Read Thado Chin Jeremiah 49 Bible Online

Jeremiah 49 - Thado Chin bible

Jeremiah 49

¹ Ammon mite thudol chu Pakaiyin hitin aseije, Israel'in chapa aneilou ham? Aman goulo aneilou ham? achutile ibola alengpauvin Gad alo-a, amite akhopiho-a chenguva ham?

²Hijeh chun Pakaiyin aseije, Vetan, nikho ahung lhunge, Ammon mite kho Kabbah a galkisat thuthang kajahsah ding, hichu agohkeo kisevum hija, achanuteu meija kigou ding; chuteng ama gouloho chu Israel ten alodiu ahitai, tin Pakaiyin aseije.

³Vo Heshbon, Ai kisuhmang jeh-in pengun, Rabbah chanute kapmun, khaodip pon kigah-un lang lunghemun, hamkhul lah-a suhle tungin lhaijun, ajehchu alengpaule athempuhou chule apipuiteu agoma sohchanga chediu ahitai.

⁴Vo chanu nungchonnu, ibola na phaichamm phalai chuleh phaicham ho-a nakiloupi sah-a nagoukhol ho-a nakisona, kahenga koi hung ding hija? nati ham?

⁵Vetan, nachunga tijatna, navela umho jouse-a kona kahinlhunsah-a, nangho amitakip kinomang jeng ding, alamvaipa chu koimachan akhopkhom lou ding ahitai, tin janel Pakai Pathen'in aseije.

⁶Khonungle Ammon chate sohchangho kalepui ding ahi, tin Pakaiyin aseije.

⁷ Edom thudol chu janel Pakaiyin hitin aseije, Teman'a chihna beihela hitam? Milungchinga kona thumopna mangthah-a hitam? ahetkhen themnao mangdela hitam?

⁸Vo Dedan'a chengte, jamun, kinung leuvin, chengdetnun, ajehchu keiman Esau chunga hamsetna kahinlhut ding, ama gotna kapeh ding phat kahin lhunsah ding ahi.

⁹Lengpiga louho nahenga hungleu akhai themkhat dalha pouvintem? Jan-in guchaho hungu le achim kahseuva aneh mang loudiu ham?

¹⁰Ahinla Esau ahomkeovin kalhan, amunthip ho kahohdoh gamtan, kisel thei lou ding ahitai. Achilhahte leh asopiho, chule aheng akomho akisumang sohtan, ama abeihel tai.

¹¹Paneilou nachateho chu dalhan, keiman hinso nange, chule nameithai hon eitahsanu hen.

¹²Ajehchu Pakaiyin hitin ati, Vetan, khona kon adonlou dinga athu kitanlhah hon adonjeng tah-ule, talen manlou ding pa chu nangma nahim? Talen manlouvin chepon nate, ahinla hichea chu nadon tei ding ahi.

¹³Keima kaki hahsel tai, tin Pakaiyin aseije, Bozrah chu kamhela, seisetna uma, keohela, sapsetna umding; chuche khopi jouse a-itih-a keohel ding ahi.

¹⁴Pakaiya konin thuthang khat kajan, Pathen helouho henga palai khat akisolin, kipun khomun, chule ama satnun, galbol din kipatdoh-un.

¹⁵Ajehchu vetan, keiman nangma Pathen helouho lah-a kaneosah-a, mite nahsahmo-a kasem ding nahi.

¹⁶Vo nang lhangsanga song khikah-a cheng, kichat umtah banga nakigelna le nalunga kiletsahna chun nalheplhah ahitai. Nangman muvanlai banga sangin nabu sepjongle chun, chua kona kaloilhah ding nahi, tin Pakaiyin aseije.

¹⁷Edom jong kamhel intin, koi hile ajotpa chan atosetna jeh-a chehsa diu ahi.

¹⁸ Sodom le Gomorrah chule avela khopiho akisuhmang helbanga, chua koimacha umlou ding, mihem chapa jong cheng louhel ding ahi, tin Pakaiyin ati.

¹⁹Veuvin, Jordan twisoh akonin ama chu kuldet nokhum dingin keipibahkai bangin hungtouvintin, ahinla ama-a kona hetman louva kadelmang ding ahi, chule achunga vaipo dinga kalhenthei pasal lhentum koiham? Kei tobang koi umam? Koijin phat eiteppeh ding ham? Ka anga dingding kelngoi chingpa chu koi ham?

²⁰Hijeh chun Edom douna Pakai thumopte, Teman'a chengte chunga athilgon, bol dinga agot ho chu ngaijun, thonlouva ganhon neopen geija kilhoh manga amaho puma achennao akamhelsah tei ding ahi.

²¹Alhuh-u ginin leiset ahot lingin, aka ginu jong twipi geijin akijaphan ahi.

²²Veuvin, mulaopi bangin ama hungleng touvintin, Bozrah chunga alha ajah ding ahin, hiche nikho chuleh mihat te lungthim jong numei jin naosonat athoh petna alungthim tobang hiding ahi.

²³ Damascus thudola chun Hamath le Arpad akisudongtai; amahon thuse ajah jeh-un alungu alha lhoptai; twipi chunga lungkhamna aumin, hichu athip thei tapoi.

²⁴Damascus hi angoilhatan, jam dingin kigon akiheijin, tijatna-in amanchomtai; lungkhamnale natnan numei naosonat bangin abomtai.

²⁵Kanopsahna khopi, vahchoina khopi chu iti kikhen louva ham?

²⁶Hijehchu agollhanghou khosung lamlena chu lhugama, hicheni chule agal hat hou jouse kithatgam hel ding ahiuve, tin janel Pakaiyin aseije.

²⁷Chule Damascus kulbanga mei kachokonga Benhadad leng inpi akahvam ding ahi.

²⁸Babylon lengpa Nebuchadnezzar'in asuhmang ding Kedar thudolle Hazor lenggam thudol chu Pakaiyin hitin ati. Kipat un Kedar a chetouvun lang, solama miho chu gachomun.

²⁹Aponbuh houle agancha honnu atol manguva, apondal houle aumlebel jouseu, asangongsao ho akilah uva, amahon ajah uva, ningtina tijatna jeng ahi, tia ahenguva asap diu ahi.

³⁰Vo Hazor a cheng mite, jamun, gamlatah-a umun lang, chengdetnun, tin Pakaiyin aseije. Ajehchu Babylon lengpa Nebuchadnezzar'in nachung thu agel lhutan, nangma douna-in ngaito aneitai.

³¹Kipat un, khohsah louhela cheng kul kotpile thih kotgol jong neilouva achanguva cheng, nam haotah ho sat ding khun kontouvun, tin Pakaiyin aseijin ahi.

³²Asangongsao ho chu galthil chomding hija, aganchau tampi chu chomgam dingbep hintin, kolmong geija hui jouse-a amaho kathecheh-a, ningtina kona ahamsetnau kahinpoh ding ahi, tin Pakaiyin aseije.

³³Hazor chu dragon ho chenna hiding, a-itih-a kamhel ding ahin, chua mihem khatcha umlou ding, mihem chapa khatcha jong cheng lou ding ahi.

³⁴Judah lengpa Zedekiah leng chantila Elam douna-a Jeremiah themgao henga Pakai thu hunglhung chun hitin aseije.

³⁵Janel Pakaiyin hitin aseije, Veuvin, Elam thalpi athahatnao kona pen chu kaheboh ding ahi.

³⁶Elam dounan chua van ningli-a konin huilhi hinlhun sah ingting, chuche huiho lama chu kathecheh ding, akinodoh Elam mite lhunlouna nam umlou ding ahi.

³⁷Ajehchu Elam mite chu amelmateu masangle ahinnao holte masanga kalungthoisah-a, achunguva thilse kalunghana, tijat umtah ngeichu kapohlutna, kasuh manghel kahse-a, anung nunguva chemjam kasol ding ahi, tin Pakaiyin ati.

³⁸Chua kona lengpa le pipuiho kasuhmanga, Elam'a chu kalaltouna kado ding ahi, tin Pakaiyin aseije.

³⁹Ahinla ninunung lamle hung hiti ding ahi, Elam sohchangho chu kalepui kit ding ahi, tin Pakaiyin aseije.