Read Thado Chin Jeremiah 44 Bible Online

Jeremiah 44 - Thado Chin bible

Jeremiah 44

¹Egypt gama Judah umjouse Migdol gama chengho, Tahpanhes chule Noph khoho, Pathros gama chengho chungchanga Jeremiah henga thu ahung lhungin hitin aseije,

²Janel Pakai Israel Pathen'in hitin ati, Jerusalem le Judah khopi jouse-a thilphalou kalhunsah jouse chu namutaovin, chule veuvin, amaho tuhin akamhelun, chuachun koimacha acheng tapouve.

³Lunghansahna dinga eiphinset uva, agitlou jehu'n, amahon ahetphah louvu amahole nangho, chule napateu vin jong ahetkhah louvu pathen dangho jen dingin gimnamtui hal dingin acheuve.

⁴Hijengjongle naheng uva kalhacha themgaoho jouse chu, Ohe, hiche thil thet um kakidah tahhi bolhih helun, tidingin matah-a thouvin kahinsolin ahi.

⁵Ahinla amahon angaideh pouve, Pathen dangho henga gimnamtui ahallouna dingule, agitlounauva kona akileheina dingun anao jong asungdeh pouve.

⁶Hijeh chun kalunghana le kalungsatna chu Judah khopihole Jerusalem khopi lamlena kabunglhan, akadohtai. Chule hichu tunia banghin akisumangin, akamheltan ahi.

⁷Hijeh chun tun Pakai janel Pathen, Israel Pathen'in hitin aseije, ibola nalah uva kona pasal le numei, naosen le nao noicheplai Judah gamsunga kona paidoh-a aum nading bepmin hiche thilsehi nabol uve,

⁸chenna dinga nachenao Egypt gamsunga pathenho henga gimnamtui nahal uva, leiset chunga nam jouse lah-a sapsetle seiset nachan theinadiu le satlhah nahitheina diuva nakhutsoh tah uva neiphin lunghangu ham?

⁹Judah gamsungle Jerusalem khosung lamlena napateu leh Judah lengte gitlouna, ajiteule nanghotah gitlouna, chule najiteuvin gitlouna anabolhou chu nasuhmilu hitam?

¹⁰Amaho tuni geijin jong akineo sahdeh pouvin, akichadeh pouve, nanghole napateu masanga kakoijing keima danthu le chondan ho-a jong achon pouve.

¹¹Hijeh chun janel Pakai Israel Pathen'in hitin ati, keiman nangho douna-a thilse dingle Judah te satlhahna dinga kamaingat diu ahi.

¹²Egypt gamsunga pem dinga maingat Judah amoh umsun chu kamatna kasuh manghel soh ding, Egypt gama lhalut uva, chemjam le kela thigamhel diu, aneopena pat alenpen geija chemjam le kela thidiu, thet le datmoa, gaosap le seisetna umdiu ahi.

¹³Keiman Jerusalem chu chemjam'a, kela, chule hise-a talen kapeh banga Egypt gamsunga chengho chu talen kapeh ding ahin,

¹⁴Hitichun Egypt gamsunga cheng dinga che Judah mi a-umsun hochu, chenna dinga angaitun tunu Judah gama chu kilekit dinga khatcha ahoidoh le avaldoh umlou ding, aguh-a jamdoh ho tilou khatcha akilekit umlouhel dingu ahi.

¹⁵Chule pathen dangho henga ajiteuvin gimnamtui ahaluve ti he-a mijousen akoma ding numei jouse mihonpi atama tam, Egypt gama cheng mijouse, Pathros-a chun Jeremiah chu adonbutnun, aseijun,

¹⁶Pakai mina kahenguva nathusei chu ngaipou vinge, atiuve.

¹⁷Keihole kapateu, kalengteo le kapipui houvin, Judah khopihole Jerusalem khopi lamlen dunga anabol banguva, van lengnu henga gimnamtui hal le, ahenga don thilpeh sunlhah ding kakamsung tah uva kaseinao bangcheh-a kaboltei teidiu ahi. Ajehchu hichelai chun nehding tamtah kaneijun, aphan, thilse imacha kamupouve.

¹⁸Ahinla van lengnu henga gimnamtui halla don thilpeh sunlhah katan uva pat ijakai kalhasamun, chemjam le kelin eiki sumangun ahi.

¹⁹Chule van lengnu dinga gimnamtui kahal uva, don thilpeh kasunlhah laijuva chu, kapasalteu thu louva amanu houna dinga changlhah kasemuva, don thilpeh kasunlhah-u hibeh-em? atiuve.

²⁰Chujouvin Jeremiah chun mijouse hengale pasal ho, numei ho, ama donbutho jouse henga chun aseijin,

²¹Judah khopihole Jerusalem khopi lamlen ho-a, nanghole napateu nalengteu chule gamsunga miten, gimnamtui nanahalu chu, Pakaiyin ahetlou hija alungsunga akhumlou hibeh-am?

²²Nathilse boljeh-u le nathilbolu kidah um jeh-a, Pakaiyin athohjou tahlou ahin, hiche jeh-a chu, nagamu tu-a bangahi kamdela, datmo uma, sapset changa achenga umlouhel ahitai.

²³Gimnamtui nahal uva, Pakai douna-a nachonset uva, Pakai thu nangai daova, adan kisun thupeh le achondan najuilou jeh uva, hiche jeh-a chu tu-a bangahi nachung uva hiche thilsehi hungchua ahitai, ati.

²⁴Chukalvalin Jeremiah chun mijousele numei jouse jah-a aseijin, Egypt gama um Judah te jousen Pakai thuhi ngaijun.

²⁵Janel Pakai Israel Pathen'in hitin aseije, nanghole najiteuvin van lengnu henga gimnamtui hal le don thilpeh sunlhah ding, kanakitepnao banga kabol teitei dingu ahi, tin nakamun naseijun, nakhut un namolso taove. Nakitepnao bulhitnun lang, nakitepnao molsouvin.

²⁶Hijeh chun Egypt gama cheng Judah te jousen Pakai thu chu ngaijun, veuvin, Egypt gamsung pumpi-a Judah mi koimachan kamin aphahpoh tahlou ding ahi tia kamin thengtah pana kakitep ahitai, tin Pakaiyin aseije, Pakai ahing jinge.

²⁷Veuvin, aphatna ding hilou, asetna dinga kachan jingding, Egypt gamsunga Judah mijouse akichai soh hel kahseuva chemjam le kel lhah-a kisumanghel ding ahiuve.

²⁸Ahinla chemjam'a sohcha themcha khat Egypt gama konin Judah gama kileuvintin, Judah mi umsun jouse Egypt gama cheng dinga chesate chun, kei thuham, amaho thuham, koi thujoh atah ahiding hetaovinte.

²⁹Hichehi nangho dinga melchihna hiding ahi, tin Pakaiyin aseije, hiche munahi nangho talen kapeh uva, nanghon kathuhi nangho douna-a, aselama dingjing ding ahi ti nahet theidiu ahi.

³⁰ Pakaiyin hitin aseije, vetan, Judah leng Zedekiah chu ama thadinga holjing amelmapa, Babylon lengpa Nebuchadnezzar khutna kapeh banga, Egypt lengpa Pharaoh hophra jong amelmate, ama that dinga holjingho khutna kapehdoh ding ahi, ati.