Read Thado Chin Jeremiah 46 Bible Online

Jeremiah 46 - Thado Chin bible

Jeremiah 46

¹Chidang namdangho chungchanga Jeremiah henga Pakai thu hunglhung chun;

² Egypt chungchang Euphrates luipi kama Karchemish kho-a chun, Judah leng Josiah chapa Jehoiakim lengchankal kumli lhinna in Babylon lengpa Nebuchadnezzar chun Egypt lengpa Pharaoh-Neko sepaiho chu anajoutan ahi.

³Pho leh lum kigotnun lang, gal lam nailutnun.

⁴Sakol phoho semtupmun lang, nangho sakol chungchongho kipatdoh-un, nathih lukhuh-u toh dingdoh uvin, tengcha kinol hemun lang, thih sangkhol ki-ah uvin.

⁵Ibola lungthoija anungjamu kamuham? Agal hatteu alhugamun, nunglam velouvin gangtah-in ajamuve. Avelu tijatnan alotai, tin Pakaiyin aseije.

⁶Akaljanga jammang dahen, mihat jong sohcha hihhen, amaho Euphrates luipi kom sahlama kipat uva lhugam diu ahi.

⁷Vadung banga atwi pomtultula, twisoh banga hung kinong lullul khu koiham?

⁸Egypt hi twisoh atuiho pomtultul luipi abangin, kakhan touva leiset kalosoh ding, akhopile asunga chengho kasuhmang ding ahi, ati.

⁹Sakol nangho hung touvun, kangtalai nangho kino uvin, mihat ho hungdoh-u hen, lum choija Ethiopia mite le Egypt mite, thalpi kaosa-a choija Lydia mite.

¹⁰Ajehchu hichehi janel Pakai Pathen nikho phulah nikho ahin, akidoupiho chunga phu chu alah theina ding ahin, chemjamin aneh chaija, lungnachima athisanu adonkham ding ahi. Ajehchu Euphrates luipi pang sahlam gamkaijah janel Pakai Pathen'in ganlhaina abolin ahi.

¹¹Vo Egypt chanu nungah theng, Gilead'a chetouvin, nuding thingnailou gakilah-in, ajehchu nadampi louding loule ai tampi naman ding ahi.

¹²Namtin vaipin najachatna ajauvin, nakana in gamsung alosohtai. Mihatle mihat atatton, tolla alhugel lhontai.

¹³ Babylon lengpa Nebuchadnezzar iti ahunga Egypt gam ajo ding thudol chu Pakai chun Jeremiah henga aseije.

¹⁴Egypt gama seichoijun lang, Migdol le Noph chule Tahpanhes ah phongjalun, dingdet unlang, kigal ginun, ajehchu chemjamin nakimvel uva miho ahinsatgam ding ahi.

¹⁵Ipi jeh-a namihatteu kiphet manga hitaovam? Amaho Pakaiyin anojeh uva ding joulou ahiuve.

¹⁶Aman mi tampi alhuhsah-in ahi, khat chunga khat alhuvin, amahon, kipat un, suhgentheina chemjam'a konin imiteu heng, igam lamuvah chekit taohite, atiuve.

¹⁷Hia chun amahon asamun, Egypt lengpa Pharaoh vang ahu gin keubou ahin, phat kitepsa amoh suhmange, atiuve.

¹⁸Amin janel Pakai lengpa chun keima kahing jinge, tahbeh-in mol ho lah-a Tabor bangle luipi panga Karmel banga ama hung ding ahi.

¹⁹Vo Egypt'a cheng chanu, nangma sohchanga chedin kigojengtan, ajehchu Noph chu keuhela chenna louva kamhel ding ahi.

²⁰Egypt hi bongla hoitah abangin, ahinla manthah na ahungin, hichu sahlama kona hunga ahi.

²¹Bongchal thaotah bangin amithalah houjong chu alah uva aumin, ajehchu amaho jong akinung heijun, ajamkhom taove. Ajehchu amanthah nau nikhole atosetnao phat achunguva ahung lhun jeh-a ding joulou ahitaove.

²²Chua husa chu gul kitholgin abangin, amaho chu gammang thingtuho banga heicha kenga galmiho toh hungdiu ahi.

²³Amaho khaokhoho sanga tam ahiuvin, simjouhoi ahilou jehu'n, kholtoh hoi hihih jongleu agammang chu atuhchaihel diu ahi, tin Pakaiyin aseije.

²⁴Egypt chanu kijumso-a, sahlam gamkai mite khutna kipedoh ding ahi.

²⁵Janel Pakai Israelte Pathen'in aseije, vetan, Amon mi No mihonpi, Pharaoh le Egypt chu a-pathenho le alengteu puma, Pharaoh amatah le ama tahsan jouse talen kapeh ding ahi.

²⁶Keiman amaho chu ahinnao holtele Babylon lengpa Nebuchadnezzar le asohte khutna kapehdoh ding, chujou tengle masanga banga Egypt gama chu mi cheng ding ahi, tin Pakaiyin aseije.

²⁷ Ahinla Vo kalhacha Jacob, nangma kicha hih-in, ajehchu vetan, nangma gamlatah-a kona chule nachilhahte asohchannau gama kona kahuhdoh ding, Jacob chu hung kinungle-a ongthol tah-a choldoa, koimachan akichatsah lou ding ahi.

²⁸Kicha hih-in, Vo kalhacha Jacob, tin Pakaiyin ati, ajehchu keiman kaumpinai, keiman nangma kadel mangna namho jouse kichaina chu kabolpeh ding ahin, nangma kichaina vang kabolpeh lou ding, tena-a vang kasuhdih ding nahi, hijengjongle talen manlouva vang kakoi louhel ding nahi, ati.