Read Thado Chin Jeremiah 40 Bible Online

Jeremiah 40 - Thado Chin bible

Jeremiah 40

¹Judah le Jerusalem'a kon sohchang jouse, sepai lamkai Nebuzaradan chun Babylon gama sohchang dia kikaiho lah-a Jeremiah chu thihkhaova kihenpuma apuija Ramah a kona alhadoh nungin Pakaiya konin Jeremiah henga thu ahung lhungin ahi.

²Chuin sepai lamkaipan Jeremiah apuijin ajah-a, Pakai na Pathen'in hiche mun'a thilphalouhi aphondoh ahitai.

³Tun Pakaiyin ahinlhun sahtan, asei bangin aboltai. Pakai douna-a nachonset uva, athu nangailou jeh uva hiche thil hi nachung uva hunglhung ahitai.

⁴Chule tun, vetan, tuni hin nakhutna thihkhaova konin kalha-ong tai. Babylon'a kei toh hung nanople hungin, ken nangma vetup nange, ahinla Babylon'a kei toh hung nanop loule hung datan, ven, gam jouse namasanga aume, nang dinga phale kitup nasahna lama chun chejengtan, ati.

⁵Tun ama akilekit masangin, Babylon'a lengpan Judah khopiho-a vaipo dinga atun Saphan chapa Ahikam chapa Gadaliah toh gacheng khomtan; ahiloule pha nasah-a nache nomna lam lama chetan, ati. Hitichun sepai lamkai chun nehtheihole tohphat man apen asoltai.

⁶Chuin Jeremiah chu Ahikam chapa Gedaliah heng Mizpeh-ah achen, akidalha miho lah-a ama toh achengtai.

⁷ Tun gamlah-a um sepai gallamkai jouse le amiteuvin, Babylon lengpan Ahikam chapa Gedaliah chu gamsung vaipon apansah-in, pasal ho, numei ho, chapangho chule Babylon'a sohchanga kipuilou gamsung vaichaho vetupdin angansetai ti thu ajah phatnun,

⁸Amaho Nethaniah chapa Ishmael, Kareah chapa teni Johanan le Jonathan, Tanhumeth chapa Seriah, Netophah mi Ephai chapaho, Maachath mi chapa Jezaniah, amahole amiteu chu Mizpah'a um Gedaliah henga ahung taove.

⁹Chuin Shaphan chapa, Ahikam chapa Gedaliah chu amahole amiteu henga akihahselin, Chaldea mite jending kicha hih-un, gamsunga chengun lang, Babylon lengpa kin bolun, hichu nangho dinga phading ahi.

¹⁰Keidin vang veuvin, ihenguva hung ding Chaldea miho jendin Mizpah a cheng ingting, nangho vang lengpitwi, nipilai theiga ho le thao holkhom unlang nabel sunguva kikoijun, chule nalahsao khopiho-ah chengtauvin, ati.

¹¹Hibang chun Moab'a Judah te jouse Ammon mite lah-a umho, Edom mite lah-a umho chule gamsung jouse-a umhon, Babylon lengpan Judah mi phabep adalhan, achunguva vaipodin Shaphan chapa, Ahikam chapa Gedaliah apansah-e, ti ajah phatnun,

¹²Judah te jouse akino mangnao gamho-a konin, Judah gama, Gedaliah heng Mizpah-ah ahungun lengpitwi le nipilai theiho tamtah akiholkhomun ahi.

¹³Chukalvalin Kareah chapa Johanan le gama um sepaiho gallamkai jouse, Gedaliah heng Mizpah a ahungun,

¹⁴Ahenga, Ammon lengpa Baalis chun Nethaniah chapa Ishmael chu nangma that dinga asol chu nahet chennem? atiuve. Ahinla Ahikam chapa Gedaliah chun amaho atahsanpon ahi.

¹⁵Chujouvin Kareah chapa Johanan chun Mizpah a Gedaliah henga, katao ahi, neisol jengin, Nethaniah chapa Ishmael chu gathat jeng'inge, koiman heponte, Judah mi nahenga umkhomho jouse acheh chauna dingle Judah'a amohho manthah na ding bepma ibola aman nangma natha ding ham? tin guhthim chan ahung seije.

¹⁶Ahinla Ahikam chapa Gedaliah chun Kareah chapa Johanan henga, nangin hichehi nabol lou ding ahi; ajehchu Ishmael thu naseihi adihlou ahi, ati.