Read Thado Chin Jeremiah 42 Bible Online

Jeremiah 42 - Thado Chin bible

Jeremiah 42

¹Chujouvin sepaiho gal lamkaiho le Kareah chapa Johanan, Hoshaiah chapa Jezeniah, chule mipi ho jouse, chule mijouse aneopena pat alenpen gei ahung naijun,

²Jeremiah themgao jah-a nahenga kangeh-u ahi, kataonaohi neisan peh-un lang Pakai na Pathen henga neitao peh-un, ajehchu neimu-u banga hi keihohi tamtah lah-a themcha bou kidalha kahitao vin;

³chutia chu Pakai na Pathen'in kachena diu lampile kabol diu thil eihil theina diuvin, atiuve.

⁴Chuin Jeremiah themgaovin ajah uva, nathu-u chu kahei, veuvin, nathu-u bangin Pakai na-Pathen'u henga thuminge, chule hiti ding ahi, Pakaiyin nadonbutna diu thil chu ipi hijongle naheng uva phongdoh nange, nangho-a konin imacha imponge, ati.

⁵Chuin amahon Jeremiah henga Pakai na-Pathen'in kahenguva nasolna thu jouse banga kabol louvule kalah uva Pakai chu hettohsah dihtahle tahsan umtah hihen.

⁶Ahenga kasolnapao Pakai ka-Pathen'u aw chu apha hihen ase hile juinao vinge, hitia chu Pakai ka-Pathen'u aw kajui tengule keiho dinga phattheina hiding ahi, atiuve.

⁷Chuin nisom jouvin ahitin ahi, Pakai thu chu Jeremiah henga ahungtai.

⁸Chuin Kereah chapa Johanan le aumpi sepaiho gallamkai jousele sepai jouse, aneopena pat,

⁹alenpen geijin akouvin, ajah uva, Pakai na Pathen'u a-anga nathumnao lhut dinga neisolna pao chun hitin aseije.

¹⁰Hiche gamahi tuni geija naum jing nahlai diule, tungdoh ungting sonlhu ponge, chule naphutnu vingting, botdoh pouvinge, ajehchu nachung uva thilphalou kalhunsah chu kakisih tai.

¹¹Babylon lengpa naginnu chu ging tahih-un, tin Pakai Pathen'in aseije, ajehchu ama khutna kona huhhing dingle huhdoh dinga kaumpi nahiuve.

¹²Chule nachung uva hepina anei theina dinga, naheng uva hepina kavetsah-a, nangho naleiset uva kakilesah ding ahi.

¹³Ahinla nanghon, hiche gama cheng pouvinge, Pakai na Pathen thu jong ngai pouvinge, nati uve,

¹⁴kanom pouve, Egypt gama chejovinge, chua galthu jata pouvinge, sumkon gin jong, changlhah-a gilkelna jong umta ponte, chua kache diu ahi, nati uve.

¹⁵Hijeh chun tun, nangho Judah te amoh chengin Pakai thu chu ngaijun, janel Pakai Israel Pathen'in hitin ati, Egypt'a lutdingle chua pem dinga namaiju napum ngat helu ahitahle,

¹⁶hung hiti ding ahi, naginnu chemjam chun Egypt gama nahinphah diu, chule nakichatnu kel chun naitah-a Egypt gama nahin juijuva, chua chu nathi diu ahi.

¹⁷Egypt gama pem dinga amaiju pumngat hel ho chunga chutobanga chu umding ahi. Amaho chemjam'a, kela, hise-a thiuva, achunguva thilse kalhunsah dinga kona chu khatcha amohle asohcha umlou helding ahi.

¹⁸Ajehchu janel Pakai Israel Pathen'in hitin aseije, kalunghana le kalungsatna Jerusalem'a chengte chunga kasunlhah jeng banga chu, nachung uva kalungsatna chu Egypt gam nalhun tengule kasunlhah-a ki-dah le datmo, sapsetle mi houset nahiuva, hiche gamhi namukit loudiu ahi.

¹⁹Vo nangho Judah amoh chengse, Pakaiyin nachung chang thu-u hitin aseije, Egypt'a che hih-un: tunia kahin hilchah naohi kihet chenun.

²⁰Pakai ka-Pathen'u henga neitao peh-un tia Pakai na Pathen'u henga neisol petnu chun nalung gelu na-im uvin, Pakai ka-Pathen'un asei ding jouse dungjuijin, neiphondoh peh-un, juijuvinge, nati uve.

²¹Keiman tuni hin naheng uva kaphongdohtan, Pakai na Pathen'u aw ahiloule naheng uva eihinsol lona khatcha najui pouvin ahi.

²²Hijeh chun tun pemna dinga nache nomnao mun'a chu chemjam'a, kela, hise-a nathi teidiu ahi ti kihetchen jotaovin, ati.