Read Thado Chin Jeremiah 48 Bible Online

Jeremiah 48 - Thado Chin bible

Jeremiah 48

¹ Janel Pakai Israel Pathen'in Moab dounan hitin aseije; Ohe Nebo, ada ahi, ajehchu akisusea nahitai; Kiriathaim akijumson, akilatai; Misgab ajahchan, alungthoi tai.

²Moab kivahchoina umta ponte, Heshbon dounan thilse agonguve, hungun, namkhat ahina-a konin sutanhel uhite. Vo Madmen namho, nangho jong kisatlha ding nahiuvin, chemjamin najuidiu ahi.

³Horonaim'a kona chomna le suhmangna nasatah kana awgin sohdoh ding ahi.

⁴Moab akisumang tai, achasen hou ka-na akijan,

⁵Ajehchu Luhith chetouna-a kap kapmin acheuvin, Horonaim kumsuh na-a melmaten asuhmangna jeh-a kana ajaove.

⁶Jamun, nahinna kihuhhingun lang, gamthip hamhing bangin umun,

⁷Ajehchu nathilbol le nahaona natahsan jeh-a, nangma jong kiman ding nahin, Chemosh chu athempuhou le apipuiho puma sohchanga chediu ahi.

⁸Khopi tina misumang hungintin, khopi khatcha hoilou ding, Pakaiyin asei banga damphai jong mangthah-a phaicham jong kisumang ding ahi.

⁹Alenmang theina din Moab chu lhaving peuvin, ajehchu acheng beija akhopi chu kamhel ding ahi.

¹⁰Jonchihtah-a Pakai na tonga chu sapset changhen, thisan sona dinga achemjam tuhkihpa jong chu sapset chenghen.

¹¹Moab hi aneuva pat nomsa ahin, ajuninga kivah-a, ajubel khatna khat jong keukhalou, ama jong sohchanga chekhalou ahi, hijeh achu atuina ama-a umden dena, anamtui jong kikhel lou ahi.

¹²Hijeh chun veuvin, nikho chu hunglhung ding ahi, tin Pakaiyin aseije, ahenga vahveiho kasola, amahon avaveisah dingu, chule jubelho avoh chippeh uva ahaihou asuhchippeh diu ahi.

¹³Israel insungin atahsan Bethel ajachatpiu banga Moab miten Chemosh ajachatpi diu ahi.

¹⁴Keiho gal hat le mihang kahiuve, iti natiu ham?

¹⁵Moab akisumang tan, akhopiho-a konin abeidoh tai. Alhentum khangthah ho jong akithat ho lah-a apanggam taove, tin amin janel Pakai hija lengpa chun aseije.

¹⁶Moab hamsetna chu hunglhung vah ding ahitai, chule athohgimna chu kinoloi chela ahitai.

¹⁷Nangho avela um jousen lunghem piuvin, amin heho jousen, mol lhon hamtahle moltum hoitah chu iti boh-a hitam? tiuvin!

¹⁸Dibon'a cheng chanu nangma, naloupi na-a konin hungsuh-in lang, dang chah-in touvin, ajehchu Moab sumanga chun nahin satna, nakulpi det ho asuhmang diu ahitai.

¹⁹Vo Aroer'a cheng lampia dingin lang velhin, ajampale ahoidoh nu chu ipi soh-a hitam? tin dongin lang seijin.

²⁰Moab chu achimlhah jeh-in ajahchatai. Pengchoi choijin kapmun, Moab akisumang tai tin Arnon hilleuvin.

²¹Phaicham gama Holon le Jahazah chu chule Mephaath chunga, thutanlhahna aumin,

²²Dibon le Nebo, chule Beth-diblathaim chunga,

²³Kiriathaim le Beth-gamul, chule Beth-meon chunga,

²⁴Kerioth le Bozrah chule Moab khopiho jouse naijale gamla-a chunga thutanna ahung lhungtai.

²⁵Moab ki akisatlhan, abanjang akihehbongtai, tin Pakaiyin aseije.

²⁶Pakai douna-a akiloupisah jeh-in, ama chu khamsah uvin, Moab jong alohlhahna-a kibola anuiho totna jong ahi.

²⁷Israel chu nang dinga nuijatna bep hilou ham? Ama gucha lah-a kimukha am? Ama thudol nasei poupoule kipah-in nakichom chomjin ahi.

²⁸Vo Moab gama chengho, Khopiho dalhauvin, songkoa chengun, kohom panga bu kiset vakhu bangin umun.

²⁹Keihon Moab kiletsahna thu, ama akiletsah lheh-e; akichoisangin, ahoithoji-e, akiletsah jeh le alung hoithodan kamuvin ahi.

³⁰Alungsatna chu kahei, tin Pakaiyin aseije; ahinla chutilou ding ahi, ajounaho chun ima sodoh ponte.

³¹Hijeh chun Moab din penging ting, Moab pumpi din kapdoh inge, Kirheres mite chu lunghem pinge.

³²Vo Sibman lengpigui Jaazar ka-na in nangma dingin kapminge, naguiho twipi ajam galkaijin, Jaazar twipi chan geihel ajame, na nipitheile lengpiga sumangpa nachunga achutai.

³³Neh nenna le Moab gama konin thanopnale kipana akilamang tan, lengpiga chilna-a konin lengpiga kabeisahtai. Koimachan kipa awgin to tho-a achiltah louding, a-ao nau chu kipana hitalou ding ahi.

³⁴Heshbon'a kona Elealeh gei peh-a kho kisam chu Jahaz gei peh-in a-awginu athongin, Zoar apat Horodnaim geijin kum thum bongla abangin, ajehchu Nimrim twiho jong kamhel ding ahi.

³⁵Chukalvalin Moab'a munsang ho-a thilto bolpale a-pathen hou henga gimnamtui halpa kasuhthip ding ahi, tin Pakaiyin aseije.

³⁶Hijeh chun kalunghi Moab te dingin thih bangin gingintin, kalunghi Hirheres mite dingin theile ho bangin ginginte, ajehchu aman anei haonaho beigama ahitai.

³⁷Ajehchu lu jouse chaija, khamul jouse kivou ding, khut jouse-a ki-at ding, kongho chunga khaopon akiveitai.

³⁸Moab intingvum jousele khosung lamlen ho-a tanggola lunghemna jeng umding ahin, ajehchu asunga lunglhaina umlouhel bangin kavochiptai, tin Pakaiyin aseije.

³⁹Amaho penguva, iti hichu kisu chipma, Moab chu jahcha geuva iti kinungheija hitam atidiu ahi. Hitia chu Moab chu nuisat le akimvella umho dinga lungthoina hiding ahi.

⁴⁰Ajehchu Pakaiyin hitin aseije, Veuvin, ama mulaopi bangin hunglengin tin, Moab chunga alhaving ahinjah ding ahi.

⁴¹Kerioth chu akila ahitan, akuldet hou achim sohtan, chuche ni-a Moab mihangsan ho lungthim chu numei naonei pet lungthim tobang bep ahi.

⁴²Moab chu Pakai douna-a amale ama akichoisang jeh-a mite khat ahinaova kona kisumang ding ahitai.

⁴³Vo Moab'a cheng, nachunga tijatna le kokhuh chule thang hungchu ding ahi, tin Pakaiyin aseije.

⁴⁴Tijatna-a kona jam-a chu kokhuh-a lhalutnin tin, kokhuh-a kona hungdoh-a chu thanga ohding ahi. Ajehchu achunga Moab chungtah-a talen kapeh kum kalhunsah ding ahi, tin Pakaiyin aseije.

⁴⁵Heshbon lim noija galmiho jeh-in ajamho adingden taovin; ahinla Heshbon'a konin mei chule Sihon'a konin meikong hungintin, Moab ningkoile samel mula umho lallukhuh akahvam ding ahi.

⁴⁶Vo Moab ada nahitai! Chemosh mite amangthah taove. Ajehchu nachapate sohchangin akikaijin, nachanute asohchang taove.

⁴⁷Hijongle ninunung lamle Moab sohchangho chu kahinlepui kit ding ahi, tin Pakaiyin aseije. Hichan geihi Moab thu kitanlha chu ahi.