylon gama kaidin thihkhaova ahentai.

⁸Chuin Chaldea mihon lengpa inle mipi ho inho chu ahalun, Jerusalem kulbangho asuchimgam taove.

⁹Chuin sepaiho lamkai Nebuzaradan chun khopi-a mipi umnalai ho, ahenga hungkipelut hole mipi amoh chengse chu Babylon'a sohchang din akaitai.

¹⁰Ahin sepai lamkai Nebuzaradan chun, Judah gamsunga imacha neilou mivaichaho chu adalhan, amaho chu apetpetnin lengpilei le loumun apen ahi.

¹¹Tun Babylon lengpa Nebuchadnezzar'in Jeremiah chungchanga sepai lamakai Nebuzaradan henga,

¹²amahi puijin lang, vetupmin, bolse hihhelin, nahenga asei ding bang bangin bolpeh-in, tin thu apei.

¹³Hitichun sepai lamkai Nebuzaradan chun Nebushazban, Rab-saris, Nergal-sharezer, Rabmag chule Babylon lengpa pipuiho jouse asolin,

¹⁴amaho ngeijin Jeremiah chu songkul hongsunga konin mikhat agapuidoh sah-un, Shaphan chapa, Ahikam chapa, Gedaliah chu a-in'a puidin anganse uvin, hitichun miho lah-a achengtai.

¹⁵Tun songkul hongsunga akulkhup laijun Jeremiah henga Pakai thu ahung lhungin, aseije,

¹⁶Ethiopia mi Ebed-melech henga janel Pakai Israel Pathen'in hitihin aseije, vetan aphatna ding hilouva, hiche khopi setna ding joh-a kathu kahinlhut ding ahi. Hicheho chu namasanga hicheni chule guilhung ding ahi.

¹⁷Hicheni chule nangvang huhdoh nange, chule nakichat miho khutna kipedoh pon nate, tin Pakaiyin aseije.

¹⁸Ajehchu tahbeh-a kahoidohsah-a, chemjam'a naloulou ding, nahinkho chu gal anchah banga naneijoh ding ahi. Ajehchu kachunga natahsan na-ngap ahi, tin Pakaiyin aseije.