Read Thado Chin Jeremiah 4 Bible Online

Jeremiah 4 - Thado Chin bible

Jeremiah 4

¹Pakaiyin, Vo Israel nangma nahung kile-a, kahenga nahunga nalampi kidah umho chu kamitmu-a kona naheidoh leh, nangma kichonle tapon nate, tin aseije.

²Chule nangman, Pakai chu thutah-a, thutan na-a chule chonphatna-a hinga ahi tia nakihahsel ding ahi. Chutengle namtinho chu ama-a phatthei changa, ama-a loupi ding ahiuve.

³ Ajehchu Pakaiyin Judahte le Jerusalem jah-a, hitin ati, naleiset lholouhou chu kal let uvin, chule ling lah-a tu hih-un, tin aseije.

⁴Nangho Judah mitele Jerusalem'a chengten Pakaiya nachep tanunlang, nalungsung chep kitanun, ajole nathilbolu phatlou jeh-in, keima kalungsatna phelmit joulouvin mei bangin kongdoh getninte, ati.

⁵Judah'a seichoijin lang, Jerusalem'a phongjalin, gamsunga sumkon mut un pengun lang kikhom khomun, khopi kulneiho-a lutnuhite, tiuvin.

⁶Zion lama ponlap tahdoh-un, kikhin unlang umden hih-un, ajehchu keiman sahlama kona thilphalou, manthaina kahin pohlut ding ahi.

⁷Keipibahkai chu aumna hamthing lah-a konin ahungdoh-in, chule chidang namdangte sumang dingpa ahung pheitai, nagam sungu kamhelsah dingin aumna-a konin akipatdoh tai. Chule nakhopihou chu chenna louva agoh-a umding ahi.

⁸Hijeh hin khaodip pon kisilun, kapmun lang pengun, ajehchu Pakai lungsat tijat umtah chu eihoa kona kiheimang lou ahi.

⁹Chuni chule hung hiti ding ahi, lengpa le pipuiho lungthim mang intin; thempuhon adatmouva, themgao hon kidang asahdiu ahi, tin Pakaiyin aseije.

¹⁰Chuin keiman, hekate, Pakai Pathen! nangman hiche mitele Jerusalem hi nalhep tahbeh ahitai. Chamna naneidiu ahi natin, hinlah chemjamin ahinnao chu asunkhatai, katin ahi.

¹¹Chuchephatle hiche mitele Jerusalem jah-a, gamthip munsang ho-a huigo chu kamite chanu umna lama, ajap ngim dingle athehngim ding hilouhel,

¹²chuche munho-a kona huipi hattah kahenga hungnung ding; tu-a jong keiman achunguva thu katanlhah ding ahi, hung kiti ding ahi.

¹³Ven, amachu meibol ho banga hung touva, akangtalai chu chimpei bang ding, asakolho chu mulaopi ho sanga gangjo ding ahiuve. Suhmanga um ihi jeh-un, ohe idau ahi!

¹⁴Vo Jerusalem, huhhing-a naum theina din, gitlouna-a konin nalung sopthengin. Nalung ngaito pannabei ho chu itihchan nasunga umding ham?

¹⁵Ajehchu Dan-a konin awkhatnin aphongdoh-in, Ephraim mola kon suhgentheina hung lhading aphongjale.

¹⁶Namtinho jah-a seilen; veuvin Jerusalem dounan phongdoh-un, gamlatah-a konin galbolho ahungun, Judah khopiho dounan ahinsam uve.

¹⁷Keima eidou jeh uvin, loujao hongho bangin, amahon dounan a-umkimvel taove, tin Pakaiyin aseije.

¹⁸Nachonnale nathilbolin hichehohi nachunga ahinsodoh ahin; hichehi nagitlouna ahin, anasalheh jenge, ajehchu hiche hin nalungsung ahinphah ahitai.

¹⁹Vo kalungsung, kalungsung! kalungchang tah anai; kalungphut husa aginge; kigalgin husa sumkon ginchu, vo kahinna, nangin najah jeh-in kaumthim thei tapoi,

²⁰suhmangna chunga suhmangna in kho asamin, gamsung pumpi chu suhsetnin aumin, photlotnin kaponbuh, mitphet kahin kapondal akisusetai.

²¹Itih chanpi hiche ponlap hi kavetna, sumkon gin chu kangai jing ding ham?

²²Kamitehi angol jeh-un eiheta pouvin, ju-ngolvei chate ahiuvin, hetchet aneipouve. Thilse bolna din achingun, thilpha bolnadin hetna aneipouve.

²³Leiset chu kagahven, vetemin, alimle agong bei ahin; chule vanho chu, amahon vah anei pouve.

²⁴Molsangho kagahven, vetemun, akihot hotnun, lhang jouse kangchan akitol tolun ahi.

²⁵Kagahvetle, vetemun, mihem aumtapoi, chungleng vachate jouse alengmang gamtaove.

²⁶Kagahvetle, vetemun, gamphalai chu gamthip asohtan, khopiho jouse chu Pakai le alungsatna tijat umtah anga chun achimlha gamtan ahi.

²⁷Ajehchu gamsung pumpi chu kamhel ding; achainahel vang kahisah loulai ding ahi, tin Pakai chun aseije.

²⁸Hiche jeh ahi leiset lunghema, chunga vanho hung thim ding ahiuve; hichehi kaseisa ahijeh-in kalunggot ahin, kisih ponge, nungjong kinung heideh ponge.

²⁹Sakol chung touhole thal choiho husa-a khopi jamgam diu ahin; hamhing lah-a lutnuva, songpiho chunga kaldiu ahi, khopi tin kidalha-a, chua koimacha cheng lou ding ahiuve.

³⁰Nangma nakisuhmang phatle ipi nabol ding ham? Ponsandup min kivonin lang, sana jemin kijemin lang, namai jempol jongle chun, mohseh-a kihoisah nahiding ahi, nadongma hon nanah sahmo uva, tha dinga nahol diu ahi.

³¹Ajehchu numei naosonat thoh tobangle, chanei masapen natthoh pet banga Zion chanu aw kajai, amanu natthoh in apengin, akhut ajahdoh-in, ohe tuhin ada kahitai! ati. Ajehchu tolthat ho jeh-in kahinna alhasamtai, ati.